Mhasidie 9 - Angami Naga CL (Re-edited) Bible (BSI)

Mhakesiu mu Mhasikemo-u Kemengu

¹ Mhasi-e puo thuo puo ki chüliete, puoe puo kico thenieko pesieliete.

² Puoe puo khurinuoko dukhrilie, puo khubezu pie kereilie, puoe mizhü rei sa keseliete.

³ Puoe nadi nu thechü kerükrieko geinu pheshie mia kieketuo la puo kituopfüko ketseshüte,

⁴ sidi sie, “Miamomia kehoupuorei, rürei hatsa vorliecie!” tsiu mhasimhale kejüu ki puoe sie,

⁵ “Vor di a niekhrüda cülie mu a kereipie keba khubezu krieliecie.

⁶ Mhale tso kemo zhoko khawa, di lhoulie, mu kesikele cha nu tuoliecie.”

⁷ Mhakrenyükecümia pethakecü mia krenyü dzülieya, mu kerüzhümia pethakeshü ki rüzapfülieya.

⁸ Mhakrenyüyakezhamia petha liro, puo n ngumecütatuo; mhakesimia pethashülie sitse puo n khrielietuo.

⁹ Mhakesimia puo pethashücie, sitse puo mhasikuolietuo; kemiathomia puo pethashücie; sitse puo mhasi kechülietuo.

¹⁰ Jihova khrükeprei-e mhasi bode, mu Kemesau sikelie-e mhasi kesouu zo.

¹¹ Kekreilamonyü a geinu n teisozhako chü pekrashütuo, mu no rhei chalietuo.

¹² Noe mhasi üro, mhasi süu n la kevi zo; siro no mia rünyü mota liro, n thuo kemezhielietuo.

¹³ Thenu mhasikemopfüe puo die petoya; puo mhasi jü mu thenga siya mo.

¹⁴ Puoe kikha khieki ba; rüna nu thechü kerükrieko gei ba di,

¹⁵ puoe themia rüverüvü chü u thuo u chau nu vokezhümia kie di,

¹⁶ “Miamomiako, rürei hatsa vorliecie!” Mu kehoupuorei mhasikemoko ki puoe sie,

¹⁷ “Rügukelie dzüe moukeze zo, mu pekhre di niekhrüda cükecüe ketheguo,” iya.

¹⁸ Derei puoe kesia sünu ba ükecü mu puo sokoe Sheol kesouko nu bata ükecü siya mo.