Mhasidie 23 - Angami Naga CL (Re-edited) Bible (BSI)

¹ No kezhamia puo ze mhacütuoü ke bakelie ki, kedipuo n mhodzünu ba shiü le menuoshülie,

² no mhacü n medasuoya üro, zhietenuo puo pie n mezha nu shüwalie.

³ No puo kecüca kelheko mehou hiecie, sükoe mha ketsikecü ca zokecü la.

⁴ Mhanyilieketuo la mhachü rükhrerüyi hie, n kekhalieketuo mhasi nyiliecie.

⁵ N mhipie kinyiu mehokeshü ki, süu ba motatuo; süue puoshü chülie di tsüüra tuoi pruo teigei votatuo.

⁶ Meteikrücümia niekhrüda cü hie, puo ca keviko rei mehou hie;

⁷ kekreilamonyü puo nou kedipuo leya shi puoe sümhie zo. Puo n ki pu di, “Mhacümhakrielie” ishüya, derei puo nou se süu pu mo.

⁸ No cükeliekoyo merü lawatuo, sidi puo kethezie dieko pie kemethuo chüwatuo.

⁹ Kenyamia kesi kinu mha pu hiecie, puo n mhasi dieko rütsetaketuo la.

¹⁰ Keriekimia theriethekroko bie kediwa hie, morei merünuomia lieko pra hiecie;

¹¹ Kekreilamonyü uko rhakelieue kuo phicü la; puo uko yapie di n petsoutatuo.

¹² N nou pie kepetha dieu zelie, tsiu n nyie pie mha kele dieko rünyülie.

¹³ Nhicuyo pethakecü n ketheta hie; no seiro pie puo vükeshü nunu puo siatalie lho.

¹⁴ No seiro pie puo vüshü ro no Sheol nunu puo kerheiro kelalietuo.

¹⁵ A nuo, n nou mhasi ücü we, a nou ha zorei puo neilietuo.

¹⁶ N tie-e mha puotoukecüu pukeshü ki a ruopfü rei puo neituo.

¹⁷ N nou bu kephoumamiako ngu puo ro hie, derei teisozha pete Jihova khrükeprei nu baliecie.

¹⁸ N siedze puo ba tou zo, mu n kemerü jütalie lho.

¹⁹ A nuo, rünyülie di mhasiliecie, mu n nou pie chau nu shülie.

²⁰ Zukriebouko, morei themuo kecü khuko donu ba hie;

²¹ kekreilamonyü kemezemia mu kecahuokecümia mhajütatuo, tsiu rüngu mhiemhiekecüe mia bu pfhenyhiepfhekra chü dzietaya.

²² N puo n pelhoukeshüu pfhe rünyülie, mu n zuo tsaketa ki puo rütseta hiecie.

²³ Ketho-u khrülie, mu süu zewa hie; siro mhasi, kepetha mu mhacamhala sikelie rei sa khrülie.

²⁴ Nuo kemiatho-ue puo puo bu puo nei phituo; mhakesi nuo puo lhoukelie la puo puoe puo neituo.

²⁵ N puo n zuo bu u neiliecie, n penuokeshüpfü bu puo neiliecie.

²⁶ A nuo, n nou pie a tsücie, sidi n mhinie bu a chako mehoterüliecie.

²⁷ Thethenupfüe thekhe puo kemhie, mu thenu pieüpfüe thekhe kemere puo kemhie zocü la.

²⁸ Süpfüe sekecümia mhie di pfhe baya, sidi themiako donu mha kesuo kechümia chü pekrashüya.

²⁹ Supuonie meheimelo ba ga? Supuonie thenou suo ba ga? Supuonie keprüli ba ga? Supuonie panyapara ba ga? Supuonie puocapuola kejü nu rüzapfü ba ga? Supuonie puo mhi merie ba ga?

³⁰ Zu khieki ba pechayakezhamia, zu kereikecü pfhüyakezhamia.

³¹ Zu rülemeziepfü keba ki, tehie nu meluo keba ki, süu setepfü keba ki, no meho hie.

³² Kenuotsa süue tinyhü tuoi n medutuo, mu nyhübvü mhitsie tuoi n krowatuo.

³³ N mhi-e mha kemeriekecüko ngutatuo, mu n noue mha kesuoko le partuo.

³⁴ No dzükezha metsuo nu kezhü mhietatuo, morei rou sei tsüle gei kezhü mhietatuo.

³⁵ Noe sie, “Uko a vüwate, derei a vü pesuowa mo; uko a vüshü, derei a nyükecü si mo, kedikechükipuo a colietie shi? A zu krieketuo pfhü satuo,” si batuo.