Nehemia 13 - Angami Naga CL (Re-edited) Bible (BSI)

Nehemia Mhachü Kesa Lakecü

¹ Sünhie uko themiako mhodzü nunu Mosa leshüdau phrü; mu Ammonmia morei Moabmia Ukepenuopfü kehou nu vor suo zo ükecü thupie kezhü ngulie;

² kekreilamonyü uko niekhrüda mu dzü se vor Israelmia nuonuoko ze kese mo, derei Balaam zha khrüpie uko petsouta, sidi puo bu uko rüsewanuta; sirei Ukepenuopfüe rüseu pie theja chüwa.

³ Siro ukoe thezho-u silie tse, ukoe seyie kekrei ze kerituoketa nunu Israel kelakreilie.

⁴ Siro hamhodzütsa, Eliashib zievo-u, Ukepenuopfü ki kemeho-u, mu Tobia ze kepero kezhau,

⁵ Tobia la ki kezha puo chüshü, hamhotsa ukoe thoulha ruosuo, kethengu siro tehiemekhouko, telha ker-zapuoko, khubedzü kesa, tsiu tier khapie Leviko, ükechüko, mu liethoko tsünu di diekhakeshüko khapie zhüya.

⁶ Derei hako kechü teiki a Jerusalem nu ba mota, kekreilamonyü Babilon nu kediu Artaxerxes dikelie cie serekenie cie a kediu ki vota, mu puotei huo sie nu kediu ki chalie,

⁷ di Jerusalem nu la vor, ru Eliashib-e Tobia la mha kesuo chü di Ukepenuopfü kinu kibou puo pie puo tsükeshü silie.

⁸ A süu la a nei mo seta, süla a kibou nunu Tobia vienyako pete chü kelhouwata.

⁹ Süsie a diekhashü mu ukoe kibouko chü kemesawa, sidi a Kepenuopfü kinu tehiemekhouko, thoulha ruosuo tsiu kethengu sa di se la vorshülie.

¹⁰ Siro ae Leviko yako pie uko tsü vor kemo ngulie, kekreilamonyü Levimiako mu ükechüko mhatho chüyakezhakoe u thuo tase u lie nu tsuta.

¹¹ Süla a mha kekhayakezhako ze kemeü di sie, “Kiüdi Ukepenuopfü kiu khawata ga?” Süsie a uko kie kengulie, sidi uko khapie u chü nu shüshü.

¹² Sitse Juda pete-e telha, khubedzü kesa mu tier ker zako se phre vor kinyibou nu shülie.

¹³ Süsie a kinyi kemeho la kinyikesemia hako kedalie: Shelemia zievo-u, Zadok thezhokepethau mu Pedaia Leviu, tsiu uko siezedzürieko liro Zakur nuou Hanan, Matania nuou, ukoe diethokecü ngukelie la, mu uko mhathoe mha kezapie uko siezedzürieko tsüketuo la zo.

¹⁴ He-i a Kepenuopfü, a rükrashücie hau dze tsatie, siro a a Kepenuopfü kiu la mu mhatho-u la mha kevi kedipuo chüshü shi vawa hiecie.

¹⁵ Süteiki a Juda nu themia huo sabat nhie khubedzü the, telha pfü kengu tsiu gada pie dakecü, sizomonyü khubedzü, khubesi siro chiede mu thepie doneiünei se sabat nhie Jerusalem nu kevor ngushü, ru uko mhazekecü nhie a uko ruoshü.

¹⁶ Nadi sünu Tur themia rei lhou ba, ukoe khuo siro mhanya neiünei se vor di sabat nhie Juda themiako, mu Jerusalem nu kebako ki zeshü.

¹⁷ Sitse ae Juda pehüko ze keprüli di sie uko ki, “Nieko chüyakezha, mha kesuo hau kedipuo ga? Sabat zha bie perhuwate.

¹⁸ Nieko puonuoko hamhiekecü chü moü ba me, sidi úko Kepenuopfü mha kesuo hako pie u gei tsiu u nadi gei se vorshü moü me? Niekoe sabat bie perhuwa di noupfhü rekuokecü se vor Israel gei shüshüte.”

¹⁹ Süsie sabat mhodzü nhie Jerusalem kharu nu zei vortazhü tse, ae kharuko khawanu di diekhashüwa, sidi sabat zhau tseita kemochie khrüshü hienuwata; tsiu ae sabat nhie thepie pfü vor lho üwata.

²⁰ Sidi va puo kenie lhithomiako mu mha neiünei zeyakezhako bu Jerusalem khie zhü.

²¹ Derei a uko kerhie di sie, uko ki, “Nieko kiüdi dahou khie zhüya ga? Mhanuü nieko hasie chü lakecü sie, a a dzie pie nieko gei shütuo.” Sünhie yawinu uko sabat nhie vor sa mota.

²² Sidi a Leviko bu u thuo u chü kemesalie, mu vor di kharuko pfhelie di sabat zhau kha kemesapie balienu di diekhashü. A rükrashücie, he-i a Kepenuopfü, haha la rei sa, sidi no mia ngumezhie phiyakecü ki ze a kelashücie.

²³ Süteiki Judamia vo Ashdod, Amon mu Moabmia pfü liekecü rei ae ngushü.

²⁴ Mu uko nuonuo ketoupuoe Ashdod die pu, mu uko Judamia die pulie kenjü di themia kekreiko die puta.

²⁵ Süla ae sie uko ze kemeü mu uko rüse, tsiu uko huomia vü siro uko tsütha pieshü, sidi uko bu Kepenuopfü za se rüse di hamhiecü pu, “Nieko nie nuopfüko khapie uko nuonuo thepfuko tsülie lho zo, morei uko nuopfüko lie pie nie nuonuo thepfuko tsülie lho zo, morei nie thuo nie la rei silie lho zo.

²⁶ Israel kediu Solomon-e mha hako geinu jota moü me? Seyie kekra donu kedi puo kemhie jü zo, puo Kepenuopfüe puo khrie phi, mu Ukepenuopfüe puo chüpie puo bu Israelmia pete mho kedi chü; sirei seyie kekreipfüko bu puo chüpie phoumawa.

²⁷ Di siliro we nieko die rünyü di mha kesuo kemeriekecü hau chütuo me, seyie kekreimiapfü lielie di Ukepenuopfü gei kephouma chütuo me?”

²⁸ Siro Jehoiada nuoko donu mia puo, zievokezhatho-u Eliashib nuou, Horonmia Sanbalat nyaue sükemhie chü; süla a a khieki nu puo whuowa.

²⁹ Uko rükrashücie, he-i a Kepenuopfü, kekreilamonyü ukoe zievo kechüu, tsiu zievo dietseidiekho-u mu Levimia kechü perhuwate.

³⁰ Hamhie di a seyie kekreimia donunu uko chü kemesalie, tsiu zievo mu Leviko, mia puopuokecü mhatho-u kedashüwa.

³¹ Siro sei ruosuo la puotei thopie kebau nu, mu chieshüko la mha keselie, a rükrashücie, he-i a Kepenuopfü, keviu la.