Mika 4 - Angami Naga CL (Re-edited) Bible (BSI)

Dieze geinu Kezekevi mu Khrukhrekecü Bakelie

¹ Vorketuo teiko nu kijüthou kerükriethoko tuoi di, Jihova kiu kijüthou rükrie kijükhruko mho sietatuo. Themiako kru süu vatuo,

² mu seyie kekra vor di sie, “Vorlie, úko Jihova kijüthou gei mu Jakob Kepenuopfü kiu nu vo khe; sitse puoe puo chako pie u pethashütuo, sidi u bu puo chako nu tuo volietuo.” Kekreilamonyü Zion nunu pethakecü partuo, tsiu Jerusalem nunu Jihova dieu partuo.

³ Puoe themia kekra ca chütuo, tsiu kepetse nu seyie kekuo donu theca chüshütuo; ukoe u zhiecha ketsapie kejü chüwatuo, tsiu uko rüngou ketsapie charuo chüwatuo; seyie puoe zhiecha yhapie seyie puo petsoulie lho, morei ukoe terhü do si salie lho;

⁴ derei uko pete rei u thuo u khubebo khro mu u thuo u chiedebo khro batatuo, mu miapuorei uko chü kemide salie lho; kekreilamonyü krodiko Jihova tie thuo pushüwate.

⁵ Kekreilamonyü themia peteko, mia puopuokecü u rhuou za nunu tuotuo, derei we kechachie mu kechachie Jihova úko Kepenuopfü za nunu tuotatuo.

Miadie Kechü Sie Kelalieketuo

⁶ Teisozha sünhie, Jihovae puya, a phiyhomia kengulietuo, siro whuowaketako teshü kengulietuo, tsiu ae pechükeshüko ze vor kengulietuo.

⁷ Siro a phiyhomia lhiepie kebako; mu kelhouwaketako pie seyie kemetei puo chülietuo; sidi tsie yawinu telhekechachie Jihovae Zion kijüthou geinu uko mho kedi chütuo.

⁸ Siro no, he-i tekuokro dahouu, Zion nuopfü kijükhruu, süu n ki vortuo, kerieki mha kekhakecüu vortuo, Jerusalem nuopfü kedi kechüu.

⁹ Tsie no kiüdi kra peto ba ga? N gei kedi ba mo üme? N ketarhomia pekawaketa la, n kechüe thenumia nuonuovachü tuoi n gei vorte me?

¹⁰ He-i Zion nuopfüko, thenumia nuonuovachü tuoi kemezhielie mu meyhumezhieshülie; kekreilamonyü no tsie nadiu nunu pratatuo, sidi vo phouyo nu lhoutatuo; no Babilon nu votatuo. Sünunu n kelalietuo, Jihovae sünu n ngumvümia dzie nunu n rhalietuo.

¹¹ Tsie seyie kekra n petsou di kengu ba, di sie, “Puo perhuwalie, mu u mhipie Zion gei mehoshücie,” siya.

¹² Derei ukoe Jihova keleu si mo; ukoe puo mharhüu si mo, puoe telhakhro sieu nu kezhü tuoi uko kengulietuo.

¹³ Sielie di nyüshücie, he-i Zion nuopfü, kekreilamonyü thegi pie n kia chüwatuo, tsiu mese pie n mou chüwatuo; noe themia kekra vütshie phawatuo, sidi uko meviko chü kemesapie Jihova tsütuo, uko kinyiko pie kijü pete mho Niepuu ki shütuo.