Mhasidie 12 - Angami Naga CL (Re-edited) Bible (BSI)

¹ Kepetha puo neiyakezhamia kesikele puo neiya, derei puo kerhiekecü mecüyakezhamia kenyamia zo.

² Kevimiae Jihova nei chülieya, derei puoe kesuo rhüyakezhamia pejoya.

³ Mha kesuo geinu khrukhrekecü ngulie lho, derei kemiathomia we phewalie lho.

⁴ Thenu kevipfüe puo nupfu tsüre zo, derei thenga krakeshüpfü sü puo nupfu ru nu cieketa mhie zo.

⁵ Kemiathomia kelekoe puotouya, derei kerüzhümia kepethae mha se penyawaya.

⁶ Kerüzhümia die sü thezie lietuoü lakeba zo, derei kemezhümia die mia kelashüya.

⁷ Kerüzhümia sü kelhouwaya, mu jütaya, derei kemiathomia kiu thalietuo.

⁸ Mharhi kesimia, mia sümia tsheya, derei kerüpfhimia noule miae rütseya.

⁹ Mia thuo puo pese rei kituomia nyikecüe puo thuo puo rhu di mhajü ketuou ki vikuo.

¹⁰ Kemiathomiae puo kiriko se morokesuo siya, derei kelhiecümiae ngukemezhie sü lhiecülhieve.

¹¹ Puo thuo puo lie ciekeliemia puoca puova menhou, derei kemethuokemeruo whuo ketuomia mharhi si mo zo.

¹² Kerüzhümia puotou kemo kinyi mehouya, derei kemiathomia boe puosi vüshüya.

¹³ Kesuomiae puo thuo puo die nunu puo malieya, derei kemiathomiae kemezhiekecü nunu talieya.

¹⁴ Ume nunu kepar siu geinu mha kevi pie u kelhuo chülieya, mu mia puo dzie mhatho kheki sü chü lashü puo tsütuo.

¹⁵ Kemelomia thuo puoü mezhüü baya, derei mhakesimia we tarhokeshü die rünyülieya.

¹⁶ Mhalekemomia nouyie va puo nunu si mhailieya, derei kemenuomiae mia puo kepese die hielieya.

¹⁷ Dietho kepumiae kemiatho thashüya, derei ketijü zhapu khakeshüe mha kese zo.

¹⁸ Die meyhuketae zhiecha pie rhükeshü mhie zo, derei mhakesimia meüe keshürho se vorya.

¹⁹ Kedietho tie-e kechachie tuotuo, derei kemeda meüe dopuo la zo.

²⁰ Mha kesuo kerhümia melou nu kecürü baya, derei mha kevi rhüyakezhamia gei kenei baya.

²¹ Kemiathomia gei mha kesuo vorlie lho, derei kelhiecümia gei mha kesuo thuo tshupfütuo.

²² Jihova mhodzüki kemedamia tie sü kerütse zo, derei dietho di mhachü tuoyakezhamia sü puo neiya.

²³ Kemenuomiae mhasi kevie se tuoya, derei mhasikemomiae u kemelo thashüya.

²⁴ Keshürheimia dzie-e mha kekhatuo, derei kemecümia kemvü chüpie mhachütuo.

²⁵ Thenou kemezhiekecü la thezie pesutaya, derei die kevi-e süu bu thenou mvülieya.

²⁶ Kemiathomiae die kevi se puo zemia ki puya, derei kelhiecümia chae mia se ketsiwaya.

²⁷ Kemecümia puo chügei rei chaya mo, derei keshürheimia kinyi kevi ngulieya.

²⁸ Kemiatho cha nu kerhei ba, mu cha sünu kesia jü.