Mhasidie 3 - Angami Naga CL (Re-edited) Bible (BSI)

Dieze Chülienu Tarhokeshü

¹ A nuo, a kepethadie rükra mota hie, sikecüumonyü a diekhakeshüko bu n melou nu balie,

² sitse teisozha tsiu teicie kekra, siro ketshukelhuo n gei vortuo.

³ Diethokecü mu ketho bu n khawa hie; sünie pie n vo nu phapfülie; sünie pie n melou nu thulie.

⁴ Sitse no Ukepenuopfü mu themia mhodzünu pelelie kesü chülietuo.

⁵ N melou pete se Jihova pelelie; tsiu n thuo n mhasi peleta hie.

⁶ N cha pete nu puo sanyülie, sitse puo n chako chü kemezhüshütuo.

⁷ N mhiki n thuo n üse mhasi üta hie; Jihova preilie mu kesuou therhielie.

⁸ Süue n mo keshürho mu n phou chü keshürheishütuo.

⁹ N kebau se Jihova rhulie, tsiu n mhatho si kerieko pete se;

¹⁰ sitse n lhaki tshulietuo, mu n khubezu se n liki tshumezü balietuo.

¹¹ A nuo, Jihovae n pethakecü mecüta hie, morei puo n ruokeshü n nyieta hie;

¹² Jihovae puo khriemia petha kemezhüshüya, miapuonuoe puo nuo puo khrieu pethayakecü tuoi.

Kinyi Ketho

¹³ Mhasi ngukeliemia, mhacamhala lelieyakezhamia kenei theja ngulieya.

¹⁴ Süpfü mhapfhüe rakachü ki rei vikuo, mu puo se kelerko suna ki rei vikuocü la.

¹⁵ Süpfüe cümenyie ki rei rekuo; mu no mengukezha pete pie süpfü ze kemejükeliepfü mo.

¹⁶ Puo dzie puo zatsa rhei kecha ba, tsiu puo vitsa liro kinyi mu therhu ba.

¹⁷ Puo chaüko sü thenou kemvü, mu puo chatseko pete noune zo.

¹⁸ Puo thezekeliemia kerhei seibo puo chülieya; mu puo se bakeliemia u nei siei baya.

¹⁹ Jihovae puo mhasi se kijü chüshü; puo kesikele geinu teiko chülie;

²⁰ Puo mhasi üse kesouko nu dzü bu rüluo parlie, mu kimhoukoe thezei pekrüshü.

²¹ A nuo, hako bu n mhi therhieta hie, mhasimhale kevi tsiu kemenuo se zolie,

²² sitse sükoe n ruopfü la kerhei chülietuo mu n vo gei rütso puo chülietuo.

²³ Sitse no n cha nu khrukhre di tuolietuo, mu n phi mesülie lho.

²⁴ No batsu rei michietalie lho; no rühi zhü tsucü ki ze tshüilietuo.

²⁵ Kemichie mhai kevor prei hie, morei teirükrierükhrie vor kerüzhümia va rei;

²⁶ kekreilamonyü Jihova sü n kethepfuucü la, tsiu n phi bu tetsutalie lho.

²⁷ Kevi pie ngulie kezhümia ketsü kethewa hie, n dzie nu süu chülie kevi kekuo keba ki.

²⁸ No chülie vi ba üro n zanuou ki, “Vo di, sodu nu vorlie, sodu nu khashütuo,” isikecü pu hie.

²⁹ N zanuomia gei mha kesuo rhü hie; puo n pele di n khieki keba la.

³⁰ Mia n gei mha kesuo puorei chü moliro puocapuola jü di mia ze kegei hiecie.

³¹ Mia kemvü kechüko ngu n rota hie, mu puo zho puorei lie hie;

³² kekreilamonyü Jihova mhodzüki kerüpfhimia sü kerütsekecü la, derei kemezhümia gei puo kethepfu baya.

³³ Jihova rüse-e kerüzhümia gei baya, derei puoe japie kemiathomia kebachü nu shüya.

³⁴ Puoe mia krenyüyakezhamia kre baya, derei ngukemezhie pie thenou kerünuoko tsüya.

³⁵ Mhakesimia therhu welietuo, derei kerhanyakecümia thenga seüdzütuo.