Nehemia 11 - Angami Naga CL (Re-edited) Bible (BSI)

Jerusalem nu Kelhouko

¹ Siro krütakoe Jerusalem nu lhou, siro themia kekreiko mia ker donu mia puo bu Jerusalem kemesa nadiu nu lhou mu kekrei thepfüko bu rüna kekreira lhouketuo la themiakoe dapetuo.

² Tsiu themiakoe japie u thuo Jerusalem nu lhou nyüketako tsü.

³ Jerusalem nu lhoukecü rüna hako kemeyieko: derei Juda rüna nu themiakoe u thuo u rünako nu u viera lhou, süko Israel zievoko, Leviko, rüsuoki kituoko, mu Solomon kituomia nuonuoko.

⁴ Siro Jerusalem nu Juda nuonuo mu Benjamin nuoko huo lhoutuo. Juda nuoko: Uzia nuou Athaia, Zekaria nuou, Amaria nuou, Shefatia nuou, Mahalalel nuou, Perez nuonuoko.

⁵ Mu Baruk nuou Maseia, Kol-hoz nuou, Hazaia nuou, Adaia nuou, Joiarib nuou, Zekaria nuou, Shilon nuou.

⁶ Perez nuo Jerusalem nu lhouketuo pete kesa miavimia krie dia di hiesorouethetha.

⁷ Siro hako Benjamin nuoko: Meshulam nuou Salu, Joed nuou, Pedaia nuou, Kolaia nuou, Maseia nuou, Ithiel nuou, Jeshaia nuou.

⁸ Puo siezedzürieko: Gabai, Salai, mia krie thepfü di mepfüethetha.

⁹ Siro Zikri nuou Joel-e uko mhokezhau; mu Hasenua nuou Judae nadiu mhokezha kenieu chü.

¹⁰ Zievoko liro: Joiarib nuou Jedaia, Jakin,

¹¹ Hilkia nuou Seraia, Meshulam nuou, Zadok nuou, Meraiot nuou, Ahitub nuou, Kepenuopfü kinu kekhakecüu chü.

¹² Tsiu uko siezedzüriemia kiu nu mhatho kechümiako krie thetha di mepfüekenie; mu Jeroham nuou Adaia, Pelalia nuou, Amzi nuou, Zekaria nuou, Pashur nuou, Malkija nuou.

¹³ Mu puo siezedzürieko, u puonuo kinumia krüko, krie kenie di hiediaekenie, siro Azarel nuou Amashsai, Ahzai nuou, Meshilemot nuou, Imer nuou.

¹⁴ Mu uko siezedzüriekoe, themia kekuo miavimia, krie puo di mepfüethetha, mu uko mhokezhau Zabdiel-e Hagedolim nuou.

¹⁵ Siro Leviko: Hashub nuou Shemaia, Azrikam nuou, Hashabia nuou, Buni nuou;

¹⁶ siro Shabethai mu Jozabad, Leviko donu krüta chü di Ukepenuopfü kiu chazou mhathoko mehoya.

¹⁷ Tsiu Mika nuou Matania, Zabdi nuou, Asaf nuo, kethezie khakeshü sede kechau nu krütau mu Bakbukia, puo kekhruohiko donu mia kenieu; mu Shamua nuou Abda Galal nuou, Jeduthun nuou.

¹⁸ Levimia pete nadi kemesau nu kebako mia krie kenie di hiethethaedia.

¹⁹ Kharukepfheko: Akub, Talmon mu uko siezedzürieko, kharu pfhe thayakezhako krie puo di hietheniekenie.

²⁰ Siro Israelmia pesha kebako, zievoko, mu Leviko, Juda rünako nu, mia puopuokecü puo kayieu nu lhou.

²¹ Derei rüsuoki kituokoe Ofel nu lhou, siro Ziha mu Gishpae rüsuoki kituoko kekha.

²² Leviko kemeho-u ro Jerusalem nu kelhouu Uzi, Bani nuou, puoe Hashabia tsuu, puo pfutsanie ro Matania mu Mika, siro puoe Asaf Ukepenuopfü kiu nu ütsalikechüko mhatho kemeho-unuo kinumia.

²³ Kekreilamonyü kediue uko dzevi la diekhashü mu ütsalikechüko la teisonhie se morokesuou khashünu di.

²⁴ Siro Meshezabel nuou Pethahia, Juda nuou, Zera nuonuoko, u themia dzevi kele mhatho pete pie kediu dzie nu shüya.

Jerusalem Khieümhou Kelhouko

²⁵ Tsiu socüsonuoko nu u lieko la liro, Juda nuonuo huo Kiriat-arba nu lhou, mu sünu socüsonuoko sa siro Dibon nu mu sünu socüsonuoko, Jekabzil nu mu sünu socüsonuoko,

²⁶ Jeshua nu, Molada mu Bet-pelet nu,

²⁷ Hazar-shual nu, Beersheba nu mu sünu socüsonuoko,

²⁸ Ziklag nu, Mekona nu mu sünu socüsonuoko,

²⁹ En-rimon nu, Zora nu, Jarmut nu,

³⁰ Zanoa, Adulam, mu uko socüsonuoko, Lakish mu süu lieko, tsiu Azeka mu süu socüsonuoko. Süla ukoe Beersheba nunu vo Hinom razhau ketso nu lhou.

³¹ Benjamin themiako rei Geba nunu vo Mikmash, Aija Bethel mu süko socüsonuoko nu lhou,

³² siro Anathot, Nob, Anania,

³³ Hazor, Rama, Gitaim,

³⁴ Hadid, Zeboim, Nebalat,

³⁵ Lod mu Ono, mhatho chüyakezhako razhau.

³⁶ Mu Juda nu Levimiako kezapie huo bu vo Benjaminmiako zeta.