Mhasidie 29 - Angami Naga CL (Re-edited) Bible (BSI)

¹ Tsiemelie u pethashü zorei, kenyietota ro, süu bietshewatuo mu chü pevi lalie lhotatuo.

² Kemiathomia kekuo se keba ki, themia u nei baya; derei kerüzhümia dilie tse, themia meheimelo bataya.

³ Mhasi u neiyakezhamia puo puo bu puo neilieya, derei thethenumia ze kepekroyakezhamia puo kinyi pekawaya.

⁴ Kethocau geinu kediue kijüu bu khrukhre balieya, derei mha methuo lielieyakezhamia süu pekawaya.

⁵ Themia puo zanuomia se ketsiyakezhau kebie pethoupie puo thuo puo cha nu kezhü zo.

⁶ Thezho kevarhuomia puo kephouma thuo puo malieya, derei kemiathomia chieli mu u nei baya.

⁷ Kemiathomiae kejümia mezhüu siya; kerüzhümia mhasimhale sikecü jü.

⁸ Mhakrenyüyakezhamiae nadiu petushüya, derei mhakelemiae noupfhünouyie bie kediwaya.

⁹ Mhakesimia puoe mhalekemomia puo ze kegeikemeüta liro, mhasikemo-u nou chü kemeyie mu puo krenyü chü keba zo, sünu noune jü.

¹⁰ Thezie kepekru menguyakezhamia kejo kejümia ngumecüya, mu kemezhümia kerheiro pfhüya.

¹¹ Mhalekemomia puo nouyie pete hielashüya, derei mhakesimia süu kethese balieya.

¹² Mia kekhayakezhamia ketijü die rünyü liro, puo khro kezhako pete themia kesuo chütatuo.

¹³ Mhakejümia mu u peseyakezhako hau nu kemhieya: Jihovae kezie pie unie mhi nu rei shü phre zeru.

¹⁴ Kediue dietho di kejüketsopfhümia zhazhü leya liro, puo kediba kechachie balietuo.

¹⁵ Seiro mu kepetha geinu mhasi ngulieya, derei puo bu puo medo chüketa nuoyoe puo zuo bu mengalieya.

¹⁶ Kelhiemia kekuo seketa ki, kephouma krataya, derei kemiathomia süko tetsuketa ngutuo.

¹⁷ N nuo pethashüliecie, sitse puo kerülei kha n tsütuo; puoe n nou chüpie n bu n neilietuo.

¹⁸ Ziemho ba kemora, themia u kethekerekecü jütaya, derei thezho-u se bakeliemia thejapfülieya.

¹⁹ Diepu rübei di kituomia pethalie kenjü, kekreilamonyü puo silie zorei puo nou khashülie lho.

²⁰ No themia puo die meyhumehe ketuo puo ngu me? Puo ki rei mhasikemomia gei kemerü ba krakuo.

²¹ Mia puoe puo kituou nhicu medzü nu puo nei pete chü puo tsüta ro kenuotsa puo nuo chütatuo.

²² Mehiemeha ketuo themiau kegei pesieshüya, mu themia meyiemehü ketuomia kephouma chü phi tuoya.

²³ Kemiakokecüe mengakelie se vorshüya; derei rünuomenecümiae therhu ngulietuo.

²⁴ Kerügumia ze kedovakezhamia puo thuo puo kelhou ngumecüya; puo rüseu si, derei mhapuorei pu motatuo.

²⁵ Themia kepreie kebie pethouwaya, derei Jihova peleyakezhamia khrukhre baya.

²⁶ Mia kekra rei kezhamia nei chü nyüya, derei Jihova kinu kethoca ngulieya.

²⁷ Miatho kemomia sü kemiathomia mhodzü kerütse zo, derei themia puo cha mezhükezhaue kerüzhüko mhodzüki kerütse zo.