Mika 5 - Angami Naga CL (Re-edited) Bible (BSI)

¹ Tsiepfhe puo pfhepie nie khahouliete; u petsou di u re ba, ukoe sei pie Israelmia mha kekhayakezhako dzo vü.

Bethlehem nunu Kesier Kezhau

² Derei no, he-i, Bethlehem Efratha, noe Juda chienuoko donu kecütho puo shierei, n geinu a la Israel kekhaketuou partuo, puo thiedzütho nu tuote, kerietho ki nu tuote.

³ Süla nuonuovachü di penuoketuo teiu vorlie kemochie, puo uko khawatuo; süsie siezedzüriemia lhiepie kebako, la Israelmiako ki vortatuo.

⁴ Siro puoe thalietuo tsiu Jihova kekuo nunu puo kuoko, mu Jihova puo Kepenuopfü zapuzayie kechüu nunu uko vachütuo. Siro ukoe lhou khrukhretatuo, tsie yawinu puoe kijü vala ketso zhatuo;

⁵ mu puoe kezekevi themiautuo. Asiriamiako u kijü nu vor di u kijü kedeta ro, ukoe kuopfhemia thenie mu kezhamia thetha ketsepie uko petsoutuo.

⁶ Ukoe zhiecha se di Asiria kijüu kekhatuo, mu zhiecha zupie di Nimrod kijü kekhatuo; ukoe u kijü nu vor morei u tierie nu tuo vor ro, ukoe Asiriamia dzie nu u kelashütuo.

Thiesie Lhiepie Kebako Mhatho-u

⁷ Sitse Jakob geinu lhiekelieko, themia kekra bu u houpfü di, Jihova kinu thezei krü ketsur tuoi, teirü nha gei ketsur tuoi, themia pelelie lho, morei uko kemerü pie themia gei shülie lho.

⁸ Siro Jakob lhiepie kebako seyieko donunu, themia kekra bu u houpfü di, ketsa nu loshae khunuoko donu keba tuoi, losha nuonuo tekuokro donu keba tuoi, puoe tuo vo ro, mia kedewa sidi ciechücierha phaphawaya, miapuorei puo kinu kelaketuo jü di.

⁹ N dzie yhapie n ngumvümia mho shütuo, sidi n ngumvümia pete dathewatuo.

¹⁰ Jihovae puya, teisozha sünhie, a nie donunu nie kierko dathewatuo, tsiu nie kierbageiko pekawatuo;

¹¹ mu a kijü nu nadiko pekawatuo, tsiu nie kuda badiko chü kelhouwatuo;

¹² siro a nie dzie nunu themoumiako pekawatuo, sidi nie bu meduokecü kepu ba sa motatuo;

¹³ mu a nie miarhiko, tsiu nie donu sepie keba coko dathewatuo, sidi nie bu nie dzierhithoko mhodzü nuketsu salie lho;

¹⁴ mu a nie ashera coko pekawatuo, sidi nie rüna pekawatuo.

¹⁵ Siro noupfhü tsiu nouyie se di, pele kemo seyieko gei a kheputuo.