Mhasidie 17 - Angami Naga CL (Re-edited) Bible (BSI)

¹ Mha huoyo se di kezevi kebae, kinu thehethehie tshupfü di kegei kebau ki vikuo.

² Kedie mhakesiue kethenga mhatho chüyakezha nuou kekhatuo, mu siezedzürie kayie kezakecü nu u ya rei ngulietuo.

³ Puo khou nunu rakachü lhoya, mi nunu suna thelieya, derei Jihovae u melou dojüya.

⁴ Mha kesuo kechümia kerüzhümia die rünyüya; mu kemedamiae kelhiekecü die rünyüya.

⁵ Mhakejümia kreyakezhaue puo Pelhoukeshüu kengaya; mu mia kemezhiekecü ki puo nei kebau siazha ngu motalie lho.

⁶ Mia tsunuokoe ketsamia tsüla zo, mu u puonuokoe unuonuo zayie zo.

⁷ Die kevi kepue kenyamia vazhü mo, kemeda kepue süki rei kezhamia vazhü mokuo.

⁸ Theso khashüyakezhau mhinguki we theso sü puo la ketsie theguo mhie zo, kehourapuorei süko mhachü khrielieya.

⁹ Miakerhiekengakeshümia puo kejo vakeshü nunu khrietho pelhoulieya, derei keboukecü sie kebou lacümiae khrietho chü khowaya.

¹⁰ Mhakesimiae va puo kerhiekeshü zo rei, mhasikemomia va krie puo vü pethakeshü ki mhale pesoukuolieya.

¹¹ Kesuomiae kegeikecü rübei pfhü tuoya, süla puo zho kesuo dieliemia ketsepie puo petsoutuo.

¹² Puo nuo rüguseketa thega krüpfü ze kesekecü we mhalekemomia puo kekhranyapfü kebau ze kesekecü ki vikuo.

¹³ Kesuo pie kevi pu chükeshüu ki nunu mha kesuo jütalie lho.

¹⁴ Kegei pesiekecü ha dzü phakeshü mhie zo, süla kegeikecü sedeketa mhodzü khawalie.

¹⁵ Kerüzhümia üse mezhüü, mu kemiathomia pejoketa, hanie kenienie rei Jihovae rütseya.

¹⁶ Mhasi khrüketuo la mhalekemomia dzie nu puoma kikecüpuo batuomu, puo noule-e süu ba mo zocü la.

¹⁷ Khriethomia puoe puotei pete nu u khrieya, mu mha kere kekhoyaketuo la siezedzüriemia lhousierya.

¹⁸ Pemo puo zanuomia pie pfüshütuoü puo die phrakeshümia mhale mo zo.

¹⁹ Kephouma puo neiyakezhamia kegeikecü puo neiya; themia puo care chü kerükriekezhamia kepeka meshülieya.

²⁰ Themia puo nou kerüpfhimia vi kehielieya mo, mu puo tie keremia kemezhiekecü nu tetsutaya.

²¹ Mhalekemo nuo puo penuokeliemia nousuo ngulieya, mu nuo mhasi kemo puo sü puo kenei baya mo.

²² Thenou mvü kebae daru kevi puo, derei u dzü kezeie uruko chü pesowaya.

²³ Kerüzhümiae pekhre theso pielie di kethoca chau bie kerüpfhiwaya.

²⁴ Mhacamhala kelemia puo zie kereipie mhasi meholieya, derei mhasikemomia mhi-e kijü thela nu votaya.

²⁵ Nuo mhasikemo-u puo puo bu puo nou kemezhietaya, mu puo penuokeshüpfü bu puo dzüzeitaya.

²⁶ Kemiathomia kemvü chü di u bu siazha kechü vi mo, therhukepfümia rei pechüpenyükecüe kekrü.

²⁷ Puo dieko kethelieyakezhau mhakesimia mu kemenuomiae mhacamhala silieyakezhamia zo.

²⁸ Mhasikemomia zorei kemekrie ba ro, puoü mhakesimia ütaya, mu puotie kethe se bakelie ki, puoü mecie ütatuo.