Mhasidie 22 - Angami Naga CL (Re-edited) Bible (BSI)

¹ Theza kevi-e kinyi kekra ki rei vikuo, tsiu mia khriekepfüe rakachü morei suna ki rei vikuo

² Kenyiu mu kejüu unie kenienie kemhiekecüu ro; Jihovae unie chükeshüu zo.

³ Kemenuomia kemichie ngu di puo thuo puo kereilieya; derei momhicümia tuo zo vo di kemezhielieya.

⁴ U chü kerünuokelie mu Jihova khrüpreikelie zhakhrae kinyi, therhu mu kerhei zo.

⁵ Mia ri nu tuoyakemomia cha nu zohu tsiu kebie dzülieya; themia u thuo u kereikeliemia mha süko ze kepetselietuo.

⁶ Nhicumia bu voketuo chau nu puo dojüshülie, sitse puo phichükelie ki puo süu therhietalie lho.

⁷ Kenyimiae kejümia kekhaya, tsiu mia vie thepukelieu mha pie puo thepukeshüu kituo chütaya.

⁸ Dietho kemo tsia prukeshüu nousuo retuo, mu puo nouyie seiro-u se mhachü salie motatuo.

⁹ Kekhrie mhi kenyimia thejapfütuo, puoe puo kecüca pie kejümia ze kezakecü la.

¹⁰ Mha krekenyüu whuowaliecie, sitse keprülikecü jütatuo, kegeikecü mu huoniehuo pesekecü ba sa motatuo.

¹¹ Thenou kemesa u neiyakezhamia mu mia ngukemezhie die puyakezhamia kediu pie puo khriethomia chülietuo.

¹² Jihova mhi-e mhasimhale la menuo baya, derei puoe dietho kemomia dieko chü pejüwaya.

¹³ Kemecüue sie, “Losha puo chazou ba! Cha nu a tewatie!” iya.

¹⁴ Thethenupfü tie-e thekhe puo zo; Jihova noupfhüu u gei kebamia te sünu tsutuo.

¹⁵ Nhicumia melou nu kenyazho bu phase baya, derei kepetha seiro se puo geinu süu whuopie kepetse nu shüwatuo.

¹⁶ Mhanyi salietuo üdi kejümia peseyakezhamia, morei mha pie kenyimia ketsümia ketsopfhü ngu phre zotuo.

Mhasi Ca Serko

¹⁷ Mhasi dieko: N nyie kedeipie a dieko rünyüliecie, mu n melou pie kepetha die zeliecie;

¹⁸ süko pie n nou balie mu pete se n pfhe n die chülie ro n neilietuo.

¹⁹ N bu kepele pie Jihova gei balieketuo la a thie süko pie no zocüu rei pesipengushüwate ho.

²⁰ A tarhokeshü die, mu mhasimhale ca ser thu n tsü mo üme?

²¹ a kemezhü mu ketho-u thapie n kieshü di, ketsepie n ki keshüko ki n bu ketho touu se uko die kelashülieketuo la.

²² Kejümia vie rügu hie, puo mhajücü la, morei kharuki dienya bau nu kemezhie ketuomia pese hiecie;

²³ Jihova uko yapieketuo la, mu uko pekayakezhako pekawatuo.

²⁴ Themia noupfhünouyie kesuomia ze khrietho chü hie, morei mehiemehakecümia ze kepeza hie;

²⁵ no puo chako silie, di te le kebie nu n mapfülie rei silie lhomu.

²⁶ Thepupfükezhümia la u die khakeshümia, morei u dzie khakeshümia puo chü hiecie.

²⁷ No mhapuorei pie mia suketuo ba mo üro, kiüdi mia bu n kinu n zhü chüsetatuo mu?

²⁸ Thiedzütho theriethekro, nie puonuokoe khapie kezhüko chü kediwa hiecie.

²⁹ No mia huo mhachü si seketuo ngu mo? Puo kedimia lie chütuo, puo miahoumiaruomia lie chü lho.