Mika 1 - Angami Naga CL (Re-edited) Bible (BSI)

¹ Jihova die Juda kediko Jotham, Ahaz mu Hezekia teiki Moreshet-u Mika ki kevor, sünu puoe Samaria mu Jerusalem la mha ngu.

Samaria Kepetsou Pesikeshü

² Rünyüliecie, nie themia peteko; rünyüliecie, he-i kijüu, tsiu sünu keba pete; sidi Niepuu Jihova bu nie petsoukecü zhapu chüshülie, Niepuu puo kemesa rüsuoki nunu pushü.

³ Kekreilamonyü, harie Jihova puo chüu nunu vorzhie, sidi tsur kijü nu thechü kerükrieko kedewatuo.

⁴ Puo khronu kijüthouko zetatuo, mu razhako mepfhibuoe mi khieki kevo tuoi zhatatuo, tsiu puo he geinu dzü pekrukeshü tuoitatuo.

⁵ Hako pete Jakob kejokemou la, siro Israel kikru kephoumako late. Jakob kejokemoue kikecüpuo ga? Süu Samaria mo üme? Siro Juda thechü kerükrieu kicüpuo ga? Süu Jerusalem mo üme?

⁶ Süla ae Samaria chüpie phouyo nu mha kepupie, khube pelhouketuo lie chüwatuo, a puo ketsieko lapie razha nu shüwatuo, sidi puo mvüdzeko hielashütuo.

⁷ Puo terhuorhi chükelie pete vütshie phawatuo, puo zhakhrükelie pete mi nunu thewatuo, mu puo rhuomiarhi pete ae pekawatuo; kekreilamonyü puo thethenumia zhakhrükelie mhie uko pfhü kengukelie la, mu thethenumia mhakra mhie uko se sükemhie chü latuo.

Juda Nadiu Kepeka

⁸ Hau la a thekrü chü tsiu kratuo; a phithuo mu methuo di tuotuo; a meseruko tuoi ruotuo, tsiu ostrik tuoi ruo tuotatuo.

⁹ Kekreilamonyü puo rüzapfüu chü kemenelie kenjüte, süu Juda nu vorte; süu a themiako kharu nu Jerusalem ketso rei vorte.

¹⁰ Süu pie Gath nu pu hie, kra hie zocie; Bet-leafra nu nyophe nu rütoucie.

¹¹ Nie cha nu volie, Shafir nu kelhouko, methuo mu menga di; Zanan nu kelhouko tuo parlie mote. Beth-ezel krazhie, sidi puoe n yapie kethau n ki nunu khawatuo.

¹² Kekreilamonyü Marot nu kelhouko mha keviu merüsiei vor, sirei Jihova kinu kepekau Jerusalem kharu nu tsurte.

¹³ Lakish nu kelhouko; kier se vo kierbagei gei phaliecie, süu Zion nuopfüko gei keshü kephouma kerieuta zo. Kekreilamonyü Israel kephouma n geinu ngulieketa la.

¹⁴ Süla noe kekhoketa nunu mha methuo khapie Moreshet-gat tsütuo; Israel kediko mhodzüki Akzib kinukoe mia se kedakecü puota zotuo.

¹⁵ Maresha nu kelhouko: kuolieyakezha puo a se la vor nie tsütuo; Israel zayie Adulam nu vortuo.

¹⁶ No tsüpie chütalie mu n tsütha bewaliecie, no khrieyakecü nhicuko la, tsüü tuoi n tsü bu pie tseitalie, kekreilamonyü ukoe n ki nunu miadie chü votakecü la.