Mika 2 - Angami Naga CL (Re-edited) Bible (BSI)

Krotho Kesuo Meliekewa

¹ Themia u zhü geinu kerüzhü le mha kesuo chüyakezhamia we ce, chülietie! Teisotie vorlie ro, uko süu chüya, kekreilamonyü süue uko kekuo nu bakecü la.

² Ukoe lieko mehouya, sidi süko telieya; ki rei, sidi süko chüsetaya; ukoe ki niepumia mu ki, themia tsiu süko kayieko rei pesetaya.

³ Süla Jihovae puya: Tsie, a kikru hau petsou di mha kesuo rhüzhie, sünunu niekoe nie vo kereilie kenjütatuo; tsiu kerüzha di tuolie motatuo; kekreilamonyü süu teisozha kesuo puotatuo.

⁴ Teisozha sünhie uko n pehekecü tsali chütuo, tsiu thekrü chü di kra phituo, sidi sie, “Hie pekaperuowate; Jihovae a themiako kayieu kediwate; kimhie di puo a kinu süu chü kediwa shi! Hie tekelieko donunu hie lieko kezawate.

⁵ Süla Jihova kehou nu miapuorei bu n la dape di therieu rhie lhote.

⁶ “Petha hie,” idi ukoe pethaya, “Mha sikecü uko bu pu hie; thengau u gei vorlie lho,” iya.

⁷ He-i Jakob kiu, mha hau pulie vi me? Jihova shügeshühiekecüu tseita üme? Mha hako puo mhatho me? A dieko kemezhü cha nu ketuomia gei mha kevi chüshüya mo üme?

⁸ Derei nieko ngumvümia tuoi sier a themia petsoute; noe kezevi bakecü donunu, terhü vorketuo pele moto tuokecüko donunu uko pfhenei lhewa.

⁹ A themia thenupfüko u neisieikecü kiko nunu nieko uko whuowate; uko nuonuoko geinu a zapuzayieu kechachie la chüsete.

¹⁰ Sielie di tuotalie; kekreilamonyü haue rüleichü mo, chü perhuwakecüue kemeriekecü kepeka se pekawate.

¹¹ Mhanuü mia puoe meda di kemethuo die pu tuota, sidi sie, “A nieko ki khubezu mu zu kekuo dze pushütuo,” siliro süue themia hako la kepethamia puota zotuo!

Israel Lhiepie Kebako la Phrakeshüu

¹² He-i Jakob, a nieko pete ze la vorshü zotuo, a Israel lhiepie kebako kengu lashü beituo; a nieko kengupie tekuokro tuoi, thukro nha kepejo nu ketuo tuoi lashütuo; uko themiako ze mhapfhe chüshütuo.

¹³ Themia mha bietshebietshashüyakezhau uko mhodzü khotuo; uko pfüpha pratuo sidi kharu nu pratatuo, süu ze pratatuo. Uko kediu uko mhodzünu tuotuo, Jihova uko mho batuo.