Mhasidie 2 - Angami Naga CL (Re-edited) Bible (BSI)

Mhasi Kepfhü Zhakhra Kevi

¹ A nuo, mhanuü noe a dieko lielie, mu a diekhakeshüko n nou nu kengu se tuolie üro;

² N nyie kedeipie mhasi rünyülie, tsiu n melou pie mhacamhala silieketuotsa shülie;

³ Ketho zo, mhasimhale mengu di kra zolie, mu puocapuola silieketuo la chashülie üro;

⁴ no rakachü kepfhü tuoi puo pfhü volie, mu keviepie kezhü kinyiko kepfhü tuoi puo pfhü volie üro;

⁵ sitse noe Jihova khrüprei do silietuo, sidi Ukepenuopfü mhasi ngulietuo.

⁶ Kekreilamonyü Jihovae mhasi khashüya; puo tie nunu kesikele tsiu puocapuola sikelie parya.

⁷ Puoe kemezhümia la mhasi puocüu kengupie ba; puoe kemezhümia la pezhü zo.

⁸ Ketho chako rüguose baya, mu puo kepeleko cha pekruse tuoya.

⁹ Sitse noe kemiatho mu kethoca dze, tsiu ketoukecü siro mha kevi cha pete silietuo;

¹⁰ mhasi n melou nu lelietuo, mu mhasi-e n phou la vituo;

¹¹ kemenuoe n rüguose balietuo; mu kesikele thuo n rüguolietuo.

¹² Süu kesuo chau nunu n yalietuo, die kerüpfhi kepuko kinu n kelaketuo,

¹³ kemezhü chau khawa di, kezei nu tuotatuo üketako kinu,

¹⁴ mha kesuo kechü u nei, tsiu kerüpfhi zho u neiyakezhako kinu;

¹⁵ uko chae rüwirüge, mu ukoe chako nu rütsi.

¹⁶ Thenu kerüzhüpfü dzie nunu, puo die vi sekecü pieüpfü ki nunu n kelalieketuo la,

¹⁷ puo rüü ki ze kelhouu khakewa mu pfhekho dieu rükra moketapfü kinu;

¹⁸ puo rüli kesiatsa vaya, mu puo chako mhakhrütsa vaya.

¹⁹ Süpfü ki kevoko miapuorei lalieya mo, morei süko kerhei chau va lalieya mo.

²⁰ Süla kevimia cha nu tuolie, mu kemiathomia chako zelie.

²¹ Kekreilamonyü kemezhümia kijü nu lhoulietuo mu kejo kejümia sünu balieya.

²² Derei kerüzhümia we kijü nunu kelhiwatuo, mu mia peseyakezhamia sünunu puo phewatuo.