Mhasidie 4 - Angami Naga CL (Re-edited) Bible (BSI)

Mhasi Ngukelie Kemevi

¹ Rünyülie, nhicuko, nie puonuo kepetha die, mu puocapuola kesou silietuoü rü terüliecie;

² kekreilamonyü a kepethadie kevi khashüya, a kepetha die lie mvüta hiecie.

³ A a puo nuou chü keba ki, mene, mu a zuo nuo khrieu chü vorcü ki,

⁴ puo a petha di pukecü, “A dieko khapie n nou batsailiecie; a diekhakeshüko chüüze di lhoulie.

⁵ Mhasi pfhüliecie; mhale pesoukelie pfhülie: rükra mo, morei a tie nunu kepar dieko therhieta hie.

⁶ Puo khawa hie, sitse süpfüe n pekruse balietuo; puo khrielie, sitse puo n rüguolietuo.

⁷ Mhasi bode sü hau: Mhasi pfhükelieu zo, no mha kekrei huo ngu salie rei, mhacamhala siliecie.

⁸ Puo se kemeyie secie, sitse süpfüe n chü pezhashütuo, puo ciepielie, puo n bu therhupfülietuo.

⁹ Puo rütso nyie kezivi puo khapie n tsü gei shütuo; puoe thetshetherhu tsüre puo pie n tsütuo.”

¹⁰ Rünyüliecie, a nuo, sidi a dieko lieliecie, sitse no rhei chalietuo.

¹¹ A mhasi cha n pethashüte; a cha kemezhüko nu n cha tha voshüte.

¹² N kevora, n phichako chakha chülie lho; tsiu no tashü zorei, n phi mesülie lho.

¹³ Kepetha die thezetsase balie; puo bu tuota hie; puo se balie; süu n kerheiro zocü la.

¹⁴ Kerüzhümia cha nu tuo hie, tsiu themia kesuo kechümia cha nu vo hie.

¹⁵ Süu therhielie; sünu vo hie; sünunu rüreitalie; sidi tuotalie.

¹⁶ Kekreilamonyü uko mha kesuo chü kemochie zelieya mo; tsiu mia huo bie pesuoshü kemochie zhütsu zelieya mo.

¹⁷ Ukoe kerügekerüzhü ca cü mu zhosuo zu krieyakezha la.

¹⁸ Derei kemiathomia chae niakicha kemhie ziekruoi baya, teiso tseikecüu tsolietuoü zie miemiezhüya.

¹⁹ Kerüzhümia chae teizei kemhie zeiboui zo; süla kicüpuo nunu u phi mesüwaya shikecü rei siya mo.

²⁰ A nuo, a dieko rünyüliecie; n nyieto kedeipie a kepu dieko rünyüliecie.

²¹ Süko bu n mhi therüta hie; süko pie n melou nu shü se balie.

²² Sükoe kerhei mu keshürho khapie die süko ngukeliemia gei shüyakezha la.

²³ N melou se mha kele nu menuolie; süu geinu kelhou metei paryakezha la.

²⁴ N tie bu mha kesuo pu hie, mia se kedakecü die bu n kinu pecietalie.

²⁵ N mhi bu mha meho pechie kemezhü toulie, tsiu n mhi bu n mhodzütsa meho toushülie.

²⁶ N phi se tuoyakezha chau bu mezhülie, sitse n cha pete khrukhrelietuo.

²⁷ Rürei n zatsa morei n vitsa vata hie; mha kesuo nunu n phi shükereiliecie.