Mhasidie 13 - Angami Naga CL (Re-edited) Bible (BSI)

¹ Nuo mhakesiue kepetha die rünyüya, derei mha krenyüyakezhau puo kerhiekecü die rünyüya mo.

² Themia puo die geinu mha kevi cüükrietuo, derei kejo kechümia mhakeboukecü menguya.

³ Puotie kekhase balieyakezhamia puo kerheiro se balieya, derei puo me mekuo kemeyakeshümia kepeka ngulietuo.

⁴ Mhachü kemecümiae mha lie nyü baya, sirei mhapuorei ngulieya mo, derei keshürheimia nyilietuo.

⁵ Kemiathomiae ketijü mecüya, derei kelhiecümiae menga kemo mu therhu kejü thoko chüya.

⁶ Kemiathoe puo cha nu mezhü tuoyakezhamia rüguose balieya, derei kephoumae kerüzhümia penyüwaya.

⁷ Mia puoe kenyi khrava baya, derei mhapuorei baya mo, kekrei puoe kejü khrava ba, derei kinyi kekra baya.

⁸ Mia puo kerheiro rhalieketuoe puo kinyi zo, derei kejümia gei kedekecü vorya mo.

⁹ Kemiathomia mitue ziekruoi baya, derei kelhiecümia mitu we mhetaya.

¹⁰ Mha rünyü mo kethesükecü geinu kegei vorya, derei tarhokecü die lieyakezhamia gei mhasi ba.

¹¹ Dopuo nu ngukelie kinyi-e tsa miemietatuo, derei rülili di krakelie kinyi-e kra miemielietuo.

¹² U kemerüu ngulie mota ro u nou suotaya, derei u kemenguu ngulie ro süue kerhei seibo puo mhie zo.

¹³ Kehoupuorei dieu rütsekecümia pekawatuo, derei diekhakeshüko rhuyakezhamia u zhakhra ngulietuo.

¹⁴ Kesimia kepetha die-e kerhei dzüluo puo zo, süu kesia ciephrie nunu tapralieketuou zo.

¹⁵ Kele kevi-e mia khrie pfülieya, derei kepele kejümia chae kepeka zo.

¹⁶ Ketseiphreimiae mha pete nu mhasimhale se mhachüya, derei mhalekemo-u puo kenya hielashüya.

¹⁷ Kerüzhü dieliemiae kemezhiekecü kere se vorshüya, derei pelelie kesü dieliemia keshürho se vorya.

¹⁸ Kepetha die lie kemvümiae mhajü mu mengalietuo, derei kepethadie lieyakezhamia therhupfülietuo.

¹⁹ U kemengu ngukelie ki kenei u gei vorya, derei kemeloko we kesuo nunu takelie mecüya.

²⁰ Kesimia zeketuomiae mhasilietuo, derei mhalekemomia zeketuomia gei kepeka vortuo.

²¹ Theruokesuoe kephoumamia whuo tuoya, derei kruokelie pie kemiatho zhakhra chütuo.

²² Kevimiae puo nuosenuoyie la rei kayie khapie tuoya, derei kephoumamia kinyi-e kemiathomia la kengupie keba zo.

²³ Kejümia lie-e kecüca kekra khashülie vi, derei dietho kemoe süu tshosetatuo.

²⁴ Seiro sekemomia u nuonuo ngumecüya, derei u nuonuo khrieyakezhamia uko petha menuolieya.

²⁵ Kemiathomia puo vavü ngulieya, derei kerüzhümia va methuo tuoya.