Nahum 2 - Angami Naga CL (Re-edited) Bible (BSI)

Nadi Kerüzhüu Pekakecü

¹ Biephroshüyakezhau sier n petsoute. Dahouko pfhelie; chako meho menuolie; nie chie pha kemeteilie; nie kekuo pete kengulie.

² (Kekreilamonyü Jihovae Jakob therhu, Israel therhu rei sa se la vorshütuo, mha bie pejüwayakezhamia thuo uko bie pejü mu uko coko pekawa zorei.)

³ Puo terhümiavimia pezhüko sü merieyhara zo; puo chüpahiko pfhenei meriemegekecü se. Puo uko kengukelie nhie kierbagei nyako vavai; kierko prou kemerie chütuo.

⁴ Chaüko nu kierko thu votuo, ukoe ziekeko nu ta kho mu ke tuoya; uko ngupie mi mhie, ukoe teikemela tuoitaya.

⁵ Puoe puo kezhako kieshüya; uko tuo kevor ki uphi mesüwa; uko rükri dahou gei vo, sidi u keya chülie.

⁶ Kerü kharuko khrüshü, kedikiu peta.

⁷ Nadiu bu miadie chü votaketuo thezho khashüte, puo diepfüko zeta, mekhru tuoi ruo mu uko merü kepfhü di.

⁸ Ninevi-e rüzie puo nu dzü kru parketau mhie zo “Thalie! Thalie!” derei miapuorei rürei la mo.

⁹ “Rakachüu vapfülie, sunau vapfülie! Kinyi-e puo thela jü! Mhama kere vie ha pete ba!”

¹⁰ Bie pesuokewa, peruokewa, mu pekakewa! U melou suo mu khoudza peta, chieca pete rüniete, thezie pete u thesuo sieite!

¹¹ Loshako kebachüu kita ga? Losha nuonuoko keba tsiepfüu, losha voyakezha chüu, miapuorei losha nuonuoko kebvüwaya kemo chüu kirapuo ba ga?

¹² Loshae puo nuonuoko la se morokesuo de ciechücierhaliete tsiu loshapfü la puo chüte keniekhrilie. Puoe puo chüte pie tsiepfüko mu chürhapie puo bouko tshuliete.

¹³ Harie, a n petsou, krodiko Jihovae siya, mu a n kierbageiko the pekhuwatuo, tsiu zhiecha bu n losha shapouko cülietuo; a kijü geinu n chüte bie pekawatuo, sidi n dieliemiako pfhe si sa motatuo.