Nahum 1 - Angami Naga CL (Re-edited) Bible (BSI)

¹ Ninevi la diekhakeshü Elkosh-u Nahum ziemho kengu leshü.

Ukepenuopfü Noupfhünouyie

² Jihovae puo rokenyi mu khepulieyakecü Kepenuopfü puo, Jihova khepulieya mu noupfhünouyie tshu baya; Jihovae puo ngukemecümia gei khepulieya, tsi u puoe ngumvümia petsou sieya.

³ Jihovae puo nou meyie tho derei puo kekuo zha se, siro Jihovae kerüzhümia bu mesatalie lho zo. Puo chae khriewhi mu khriedi nu ba, tsiu kimhoukoe puo phi nu nyophe zo.

⁴ Puoe dzükezha kerhieshü sidi süu bie pesowaya, mu puoe kerü pete bie pesowa; Bashan mu Karmel rüwitaya, tsiu Lebanon pou rataya.

⁵ Puo mhodzünu kijüthouko rünietaya, mu kijükhruko zhataya; puo mhodzünu kijüu pete meleta, kijüu mu sünu lhou keba pete.

⁶ Supuonie puo noupfhünouyie mhodzünu thalie vituo ga? Supuonie puo nouyie kereu nu shügelie vi ga? Puo noupfhüu miü tuoi rushüya mu puo geinu tsiekrieko biephro phawaya.

⁷ Jihovae vi, kemezhiekecü teisozha nhie u keya kemeteiu zo; puoe puo geinu rüzhükelieko keyau chülieya,

⁸ dzü di rüyokezhü nu zorei. Puoe puo ngumvüko chü pejü lotsowatuo, tsiu puoe ngumvüko whuopie kezei nu shüwatuo.

⁹ Kiüdi Jihova petsouya ga? Puoe bie pejü lotsowatuo; mia ngukemvüu va kenie la sierlie lho.

¹⁰ Zohu mhie di uko teshü kengulietuo, kemezemia tuoi uko ketolietuo; rügu tuoi uko the pejüwatuo.

¹¹ N geinu mia puo par, Jihova petsoukecümia puo, mha kesuo rhüyakezhamia puo.

Juda la Dieliekeviu

¹² Jihovae puya, “Uko thuo kuo se mu kra se ba shierei, uko dathewatuo mu jütatuo. A thuo n pechüpenyüshü zo ürei, a n pechüpenyü sa lhote.

¹³ Siro tsie we a n geinu puo vocieu bietshewatuo, sidi n phapfü ketuoko phreiwatuo.”

¹⁴ Jihova n la diekhashüte: “N zae kechachie ba salie lhote; n rhuoko kinu no kepie chükelie miarhi, tsiu lhopie kechü miarhi chü kelhouwatuo. A n mekhru chüshütuo, noe kemethuokemeruo zocü la.”

¹⁵ Mehoshücie! Kijüthouko gei dieliekevi se kevor-u; kezekevi pushüyakezhau phi! He-i Juda, n thenyiko nyiliecie, no phrakeshüko chüshülie, kekreilamonyü kerüzhümia n penyü salie lhote; uko peka tseiwate.