Mhasidie 24 - Angami Naga CL (Re-edited) Bible (BSI)

¹ Kerüzhümia ngu n ro hie, morei süko ze kepekroketuo rei mengu hie;

² kekreilamonyü uko noue mha kepeka dze leya, mu uko tie-e mha kesuo kechü dze kepu tuoya.

³ Mhasi se ki chülieya, mu kesikele geinu süu sedeshü;

⁴ mhasi geinu mhama kere mu u kenei kinyiko se vor kiko tshulie.

⁵ Mhakesikelemiae kekuomia ki kuokuo, mu mhakesimiae kuo miemielieya;

⁶ ketahiketarhokecü chatha se di no terhü chütuo, mu ketarho kekra kenyira kuolieya.

⁷ Mhalekemomia la mhasi-e rükriethor; kharuki mechühou nu uko die pu motaya.

⁸ Mha kesuo rhüyakezhau üse kelhiekezhau üdi kietuo.

⁹ Mhalekemomia kelekoe kephouma zo, tsiu mhakrenyüyakezhau mia mhodzüki kerütse zo.

¹⁰ No tsopfhükelie nhie n chamezieta liro, n kekuo keduonuo yopuo zo;

¹¹ mia pesiawatuoü teze voketa ki mu mia dukhriwatuoü dojüse ketha ki, uko kelalie mo di,

¹² noe sie, “Harie, hie süu si mo,” ita liro, thenou mehoyakezhaue süu si lho üme? N ruopfü se kebaue süu nguta lho me? Puo mhatho kheki sü chü u zhakhra chüshü lho üme?

¹³ A nuo, mepfhidzü cücie, süu vicü la, tsiu puodzü zu kepar cükecü n me nu mou.

¹⁴ Mhasi rei n ruopfü la sümhiekecü siliecie; no süu ngulie ro, n siedze puo bate, mu n kemerüu jütalie lho.

¹⁵ Kerüzhümia mhie di kemiathomia petsou di, ta kemiathomia kebachü vatuo üta hie;

¹⁶ kekreilamonyü uko va thenie tetsuta zorei la sielietuo; derei mha kepeka bu kerüzhümia penyüwaya.

¹⁷ N ngumvümia tetsuketa ki n neita hiecie, mu puo phi mesükelie ki n nou bu puo neita hie,

¹⁸ Jihovae süu ngushü di puo nei mota rei silie lhomu; tsiu puo nouyieu puo geinu kedi seta rei si mo.

¹⁹ Kesuomia la rünou mo hie; mu kerüzhümia mehou hie;

²⁰ kekreilamonyü kesuomia siedze jü; kerüzhümia mituu mhetatuo.

²¹ A nuo, Jihova mu kediu preiliecie, unie mia puo die rei ze mota hie;

²² kekreilamonyü kepeka unie kinu mhai sierya, mu supuonie kepeka süu kevor silie vituo ga?

²³ Hako rei mhakesimia pukeshü die: Thecathepi kechü nu u nei si kreiketae vi mo.

²⁴ Kehoupuorei kerüzhüu ki, “Noe mezhü zo” ita ro, themiako puo rüsetatuo, seyieko puo mecütatuo;

²⁵ derei kerüzhümia kerhiekeshümia u kenei ngulietuo, tsiu theja kevi uko gei votuo.

²⁶ Mia die kela toukeshüe puo mebokeshü puo.

²⁷ Chazou n mhatho keselie, n lie nu mha pete dojü tseilie, süsie nu n ki chüliecie.

²⁸ Puocapuola kejü nu n zanuomia kepetsou zhapu khashü hie, mu n tie pie puo se kedo hie.

²⁹ “Puo a gei chükeshü tuoi a puo gei chü lashütuo, puo a gei chükeshü mhie di puo zhadavü lashütuo” ita hie.

³⁰ Ae mhachü kemecüu lie pfüthe vo, kerhanyakecüu khubelie khieki vo;

³¹ mu harie, süu zohuko thuo lhou tshupfü zhü; zozie thuo kijü pete zepfü zhüta, tsiu tsiepfhekroko metsu zhüta.

³² A süu ngukeshü ki mhale menuolie; süu mehoshü di a pethapfülie.

³³ “Ze zalielie ba, rüngu zalielie ba, u dzie thepie rülei zalietuoü,”

³⁴ sitse mhakejüe kerügumia tuoi n gei vortuo, tsiu tsopfhüu rünyie kesemia mhiei vortuo.