Mhasidie 8 - Angami Naga CL (Re-edited) Bible (BSI)

Mhasi Tshekeshü

¹ Mhasi-e puo thuo shiekhouiya mo üme? Tsiu kesikele-e puo pfhe chü ba mo üme?

² Puoe thechü kerükrieko zü gei baya, chadzako nu thaya;

³ puoe rüna nu kele ki kharuko nu, tsiu kikhako khie kevor ki shiekhoui di.

⁴ “Harie themiako, a nie kieya, mu a pfhe ha themia nuonuoko la ho.

⁵ Harie, miamomiako, mhasi ca siliecie; harie mhalekemoko, nie melou bu tseiphreiliecie.

⁶ Rünyüliecie, kekreilamonyü a mha kevitho dze puya; a tie tiehiekesie ki mha puotoukecüko puya;

⁷ a tie-e ketho-u pu zotuocü la; kerüzhüe a tie nu kerütse zo.

⁸ A me nu dieko pete kemiatho nunu zo, sünu mhapuo nu rei kerüzhakecü morei miarei kemo tuo mo.

⁹ Puocapuola silieyakezhamia mhodzüki we süko pete mecietsuoi zo, mu mhasi mhalelieyakezhamia mhodzüki we süko puotou zo.

¹⁰ Rakachü mo di a kepethadie lieliecie, tsiu suna kevipfü mo di mhasimhale lieliecie;

¹¹ kekreilamonyü mhasi-e cümenyie ki vikuo, mu nie-e mha mehoumenguyakecü pete rei pie puo ze kemejükeliepfü mo.

¹² Ae mhasiu, kemenuou ze lhou baya, sidi mhasi kesa dze pfhü se parlieya.

¹³ Jihova khrükepreie mha kesuou ngumecükelieu zo. Kemiakokecü, kelhiekecü, mha kesuo chau, tsiu die kesuo kepu a ngumecüya.

¹⁴ Ae kepetha mu mhasi puotoukecü ba, ae puocapuola silieyakecü mu kekuo kebau.

¹⁵ A geinu kedimiako di baya, kezhako bu thezho puotoukecü se parlieya,

¹⁶ a geinu kedimia nuonuoko mu pehümiako kijüu kekhase baya.

¹⁷ A a khrieyakezhamia khrieya, tsiu thehiechü a pfhü ketuomia a ngulietuo.

¹⁸ Kinyi mu therhu a gei ba, balieketuo kinyi tsiu kruolieketuo rei sa.

¹⁹ A si vükelieu we suna kevi ki rei vikuo, mu a mhayiekoe rakachü kevipfü ki rei vikuo.

²⁰ Ae kemiatho cha nu voya mu ketho capiko nu tuoya:

²¹ Süusü a khrieyakezhamia bu kinyi ngulieketuo, mu u kinyibouko ketshu chülietuo.

²² Jihovae sietse nu mhachükeshü mhodzü puo thuo puo chau nu a peviese tuote.

²³ Kerieki, sietse nu, morei kijüu chülie kemonu puoe a chüshüwata zo.

²⁴ Thiedzü dzü kesou kejü teiki, thiedzü dzüluo dzü kru par kemonu a chüshüwate.

²⁵ Kijüthou kerükrieko chülie kemonu, kijükhruko rei chülie kemonu a chüliete;

²⁶ puo kijü mu lieko chülie kemonu, morei kijü nu nyophe puorei parlie kemonu.

²⁷ Puoe teiko chükeshü ki, a süki tuota zo, puoe dzü kesou whi vokeshü ki,

²⁸ puoe teigei kimhou chükeshü ki, puoe kesou nu dzüluoko chükeshü ki,

²⁹ puoe dzükezha bu puo die tseta motuoü die khakeshü ki, puoe kijüu bodeko dekeshü ki,

³⁰ süki a puo ze tuo, puo ze mhachüyakezhamia puo tuoi mu teisonhie ae puo keneiu, puo mhodzüki a nei siei vor zo.

³¹ Kijüu ze a nei vor mu a kenei themia nuonuoko gei tuo.

³² “Süla a nuonuoko, tsie a pfhe rünyüliecie; kekreilamonyü a zho zeyakezhamia thejapfülieya.

³³ Kepethadie rünyülie di mhasiliecie, mu süu meliewa hie.

³⁴ A pfhe rünyüyakezhamia, teisonhie a kharu nu pfhe balieyakezhamia, a kicieko vareipfü thayakezhamia theja ngulietuo.

³⁵ Kekreilamonyü a ngukeliemia kerhei ngulieya, mu Jihova khriepfülietuo.

³⁶ Derei a petsouyakezhamia puo thuo puo ruopfü pekawaya, a ngumecüyakezhamia pete kesia khrieya zo.”