Mhasidie 26 - Angami Naga CL (Re-edited) Bible (BSI)

¹ Teile ki pekrie krükecü mu lieyie teiki teirü tuoi, therhue mhalekemomia vazhüya mo.

² Ciekhrienuo pruo rühou ketuo tuoi, kitienuo pruo ketuo tuoi, puocapuola kejü rüseue mia gei pfülie lho.

³ Kier la seiro, gada me kekhakecü la kero, mu mhasikemomia chie la seiro seya.

⁴ Mhalekemomia khranya ki ze puo die kela hie, no rei puo mhieta rei silie lhomu.

⁵ Mhalekemomia khranya ki ze puo die kelalie, moüro puo thuo puo ü mhasi üta rei silie lhomu.

⁶ Mhalekemomia dzie nunu dielie ketsekeshüe puo thuo puo phi dathewa, mu kepeka krieya.

⁷ Phiyhomia phi-e ketouya kemo mhiei, mhalekemomia me nu mhasidie rei sümhie zo.

⁸ Therhu pie mhasikemomia puo tsükeshüe, tsiedeiro nu ketsie phakewa mhie zo.

⁹ Kemezemia puo dzie nu zohu leketa tuoi mhalekemomia me nu mhasidie-e sümhie zo.

¹⁰ Mha pete chüshükezha Kepenuopfüe mhalekemomia, mu kejo kechümia zha chü phreshüya.

¹¹ Tefüe puo thuo merüpie kezhü nu la kevo tuoi mhalekemomiae puo thuo puo khranya nu la votaya.

¹² No themia puoe puo mhiki puo thuo puo üse mhasiü tuoyakezha puo ngu me? Mhalekemomia puo we süu ki rei kemerü nyikuo.

¹³ Kemecümiae sie, “Cha nu losha tuote! Chaüko nu losha tuote,” ibaya.

¹⁴ Kikhae rüge se puo kekheu gei la votayakezha tuoi, kemecümia rei te puo zhü nu tsu lataya.

¹⁵ Kemecümiae puo dzie pie puo khou nu sepfü di se puo me nu voketuo rei mecüthor baya.

¹⁶ Kemecümia puo thuo puo mhiki, puo üse mhacamhala si di pulieyakezhamia thenie ki rei mhasikuo übaya.

¹⁷ Mia puoe puo nyie puo zha mo zorei, mia kegei keba puo meshüpfükelie-e tefü tuo vokezhü puo nyieto merhashükelie mhie zo.

¹⁸ Kenyamia puoe mitsie mu kesia theü ciekeshü tuoi;

¹⁹ puo zanuomia se kedo di sie, “A keyu chü keba zo!” idi pu kebamia rei sümhie zo.

²⁰ Sei ba mota ro mi mhetaya, mu sieü kechü jüta ro kegeikecü ba sa motaya.

²¹ Thezhü pie mizhü ketu nu keshü tuoi mu sei pie mi nu keshü tuoi, meyiemehü ketuomia kegeikecü chü petushüya.

²² Sieüsielumia diekoe kecüca cü kevi mhie zo, sükoe u nou kesouthoko nu tsuya.

²³ Thenou rhu di die pu keziviketuoe, rakachü dzü pie rünyoli thepie keba mhie zo.

²⁴ Mia ngumecüyakezhamiae puo tie se kethera, mu puo noue mha sekedokecü thuo tshu baya;

²⁵ ngumvümia puo die kezivi pu zorei puo pele hiecie, kekreilamonyü puo noue mha kerütsekecü thenie bakecü la;

²⁶ puo mia ngukemecüu kethedo di kevie se tha rei, mechükehou nunu puo kerüzhü hielashütuo.

²⁷ Kheho thiekezhamia puo thuo te sünu tsutuo, ketsie ketoukeshümia süu rütou la puo ki votuo.

²⁸ Kemeda meüe puo thuo bie kerüzakeshümia ngumecüya, mu mia sekedokecü tie-e kepeka mhatho chüya.