Mhasidie 5 - Angami Naga CL (Re-edited) Bible (BSI)

Miatho Kemo nunu U Kireilienukecü

¹ A nuo, a mhasidie rünyüliecie, n nyie kedeipie a mhasi caülako rünyüliecie;

² sitse no khrukhre balietuo mu n tie mha kesikele pulietuo.

³ Thethenupfü tie-e mepfhidzü tuoi, tsiu puo me-e tier ki rei meju kuokecü la;

⁴ Sishierei süpfü thelatsa we pfhüpie tsiena tuoi, zhiecha lutsahatsa puoü hekecüpfü tuoi zo.

⁵ Puo phi kesia kitsatie tsuya, puo phichakoe mekhru chau medzi vozhüya.

⁶ Puoe kerhei cha nu leketuo puo khashüya mo, puo chako rüge lutsahatsa va tuoya, süla puo süko silie kenjü.

⁷ Süla nieko nhicuko, tsie a pfhe rünyüliecie, sidi a tie nu dieko therhieta hiecie.

⁸ N cha bu süpfü penuo vo hie, tuo puo kikha penuo vo hie;

⁹ n therhu pie kekreimia tsüwa, mu n teicieko pie u zho kesuomia tsüwa molieketuo la;

¹⁰ sikemomia bu n kinyiko se u kelhuo chü mu n mhathoko pie solhimia vie chüta molieketuo la;

¹¹ n kelhou thelatsa n chü n mo thachü vorketa ki, no meheimelo batatuo,

¹² sidi sie, “Kiüdi a kepetha die mecü mu a meloue ruokeshü die rütsete shi!

¹³ A a kepethako die rünyülie mote, mu a nyieto pie a kepethako tsülie mote.

¹⁴ Ae mechükehou mhodzünu ka tseitaketuo tha nu vorta zo,” ituo.

¹⁵ N thuo n liki dzü krielie, mu n dzükhou nu dzü krukezhüu krieliecie.

¹⁶ N dzüluo bu chazou keza vo, mu rücü dzü bu chadiko nu votuo me?

¹⁷ Süko bu n vie rübei zolie, sikemomia ze keza hie.

¹⁸ N dzüluo bu thejakepfüu chücie, mu khriesaki ze lhoukelie n kimia ze n neiliecie.

¹⁹ Puo bu chüzhiekrü u nei tseikecüpfü mu chüzhiekrü u noumvü sieicüpfü tuoiliecie, puo merü bu puotei pete nu n kenei chülie, mu puo kekhrieu bu n teshü sei bayi.

²⁰ A nuo, kiüdi thenu kekreimia bu n bie kemeze ba ga? siro kiüdi pieüpfü merü ciepie batuo ga?

²¹ Kekreilamonyü themia cha pete Jihova mhiki baya, tsiu puoe n kevo cha pete meho baya.

²² Kerüzhümia u rüzhüko bu u mapfülietuo, mu u kephouma roko thuo puo phalietuo.

²³ Puoe siatuo, kepetha se mo di puo mhale mothorkecü la puo rütsi tuotuo.