Mhasidie 27 - Angami Naga CL (Re-edited) Bible (BSI)

¹ Sodu la kemelha hie, kekreilamonyü teisozha puoe kedipuo se vortie shi no si kemo la.

² Kekreimia bu n tshelie, n tie bu hie, kekreimia bulie, mu n thuo n tie bu hie.

³ Ketsie-e mesi tsiu huocanyoe puo mesi nyi phi, derei mhalekemomia nouyie-e sünie ki rei mesikuo.

⁴ Noupfhüe puo zho suo, mu nouyie-e kemerie; derei supuonie mia ngu u rokecü mhodzü thalie ta?

⁵ Mhotsou kerhiekecüe pekhre di mia khriekecü ki vikuo.

⁶ Khriethomia puo geinu rüzapfülie zorei puo pelelie vi zo; derei ngumvümia mia mebokeshüe mha sekedokecü zo.

⁷ Pevü kebamia mepfhidzüda zorei cü nyüya mo, derei merü kebamia la mha kepfhü pete rei moutaya.

⁸ Puo kikru khawa di rühou tuoketamiae, pera puo kru khawa di rühou tuoketayo mhie zo.

⁹ Tier mu kethengue thenou chü pemvüshüya, u nou khashü di mia tahitarhokeshü khrietho kevi puoe sü mhie zo.

¹⁰ N khriethomia mu n puo khriethomia khawa hiecie; tsiu no kemezhiekelie nhie n siezedzürie kinu vo hie. Kekreilamonyü n zanuomia n penuo kebau, n siezedzürie kepetse nu ketuou ki vikuokecü la.

¹¹ A nuo, mhasiliecie, di a nou chü pemvüshücie, sitse a a peseyakezhamia die kelalietuo.

¹² Themia kemenuomiae kemichie vorkezhü ngu di puo thuo puo kereilieya; derei miamomia tuo zo phi di kemezhielieya.

¹³ Sikemomia puo zhapu chükeshüu pfhenei pieliecie, mu rüsorünamia puo la puo die phrakeshüu die theze se baliecie.

¹⁴ Mia puo khise sie zilie, mu shiekhoui zo di japie puo zanuomia tsükeshüe, luu la rüsetatuo.

¹⁵ Sezuo ki teirü, mu thenu pfhükekuopfü unie-e kemhie zo.

¹⁶ Hapfü kekhakecüe teikhrie kekhakecü mhie; morei puo dzie puo zatsa nu tier thezetuoü ketha mhie zo.

¹⁷ Thegi pie thegi kerülieya, sütuoi mia puoe puo zemia kelhou kerüshüya.

¹⁸ Chiedebo theke menuo kebamia süu si riecütuo, mu puo niepumia pfhe bakeliemia therhupfülietuo.

¹⁹ Dzü nunu uzie nguliekezha tuoi, themiau meloue themiau thashüya.

²⁰ Mizie mu kepeka chüu mhakipuorei tshulieya mo, sütuoi themia mhi rei mha ngu puo kelhuo chülieya mo.

²¹ Gali-e rakachü la, tsiu miüe suna la, mu mia puoe puo ketshe geinu puo silieya.

²² Mhanuü noe ciekhe nunu kemie pie telha sa mhalekemo-u thushü zo rei, mhalekemoe puo geinu jütalie lho.

²³ N rhiechü n kuoko dze siliecie, mu n kuoko meho menuolie;

²⁴ kekreilamonyü kinyi-e kechachie baya mo; mu keditsüre-e thephou pete gei voya mo.

²⁵ Nhako jüketa ki, nha kesa the la parya, mu kijüthou gei nhako re kengulieya,

²⁶ Tekuokoe u bu puomie se u pfhenei chülieketuo khashütuo, mu temvükoe n lie mau la;

²⁷ tsiu temvü nudzüe n kecüca la, n kinu kecüca la, mu n kituopfüko kese la n ketshukelhuo ngulietuo.