Mhasidie 6 - Angami Naga CL (Re-edited) Bible (BSI)

Kemecü mu Kekrükecü nu u Kireilie

¹ A nuo, noe n die pie n zanuou tsüshü, tsiu mia kekreimia la n die phrashü ro,

² n tie nunu pukeshü dieko thuo n malietuo mu no phrakeshü dieko thuo n telietuo.

³ Süla a nuo, hau chü di n kelaliecie, noe n zanuou dzie nu baketa la, rükri vo di n thuo n chü kerünuolie, sidi n zanuou ki n mezhiemeloliecie.

⁴ N mhi bu ze morei rünguta hiecie.

⁵ Chüwhuomia dzie nunu theloue ta pralieyakezha tuoi, rawhuomia dzie nunu perae pruotayakezha tuoi, no n thuo n kelaliecie.

⁶ No mhachü kemecüu, vo nhico rüliko mehocie, di mhasiliecie.

⁷ Puo kepfhemia se mo, puo kezhamia jü, morei puo kekhakecümia jü,

⁸ siürei teile ki puoe kecüca keselieya, mu lieyie teiki puoca kengulieya.

⁹ Harie kemecüu, no kichiepuo zezhü zotieya mu? No kedikechükipuo n keze nunu colietieya ga?

¹⁰ Ze zalielie ba, rüngu zalielie ba, u dzie thepie rülei zalietuoü,

¹¹ sitse mhakejüe kerügumia tuoi n gei vortuo, tsiu tsopfhüu rünyie kesemia mhiei vortuo.

¹² Themia kesuo, kerüzhümia, kerüzhakecü die pu tuoya,

¹³ puoe mhiphrakete, puo phinie kele, puo dziekinuo pie mia tha tuoya;

¹⁴ kerüzhakecü melou se, mha kesuo rhü sei, kezekesuo prushüya.

¹⁵ Süla kemezhieketuo puo gei mhai vortuo; puo bietshebietsha pie chü kemene lalie kenjütatuo.

¹⁶ Mha sorou hako Jihovae ngumecüya, thenieu puo mhodzüki kerütse zo:

¹⁷ Kemiakokecü rhiu, kemeda meü, kejo kejümia zie pekrukecü dzie,

¹⁸ u melou se mha kesuo kerhü, mha kesuo chütuo üta mhai kevo phinie.

¹⁹ Cürü di zhapukechü, mu siezedzürie donu kezekesuo prushüyakezhamia.

Kerüzhüko Kinu u Kireikelie

²⁰ A nuo, n puo diekhakeshüko khapie baliecie, mu n zuo n pethakeshüko khawa hiecie.

²¹ Süko pie n melou nu ba seilie, süko pie n vo nu kelielie.

²² No tuo kevora, süko n cha thalietuo; no ze ketsu ki, süko n rüguolietuo; tsiu no co kesier ki, süko n ze kerüchütuo.

²³ Kekreilamonyü diekhakeshükoe mitubou puo kemhie zo, mu kepetha zhokoe kezie zo; mu ruo di pethakecü dieko themia kelhou zho la;

²⁴ thenu kesuo, mia seyakezhapfü tie nunu n kelalietuo.

²⁵ N nou nu puo zivi menguta hie, morei puo bu puo mhirho üse n ketsiwa hie.

²⁶ Kekreilamonyü niekhrüda yopuo se thethepfü puo zhakhrülie vi; derei süpfüe themia kerheiro puoma kereu pfhüzhüya.

²⁷ Miapuonie puo merü nu mi wepie tuo di süu bu puo pfhenei thewa molie vi me?

²⁸ Morei miapuonie puo phi thewa mo di mizhü ketu gei tuo volie vi me?

²⁹ Sütuoi mia puoe vo puo zanuou kimiapfü ze zhü liro süu pejo motalie lho.

³⁰ Kerügumia puoe khe merü tuota, di rügu cü puo valuo chükelie la zo we mia puo rütsetaya mo.

³¹ Siürei puo telieta ümharo, puoe se thenie sutuo, puo kinu puonyapuora pete pie süu mesetuo.

³² Derei themia kehoupuorei thethenupfü ze pieü kechümia puo kesikele kejümia zo; sikecü chükecümia puo thuo puo ruopfü pekawaya.

³³ Puoe rüzapfülietuo tsiu thethapfütatuo; mu puo thenga krakelieu mhakipuorei rürhielie kenjü.

³⁴ Mianupfunuo puoe puo keropfü puo nou meyie siertuo, mu puo khepu lie kesie nhie puo mia khashülie lho zo.

³⁵ Mha kekra pie sutuoü zorei, puoe süu lielie lho, morei süla puo nei chülie lho.