Nahum 3 - Angami Naga CL (Re-edited) Bible (BSI)

Kepeka Vor Toutuoü Baketa

¹ He-i! Thezie kepekru nadiu, mia pete meda phre, mia vie vakelie thuo tshupfü, mha pekakecü puo thela jü!

² Seiro pfhe mu bageithuo kerütou pfhe, kier keprou pfhe tsiu kierbagei toutou ketuo pfhe.

³ Kierkesemia ta whuo kevo, zhiecha phriephrieikecü tsiu rüngou kepreikecü, kesiako kengupie zhü, kesiamo pfhepie zhü, kesiamoko puo kela jü zo, ukoe themoko geinu u phi mesü!

⁴ Kekreilamonyü thethe lie di pieüpiera kechü krathorte, kethemoukecü kezhapfü, menenuoi di mia ketsi, puo piera geinu seyieko pie puo die chü, tsiu puo themou geinu themiako chüpie kedie chüwa,

⁵ ae n petsouya, krodiko Jihovae siya, mu n neiu hiepie n zie whewatuo; sidi a seyieko bu n kemethuo mehotuo, siro n ngapie kedi rünako bu mehotuo.

⁶ A kerütsekecü kelhoupie n gei shütuo, mu n pie mhathomharo kemo chüwatuo, tsiu n pie zasizapra chüshütuo.

⁷ Sitse n ngukecü pete n kinu tatatuo sidi sie, “Ninevi sü pekawate; supuonie puo krükra ta?” Kirapuo nu a n la thukepeluomia pfhü ta?

⁸ Noe Nail khie keba Thebes, puo khie dzü bu houpfü keba, dzükezha se puo dahou chü, dzü bu puo sozha chükecüu ki vikuo me?

⁹ Ethiopia pie puo kekuou chü, Ijipt rei, mu süu puo thela ba mo; Put tsiu Libiamia sü puo kekhruohiko.

¹⁰ Sishierei puo miadie chüte, puo miadie chü vote; puo nuonuo kecüko rei chatietshü pete nunu vütshie phawate; puo themia kezhako la dape, puo themia kemeyieko pete thegiro se pha ze phrete.

¹¹ No rei mezetatuo, no vo rüshütatuo; no ngumvümia kinu rüzhükelie pfhütuo.

¹² N badi pete rei chiedebo tuoi, puosi melie kerieu mhie, kenieshü ro ukoe tecüyakezhamia me nu letuo.

¹³ N chüpahiko mehoshücie: Sükoe n donu keba thenumia zo. N kijü nu kharuko khrü kemeyapie n ngumvümia tsütuo; mi bu n kharuko thewate.

¹⁴ Terhü la dzüüliecie, n badiko chü kemeteilie; rünyo kenyoshüliecie, nyoba kenyoshülie, nyorie kerie miphuu chü kemeteilie!

¹⁵ Sünunu mi-e n thewatuo, zhiechae n dathewatuo. Süue ku tuoi n cü pejüwatuo. Ku tuoi n thuo n chü pekraliecie, kuprie tuoi n chü pekralie!

¹⁶ Noe n lhithomiako chü pekrapie teigei themvüko ki krakuote; kue silie di pruotaya.

¹⁷ N rükhoukoe kuprie mhie zo, n themia mhakesikoe teikesei ki cakha gei baya, siro niakithu par tse pruotaya; ukoe kirapuo vote shi miapuorei süu siya mo.

¹⁸ N kuopfheko ze zhüte, He-i Asiria kediu; n pehümiako rüngute. N themiako ta cüre vo kijüthouko gei tuote, uko pfhü kengushüketuo puorei jüte.

¹⁹ N rüzapfü chü kemeneshüketuo miapuorei jü, n rüzau soute. N dze kesi pete dzieda n kietuo. Kekreilamonyü supuonie n zho kesuo puo thela kejüu nunu talie mu?