Mhasidie 14 - Angami Naga CL (Re-edited) Bible (BSI)

¹ Thenu mhakesipfüe puo thuo puo ki chülieya, derei mhalekemopfüe puo dzie pie süu bierhuowaya.

² Kemiatho cha nu tuoyakezhamia Jihova preiya, derei u mecie kreiyakezhamia puo ngumecüya.

³ Mhalekemomia diepue puo chie la seiro, derei kesimia tie-e süko rüguolieya.

⁴ Thudo kejüra telha baya mo, derei thudo kekuo geinu lieyie kekra vorya.

⁵ Ketho zhapue medalie lho, derei ketijü zhapue medakecü parya.

⁶ Mia krenyüyakezhamia mhasi pfhü rei ngulie lho, derei puocapuola kesimia la we mhasimhale u la rüü phi.

⁷ Mhasikemomia mhodzü nunu tuotaliecie, kekreilamonyü no puo geinu mha kesikele dieko ngulie kelho la.

⁸ Ketseiphreimia mhasi-e puo voketuo cha sikelieu zo, derei kemelomia rhanyae cha tha kekrüshüya.

⁹ Kemelomiae kephouma ruosuo krenyü baya, derei kemezhümia we Ukepenuopfü medo puo neiya.

¹⁰ Themia meloue puo thuo puo noukesuo siya, mu sikemomia puoe puo keneiu se puo ze kezaya mo.

¹¹ Kerüzhümia kiu pekawatuo, derei kemezhümia pfhekiu balietuo.

¹² Mia puo mhodzüki cha puo mezhükecü mhie zhüya, derei cha süu thelaue kesia nu kevo cha zo.

¹³ Nyü keba ki rei thenou kesuo baya, mu kenei thelatsa nousuoya.

¹⁴ U mecie kreicümia puo meda zhakhra ngulieya, mu kevimia puo mhatho kevi zhakhra ngulieya.

¹⁵ Miamomiae mha pete peleya, derei ketseiphreimia puo kevo cha meho menuoya.

¹⁶ Kesimia menuoya di mha kesuou therhieya, derei mhalekemomiae u kekhakerelie mo di meyhutaya.

¹⁷ Themia u nou meyie mhaitayakezhamia kenya mhatho chüya, mu kedodakecümia mia u ngumecüya.

¹⁸ Miamomiae kerhanyacü pie puo rütso chüya, derei kemenuomia mhasi üse puo tsüla chüpfüya.

¹⁹ Kesuomia kevimia mhodzünu nuketsuya, mu kerüzhümia rei kemiathomia careko nu nuketsuya.

²⁰ Zanuomia thuo rei kejümia ngu u neiya mo, derei kenyimia we puo zemia kekra baya.

²¹ Zanuomia ngumecüyakezhamiae kephoumamia zo, derei kejümia ngumezhieyakezhamia u nei baya.

²² Mha kesuo rhüyakezhamia kekrüta mo üme? Mha kevi rhüyakezhamia ngukemezhie mu ketho-u ngulietuo.

²³ Mhachü kemezhiekeshü pete nu kemevi ba phre, derei u tie pie kepu rübei zo we mhajütaya.

²⁴ Kesimia kinyi sü puo tsüla zo, derei kekhranyakecü sü kemelo rütso.

²⁵ Ketho zhapue kerheiro kelashüya, derei ketijü kepumia sü mia kesemia zo.

²⁶ Jihova khrükeprei nu u kepele meteilieya, mu puo nuonuoko rei u keya ngulietuo.

²⁷ Jihova khrüpreikelie-e kerhei dzüluo zo, süu geinu mia puoe kesia bieu therhielietuo.

²⁸ Themia krodi kebae kedimia therhu, derei themia jü liro kedinuou kataya.

²⁹ U nouchakecümia mhasimhale kesou puo gei ba, derei puo nou meyie mhatayakezhamia puo kenya pesishüya.

³⁰ Thenou menekecüe uchü umo kerheiro zo, derei mia ngu u rokecüe uruko bu cietaya.

³¹ Kejümia peseyakezhamia puo Chükeshüu peseya, derei puo rhuyakezhamia kejümia ngumezhieya.

³² Kerüzhümia we puo mhatho kesuo thuo puo shükhrüwaya, derei kemiathomia puo miatho geinu puo keya ngulieya.

³³ Mhasi-e mhakelemia melou nu baya, derei süu kenyako nou bacü siya mo.

³⁴ Kemiathoe seyie puo chü pezhashüya, derei kephoumae kehoupuorei chü kethengashüya.

³⁵ Kituomia mhasi di mhachükeshü geinu kediu nei kralieya, derei puo nouyie-e thenga krashüyakezhau gei voya.