Mhasidie 16 - Angami Naga CL (Re-edited) Bible (BSI)

Themia Kelhou Zhorüli Dze Mhasidie

¹ U nou se mharhükecü themia gei ba, derei u meü se mia die kelakecü Jihova kinu vorya.

² Mia puoe puo mhiki puo thuo puoü mesa übaya, derei Jihovae süko shükesie mehoya.

³ N mhathoko khapie Jihova ki shülie, sitse n nou keleko chülietuo.

⁴ Jihova mhachükeshü pete puoca nyi di chüshü, themia kerüzhüko zorei kemezhieketuo teisozha puo la.

⁵ Jihovae kelhieyakezha kehoupuorei rütseya; si touliecie, puo bu siazha chü motalie lho.

⁶ Ngukemezhie mu kemiatho üse kejokemou chü kemesalieya, tsiu themia Jihova khrüpreikelie geinu mha kesuo therhielieya.

⁷ Seyie puoe Jihova nei chükelie ki, puoe puo ngumvümia chüpie puo ze kezevilieya.

⁸ Mha huoyo dietho di se kebae miatho mo di mha kekra se keba ki vikuo.

⁹ Themia noue puo cha rhü baya, derei Jihovae puo phichako thashüya.

¹⁰ Mha kevi pepilieyakezhae kedimia tie nu baya, puo tie-e dienya kecükecü ki jotaya mo.

¹¹ Roshükhou puotoukecüe Jihova vie, likhuo nu kemejü tsieko pete-e puo mhatho zo.

¹² Kedimia mha kesuo kechüe kerütse zo, kekreilamonyü kemiatho geinu kedibau sedekelie la.

¹³ Kedimiae kemiatho tie u neiya, mu ukoe die puotou pushüyakezhamia khrieya.

¹⁴ Kediu nouyie sü kesia dieliemia puo zo, derei mhakesimia süu chü kemenewaya.

¹⁵ Kediu puo dzüzie keba gei kerhei ba, mu puo keneie bayie teirü kemhie zo.

¹⁶ Suna ki rei mhasi ngukelie kide vikuo shi! rakachü mo di mhacamhala sikelie kedakelie-e vikuo zo.

¹⁷ Kemezhümia chapfüchaü sü mha kesuo therhiekelieu, puo cha rüguose tuokeliemia puo kelhou pekruse balieya.

¹⁸ Kepeka mhodzü kemiakokecü sierya, mu tetsuketa mhodzü kerüzhakecü sierya.

¹⁹ Mhakejümia ze di u nou rünuo kebau we, kemiakokecümia ze mha vakelie kezakecüu ki vikuo.

²⁰ Mia die rünyülietuoü u khashülieyakezhamia vi kehielietuo, mu Jihova pele kebamia u nei baya.

²¹ U nou mhakesimia üse kemenuomia üya, mu die kevi kepumia mhasi miemielieya.

²² Mhasi u gei ketuomia sü kerhei dzüluo dzükhou puo mhie zo, derei kerhanyakecü sü kenyamia siazha zo.

²³ Mhakesimia meloue puo diepuko se menuolieya, mu mhasi pie ba salieya.

²⁴ U kenei diekoe mepfhida dzü tuoi zo, u ruopfü la mou mu umo la keshürho.

²⁵ Lakipuo cha puo mezhükecü mhie zhüya, derei cha süu thelaue kesia nu kevo chataya.

²⁶ Puo me kevi la mhachümhalieya, puo va kemerüe süu chü keshürheishüya.

²⁷ Kerüzhümia mha kesuo thieya, mu puo diepue u thekecü mi mhie zo.

²⁸ Kerüpfhimia kegeitsia prushüya, mu mia noupuyakezhamia khrietho chü khowaya.

²⁹ Zhosuomiae puo zanuomia shüta ze cha vi kemonu votaya.

³⁰ Themia kemhipfiyakezhamia mharhi kemo rhüya, puoe puo tie wewe di mha kesuo se vorya.

³¹ Tsüpoue thetshe tsüla puo zo, süu kemiatho kelhou nunu ngulieya.

³² U nouchakecümia kekuomia ki rei vikuo, mu puo thuo puo kekhakeliemia nadi puo liekelie ki vikuo.

³³ Dapeshüte, derei mha pepishüketuoe Jihova rübei zo.