Mika 3 - Angami Naga CL (Re-edited) Bible (BSI)

Kerüzhü Kezhako mu Siedzekesiko

¹ Sitse ae sie; Rünyüliecie, nie Jakob kezhako mu Israel kiu mhokezhako! Nie kethocau si mo me?

² Nie mha kevi ngumecü mu mha kesuou khrieyakezhako, a themia zhü lowayakezhako, tsiu uko ruko gei u chüko lowayakezhako;

³ a themia chü cüyakezhako, uko geinu u zhü lhewaya, uko ruko bietshe phaphawaya, mu uko dathepie gali nu themuo mhie, lido nu themuo mhieshüyakezhako.

⁴ Sidi ukoe Jihova ki chatuo, sirei puo uko pfhekhoshülie lho; süteiki puo uko kinu puo zie kevielietatuo, uko mhatho kesuo chükecü la.

⁵ A themia cha tha kekrüwayakezha siedzekesiko la Jihovae puya, ukoe kecükekrie keba ki “Kezekevi” idi puya, derei mha pie uko me nu shü kemo-u ze terhü chütuoü pesiya.

⁶ Süla süu nieko mhodzüki teizei chütatuo, ziemho sa mo di, tsiu pesikeshü jü di, nie mhodzüki zeitatuo. Siedzekesiko geinu niakiu letatuo, tsiu uko gei teisozhau teimekietatuo;

⁷ siedzekengukoe mengatatuo, tsiu mha pushüyakezhako pie thenga nu shüwatuo; uko pete u tie kegou phretatuo, Ukepenuopfü kinu mhapuorei vor mokecü la.

⁸ Derei a la we, kekuo, Jihova ruopfü mu kethoca, tsiu kemecakemekhro se a tshupfülietuo, Jakob kesuo kechü mu Israel kephouma thashüketuo la.

⁹ Rünyüliecie, nie Jakob kiu kekhakezhako, tsiu Israel kiu krütako, kethoca rütseya, mu kemezhü pete bie kerüpfhiwayakezhako,

¹⁰ thezie pie Zion chükelieko, tsiu kekrükecü pie Jerusalem chükelieko!

¹¹ Sünu kezhako theso lie di capi chüya, puo zievoko puo zha lietuoü pethaya, puo siedzekesiko raka la die puya; sishierei uko Jihova ki pu di, “Jihova u ze ba ketho zo! mha kesuo puorei u gei vorlie lho,” siya.

¹² Süla nieko la Zion pie lie kemhie ciewatuo; Jerusalem pekapie pfhepie zhüwate, mu kiu keba kijüthouu ketsa chütatuo.