Mika 6 - Angami Naga CL (Re-edited) Bible (BSI)

Ukepenuopfü Israel Chiekeshü

¹ Jihova kedipuo puya shi rünyücie: Sielie, nie nyieko pie kijüthouko ki pushülie, sidi kijükhruko bu nie pfhe rünyülie.

² Rünyüliecie, nie kijüthouko, Jihova ze kediekrei baketako, nie ba seikecü kijü mvüdzeko, kekreilamonyü Jihovae puo themiako ze kediekrei bate, mu puo Israel ze keperhietuo.

³ “He-i, a themiako, a kedipuo nie gei chüshüwata ga? kikecüpuo nu a n bu n nyieta ga? A die kelashücie!

⁴ Kekreilamonyü a Ijipt kijü nunu n ze parshü, miadie kechü kiu nunu n shüphrashü; tsiu ae Mosa, Aron mu Miriam ketsepie nie mhodzünu shü.

⁵ He-i, a themiako, Moab kediu Balak kedipuo rhü shikecü, Beor nuou Balam kedipuo se puo die kelashü shicü, tsiu Shitim nunu vo Gilgal ketso kedipuo chüte shicü rükrashücie, sitse nie Jihova kelakeshü mhathoko silietuo.”

Ukepenuopfü Cha Kebau

⁶ “A kedipuo se Jihova mhodzünu vo ta? Tsiu kerükrie gei Ukepenuopfü mhodzü a nuketsutie shi? A bu kethe ruosuo, cie puoketa mithu nuonuo se di puo mhodzünu vortuo me?

⁷ Jihovae tekuochü nyienyiekecü, mu tier kerü nyienyiekecü dzükru chükecü puo neituo me? A kesuo kechü la a nuorieu, a ruopfü kephouma la a geinu kepar siu khashütuo me?”

⁸ He-i themiau, mha kiu vi shicü puo n ki pushüwate; tsiu Jihova n ki kedipuo lie nyüya shicü rei. Süu kethocau chü, ngukemezhieu khrie, mu rünuo di n Kepenuopfü ze tuokelieu zo.

Mia Sekedo mu Mia Pekakecüu Pechüketuo

⁹ Jihova pfhe nadiu ki shieshü (Mhasi puotoukecüu n za preituo): Rünyüliecie, he-i, seyieu mu nadiu nu kengukelieko!

¹⁰ Kelhiecümia kinu kelhiekecü kinyiko, tsiu mha mejü petsakecüko a rükra motalie vi me?

¹¹ Dietho kemo roshükhou, siro kemeda shertsieko likhuo gei a shügeshühie sa balietuo me?

¹² Nie kinyikoe mia kemvü kechü thuo tshu; sünu lhou keba pete kemeda puya, u me nu u meü mia sekedokecü phre zo.

¹³ Süla a n vükhrüshütuoü sedeliete, n kephoumako la n chüpie u dzükezei chüwatuo üdi.

¹⁴ No mhacütuo, derei pevülie lho, nie donu kemerü ba sei zotuo; noe kha kreipie batuo, derei pekrupie n vie chülie lho, no mhakengu se kebako, a süko khapie zhiecha tsüwatuo.

¹⁵ Nie prushütuo, derei relie lho; noe oliv kedenyietuo, derei tier pie nie kenhelie lho; no khube thetuo, derei no khubezu krielie lho.

¹⁶ Kekreilamonyü no Omri zhoko se bate, mu Ahab kiu mhatho pete chü, tsiu noe uko kepetha dieko medzi vote. Süla a n pekaperuowatuo, mu nie lhou kebako liro mia bu u rütsetatuo; sidi niekoe a themia krenyü pfütuo.