Mhasidie 25 - Angami Naga CL (Re-edited) Bible (BSI)

Kemejükeshü mu Kepetha Die

¹ Solomon mhasidie hako Juda kediu Hezekia themiakoe thu la se parlie.

² Ukepenuopfü therhue mha keviepie bakecüu zo, derei kediko therhue mhako pfhüse kepar-u zo.

³ Teikoe rükriekecü tuoi, mu kijü soukecü tuoi, kediko nou si ketsokeliepfü mo.

⁴ Rakachü nunu puo buoko chüwalie, sitse rükreimia se mhabou chülie kevi parlietuo;

⁵ Kediu mhodzünu kerüzhümia chü setacie, sitse kemiatho geinu puo kedi chülietuo.

⁶ Kediu mhodzünu n thuo n se kerükrie hie; morei kezhamia tha nu tha hie.

⁷ Kekreilamonyü n ki, “Hanu khorlie,” ikecüu we kenuomia mhodzünu n pie kerünuokeshü ki vikuokecü la. N mhi kengu mhiei di,

⁸ dienyaki nu voketuo rhürhüita hiecie, kekreilamonyü n zanuomia n bie kethengashü ro no süsie kedipuo chü salie ta?

⁹ N zanuou ze kebou kebau nnie thuo kepuliecie; tsiu puo dze kepekhreu se mia pesiwa hie;

¹⁰ süu sikelie mia n bie kethengashü reilie vi mu n dze kesuou jülie mota rei si lhomu.

¹¹ Die puo pu toukeshüe rakachü gei suna dzü pie the keba tuoi zo.

¹² Mia die kerünyümia la we, kesimia u kerhiekeshüu suna pienyie kevipfü mhie zo.

¹³ Kedietho dieliemia ketsekeshüe ketsekeshüu la lieyie teiki pekrie kemeku tuoi zo, kekreilamonyü puo niepumia nou chü perheishüyakezha la.

¹⁴ Mia puo mha pie mia tsü morei kemelha tuoya liro süu we teirü sa kemo kimhou mu teikhrie kemhie zo.

¹⁵ Shügeshühiekelie geinu mia kekhayakezhamia hülieya, mu die kemenuoe uru bietshawalie vi.

¹⁶ No mepfhidzü ngulie liro, n mese tou puo cükelie zocie, süu cü keyiewa tse no merü lawatuo.

¹⁷ Tsiekenuo n zanuou ki vo hie, puo n ze puo nyieta di n mecüta rei silie lhomu.

¹⁸ Puo zanuomia gei ketijü zhapu chüyakezhamia seivü, zhiecha morei theütsie kemethepfü kemhie zo.

¹⁹ Kemezhiekecü ki dietho kemomia pelekecüe, u hu suoketa morei phiyhomia tuoi zo.

²⁰ Thenou mesi kebamia ki tsali chükeshüe, kekhrodzü pie rüzapfü nu keshü tuoi zo. Tsiu khunuo pfhe gei baketa morei kelou sei gei baketa tuoi zo, nousuoe themia melou cüwaya.

²¹ N ngumvümia merü tuo ro, niekhrüda pie puo bu cücie; puo terhü tuo ro dzü pie puo bu kriecie;

²² No sishü ro mizhü ketu chüpie puo tsügei pfhekeshü mhietuo mu Jihovae n zhakhra chüshütuo.

²³ Pesotsa teikhrie-e teirü se parshüya, mu sieü kechüe u noukemeyie se vorya.

²⁴ Rhodzürhoprepfü puo ze ki puo nu lhou kebau ki, vo kizü gei puoke yopuo nu kebau we vikuo.

²⁵ Rüna kepetse nu thedze kevi kevor-e, dzü kemeku pie terhüketuomia diekeshü tuoi zo.

²⁶ Kemiathomia puo kerüzhümia mhodzünu tetsuketae, dzüluo krieboketa mu dzükhou perhukewa tuoi zo.

²⁷ Mepfhidzü cüthorkecü vi mo, morei themia u thuo thetshe sie rei thetshe pfhükecü vi mo.

²⁸ Themia puo thuo puo kekhalieya kemomia nadi kaketa mu puo dahouko kejü mhie zo.