Mhasidie 19 - Angami Naga CL (Re-edited) Bible (BSI)

¹ Mhajü zorei diethoketuoue themia puo tie re mu mhalekemo-u ki vikuo.

² Themia shürhei phi tuo rei mhasimhale sa mokecüe vi mo, mu puo phicha rhürhükezhamia cha vajowaya.

³ Puoe kerhanyakecü geinu cha nu kepeka vorya, derei puo noue Jihova pejotaya.

⁴ Kinyi geinu khrietho kekra ze vorshüya, derei kejümiae puo khrietho jüya.

⁵ Ketijü zhapu kechümia siazha ngu motalie lho, mu kemeda kepumia rei süu therhielie kenjü.

⁶ Themia kekra rei kezhamia nei chüketuo pfhüya, mu kehoupuorei mha methuo khapie u ketsüu ze khrietho chülieya.

⁷ Kejümia puo siezedzürie pete puo mecütaya; siüliro puo zemia we kide puo ze kepecietatuo mu? Puo die pu uko whuo voya, derei uko puo khawaya.

⁸ Mhasi ngukeliemia puo thuo puo kelhou khrieya; mu mhakelemia vi kehielietuo.

⁹ Ketijü zhapu kechümia siazha ngu motalie lho, mu kemeda kepumia katatuo.

¹⁰ Kenyamiae lhou u theguo chükecü ze kevazhü mo, süki rei kituomia bu kedimia nuonuo kekhakecü we suokuo.

¹¹ Kesikele u gei ketuomiae u nou meyie mhataya mo, mu puo kevi-e mia puo gei mha kesuo chüshü zorei ngu kemo mhiewaya.

¹² Kediu nouyie-e losha kemeho tuoi, derei puo neiketae nha gei thezei kezhü mhie zo.

¹³ Nuo kekhranyacüue puo puo kepekau zo, tsiu kegei sei bayakezha kimiapfüe teirü po sei keba mhie zo.

¹⁴ Ki mu kinyi-e u puonuo kinu kevor kayie, derei mianupfünuo kevipfüe Jihova kinu vor zo.

¹⁵ Mhachü kemecüe keze kesou nu se vorya, mu kemecüu merü di kemezhietatuo.

¹⁶ Diekhakeshüko se bakeliemia u kerheiro se balieya; derei dieu rütseyakezhamia siatatuo.

¹⁷ Kejümia ngumezhieyakezhau mha pie Jihova thepuya, mu puoe puo mhatho sou ngu tsei latuo.

¹⁸ Kemerü baluokecü nu n nuo pethaliecie; puo krazhü zorei pethakecü khawa hiecie.

¹⁹ Nouyie keremia siazha ngu di kemezhietuo; no puo kelashü üliro, no süu pfü laya.

²⁰ Tarhokeshü die rünyülie mu kepetha die lieliecie, hasie n bu mhasi ngulieketuo la.

²¹ Themia noue mha kekra rhü baya, sishierei Jihova mharhüu rübei thakelie zotuo.

²² Mia pete geinu mengukecüu sü dietho zo thakelieu, mu kejüe kemeda ki vikuo.

²³ Jihova khrükepreie kerhei tsatie zowe; süu ngukeliemia khrukhretatuo; mha kesuo puo gei vorlie lho.

²⁴ Kemecümiae puo dzie pie puo khou nu khrupie baya, se kho puo me rei va mo baya.

²⁵ Mhakrenyüyakezhau vüshücie, sitse miamomia mha kevi silietuo; kesikelemia kerhieshücie, sitse puo mhasi salietuo.

²⁶ U puonuo pesekezhau, tsiu puo zuo whuokewaue thenga krashüya mu thetha se vorya.

²⁷ A nuo, kepethadie kerünyü nunu rüyota hiecie, no mhasimhale dieko rünyülieketuo la.

²⁸ Ketijü zhapu kechüue ketho-u kretaya, mu kerüzhümia me mha kesuo mezulieya.

²⁹ Mhakrenyüyakezhako pejoketuo, mu mhasikemomia chie vüketuo la seiro kesepie bate.