Mhasidie 18 - Angami Naga CL (Re-edited) Bible (BSI)

¹ Miarei nu tuo kemomia puo menguko pfhüketa ki, mha puotoukecü pete petsoutaya.

² Mhalekemomia mhacamhala silieketuo puo neiya mo, derei puo thuo puo keleu we pu zo ba nyüya.

³ Mha kesuou kevor ki, mha krenyükecü rei vorya; mu therhu pejükewa ki thenga sa vorya.

⁴ Themia tie nu diekoe dzübe kesouko mhie, mhasi dzüluoue rücü krukezhü kemhie zo.

⁵ Kerüzhümia yapieketae kekrü, morei kemiathomia mezhü khakewa vi mo.

⁶ Mhasikemomia tie-e kegei se vorya, mu puo me-e kevükecü meshülieya.

⁷ Mhalekemomia me-e puo kepekau zo, mu kebie mhie puo thuo puo tie lanu puo mapfülieya.

⁸ Sieüsielumia diekoe kecüca cü kevi mhie zo; sükoe u nou kesouthoko nu tsuya.

⁹ Mhachü kemecüue kepeka ze siezedzürie zo.

¹⁰ Jihova zae dahou kemetei puo zo, kemiathomia ta sünu vo di u yalieya.

¹¹ Kenyimia kinyi-e puo la nadi kemeteiu, mu dahou kerükrie puo mhie di puo yase balieketuo leya.

¹² Kepeka kevor mhodzü themia meloue kerüzhataya, siro therhu mhodzü u melou rünuoshüya.

¹³ Mia puoe mia die rünyükelie mhodzü mia die kelata ro, süue mhalekemo mu thenga puo zo.

¹⁴ Themiae u kethachükemezie hielieya, derei u ruopfü tseütsaketau supuonie hielie vi ta?

¹⁵ Kemeciemia noue mhasi ngulieya, mu mhakesimia nyie-e mhasimhale pfhüya.

¹⁶ Mha methuo pie mia ketsüu puo la cha khrülieya, mu puo ze vor kezhamia mhodzü shüya.

¹⁷ Mia puoe puo dze pushülie kerieu mezhükecü mhieya, kekreiu vor puo dze pushü kemochie.

¹⁸ Dape di pepikeshüe keprülikecü pejüwaya, mu kebvü keba kekuonie chükho kekreishüya.

¹⁹ U siezemia nei kemo chükewae nadi puo ki rei lielierekuotaya, tsiu unie keprülikecüe kediki puo nu thegiro cakha kemhie unie donu bataya.

²⁰ Mia puoe puo me nu die la puo va tshulietuo; puo tie nu kepar siu se puo kelhuo chülietuo.

²¹ Kesia mu kerheie u meü kekuou gei ba, mu süu u neiyakezhamia süu siko riecütuo.

²² Puo kimia ngukelieu mha kevi puo nguliete, tsiu Jihova khrie pfülieya.

²³ Kejümiae mia ki u mezhiemeloya, derei kenyimiae sokotaya.

²⁴ Mia huo u zemia gei khrietho meviva tuoya, derei khrietho kethoe siezedzürie ki rei kepenuokuo.