Mhasidie 30 - Angami Naga CL (Re-edited) Bible (BSI)

Agur Die

¹ Agur, Jake nuou siedzedie. Themiaue pie Ithiel, tsiu Ithiel mu Ukal ki pushü: He-i Kepenuopfü, a meziete, He-i Kepenuopfü, a meziete. Kimhie di a thalie ta?

² A themia melothorcü puota zo; a themia mhasimhale a gei tuo mo.

³ A mhasi rei silie mo. Morei kemesako kesikele rei a gei tuo mo.

⁴ Supuo teigei sie di la ker ga? Supuo puo duthe nunu teikhrie thezelie ga? Supuo pfhe nunu dzü dzelie ga? Supuo kijü vala ketso chüshü ga? Puo za supuo ga? Mu puo nuou za supuo ga? No puo si tou ze!

⁵ Ukepenuopfü die pete mesa zo; puoe puo gei rüzhükelieko yalieya.

⁶ Puo dieko pe sa hie, moro puo n kerhietuo, mu no kemedamia ücü silietuo.

⁷ A n ki mha kenie chaya; a se mhodzü sünie khashü mvüta hiecie:

⁸ A kinu ketho kemo mu kemeda chü kedeipie kepetse nu shüwacie, kejü morei kenyi rei pie a tsü hie; a la puotoukecü kecüca pie a va chüshücie,

⁹ moro a pevülie tse, n phra mvüta, di sie, “Jihova sü supuo ga?” isita rei silie lhomu, morei mhajüta ro rüguta, di a Kepenuopfü za se thedo chüta rei silie lhomu.

¹⁰ Niepumia ki kituou pejo hie, moro kituou n rüsewa di n bu jotatuomu.

¹¹ Themia huo u puonuo rüse, mu japie u zuonuo tsü kemo huo tuoya.

¹² Themia huo u thuo u mhi ki mesa ütuoya derei u kerhu khrü kemesalie kemo tuoya.

¹³ Themia huo kide u mhi rükrie shi; kidepuo uko mhi perho kerükrie tuoya shi!

¹⁴ Themia huo hue zhiecha, mu huo hue zhietenuo zo, kijü nu mhakejümia, tsiu themia donu ketsopfhümia mezulietuo üdi.

¹⁵ Rüva puo nuopfü kenie ba; sünie sie, “Khashücie, khashücie,” ibaya. Mha se-e mhakipuorei u kelhuo chülieya mo; diau mhakipuorei sie “Vite,” iya mo.

¹⁶ Sheol, nuojüpfü nuobvüu, dzü pie kijüu tshulie kemo, mu miü mhakipuorei sie “Vite,” iya mo.

¹⁷ Umhi pie u puonuo krenyü mu u zuonuo die ze mvüyakezhako, razha nu shüzhako uko medu se par di chürhaüko bu cülietuo.

¹⁸ Mha se-e a la a ngothor zo; diau a silie kenjü:

¹⁹ teimeluo gei tsüü kevo cha, tsiekrie gei tinyhü kevo chau, dzükezha nu rouu kevo chau, mu mia puo rüümiapfü puo ze vokezhü chau.

²⁰ Thenu pieüpfü chae hau we: puo mhacülie, mu puotie süwa, di sie, “A mha kesuo puorei chü mo” isiya.

²¹ Mha se lanu kijüu perüsürüsa ba; diau la süu pfülie kenjü ba:

²² Kituomia puo sier kedi chükelie ki, tsiu mhasikemomia puo kecüca pie puo tshukelie ki,

²³ mia u khrieyakemopfü puo nupfu ngukelie ki, mu kituomiapfü puo sier puo niepupfü ka wekelie ki.

²⁴ Kijü nu mha diae kecükie zo, derei ukoe mhasithor zo:

²⁵ Nhicoe metei kemo doupuo zo, sirei teile ki ukoe kecüca keselieya;

²⁶ konuoe kuo kemo doupuo, sirei tsiekrie geinu uko ki chülieya;

²⁷ kupriepfüe uko kedi jü; sirei uko peteko kekrodepfü tuoya;

²⁸ u dzie pie kipfhenuo telie vi, sirei süue kedimia kiko nu baya.

²⁹ Mha se-e uko kevo phicha ngu vi phi zhü; diau chatuo ngu vi phi:

³⁰ Loshau, khunuo donu kekuotho, mu mhapuo mhodzünu rei tsiesie laya mo.

³¹ Vüdzü puo rhiekerhuu, mvüdo-u, mu kediu puo themiako mhodzü metei kethau.

³² No mhasi mo di, n thuo n tshe tuota üro morei mha kesuo rhü tuota üro, n dzie pie n me keguliecie.

³³ Mithunudzü kerhükeshü ki thunudzükhie parlieya, u nyhüca thekeshü ki thezie parya, mu u noumeyiekecü geinu kegeikecü pesieshüya.