Mika 7 - Angami Naga CL (Re-edited) Bible (BSI)

Themiako Suothorketa

¹ A sü ce, chülietie! Kekreilamonyü a we mia puo metsü nhasi kengukelie sie, khubesi rie kengukelie sie, cülieketuo puophro ba ngulie kemo mhiete; a mengu keba nhasi melie kerieu ba mote.

² Kemiathomia kijü nunu jüte, tsiu themia kemezhümia puorei ba mote; uko pete rei thezie pfhe zhüte, mu uko jal se di huoniehuo whuo tuote.

³ Uko dzie mha kesuo chü si seya; kezhako mu capimia rei theso chaya, tsiu kekuo se di uko kemenguu chüya; hakemhie di uko kethocau bie kediwate.

⁴ Uko donu kevitho-u zohu kemhie zo, uko kemezhütho-u kikhahu mhie zo. Uko rükhouko, uko pechüketuo la teisozhau vorte; tsie uko kebvükeboukecü u dzie nu bate.

⁵ N khriethomia pele hie, nie kekhriemiako gei nie kepele khashü hie; n merü gei kezhüpfü kinu n me kikhau menuoliecie;

⁶ Kekreilamonyü mianuonuoe u puonuo ngumecüte, u nuopfüe sie di puo zuo perhiete, puo miepfüe sie di puo niapfü perhiete; nie ngumvükoe nie kinu keba tsüphrüko thuota zo.

⁷ Derei a la we, a Jihova meho zotuo, a kelakelie Kepenuopfü pfhe ba zotuo; a Kepenuopfü a pfhe rünyütuo.

Thenousuolie di Kepenuopfü Pelekelie

⁸ He-i, a ngumvüu, a gei n nei hiecie; a tetsuketa ki, a lasielietuo; a kezei nu baketa ki, Jihova a gei kezieu chülietuo.

⁹ Jihova nouyieu a toupfü morosuo zo, kekreilamonyü a puo gei phoumawaketa la, puo a kitsa vorlie kemochie, mu a la ketsokecüu khashü kemochie. Puo a ze kezieu nu parshütuo; a puo ketho-u thashüketuou ngutuo.

¹⁰ Sitse a ngumvüko süu ngutuo, sidi thengae “Jihova n Kepenuopfü kirapuo tuota ga?” ikeshüpfü zepfülietuo. A mhi-e puo tetsukezhü ngutuo; hapfü pie chaü nu nyoba kemhie kedenyiewatuo.

Kelashüketuo Siedzedie

¹¹ Sozhako chükelie teisozha puote! Sünhie kijü tierieko chü kemeya phi volietuo.

¹² Sünhie ukoe Asiria nunu Ijipt, Ijipt nunu Kerü ketso, dzükezha nunu dzükezha ketso, mu kijüthou nunu vo kijüthou ketso nu n ki vortuo.

¹³ Derei kijüue razhütatuo, kekreilamonyü sünu lhou kebako, uko mhatho siko la sitatuo.

¹⁴ N theu pie n themiako, n vieketa kro-u, ketsa nu, tezie kijü nu puo rübei baketau pfheliecie; thiedzü teiki tuoi uko bu Bashan mu Gilid nunu uko vachüliecie.

¹⁵ Nie Ijipt kijü nunu kepar teiki tuoi mha u ngo zocü pie hie pekieshücie.

¹⁶ Seyiekoe ngu di uko kekuoko la mengatatuo; ukoe u dzie pie u me kegulietuo; uko nyie rüvütatuo;

¹⁷ Ukoe tinyhü tuoi nyophe kelhetuo, kijüu gei khunuo gou tuoyakezhako tuoitatuo; uko dahouko nunu uko perüsürüsa partuo; ukoe kemeriekecü nunu Jihova úko Kepenuopfü ki vortuo, mu uko n la michie di thatatuo.

Kepenuopfü Ngukemezhie mu Kekhrie

¹⁸ Kepenuopfü supuonie n mhie di kejokemou vashü mu n vie peshapie keba kesuo kechüko ngu kemopfü chü pfüthe votaya mu? Puoe kechachie puo nou meyie baya mo; kekreilamonyü puoe ngukemezhie thakeshü puo neiyakezha la.

¹⁹ Puoe u ngumezhie lashütuo; puoe u kephoumako puo phi khronu kedewatuo. Noe hie kephoumako pete kelhoupie dzükezha kesou nu shüwatuo.

²⁰ Noe kedietho-u pie Jakob pekieshütuo, mu no rüdirüli kemo kekhrieu pie Abraham gei shütuo, noe thiedzü hie puonuoko ki rüsekeshü tuoi shütuo.