Mhasidie 11 - Angami Naga CL (Re-edited) Bible (BSI)

¹ Mha kemejü medakecüe Jihova mhodzünu kerütse zo, derei puotoukecü roshükhouu puo neiya.

² Kemiakokecü sie thenga vorya, derei mhasi-e rünuomenekecümia gei baya.

³ Kemezhümia u miatho-u thuo u cha thalietuo, derei kecürümia u thuo u pekawatuo.

⁴ Noupfhünouyie teiki kinyi puo kemevi ba mo, derei miathokecüe kesia nunu kelalieya.

⁵ Kejo kejümia u miatho-u thuo u cha tha kemezhülieya, derei kerüzhümia u thuo u kesuou nu tetsutaya.

⁶ Kemezhümia u miatho-u thuo u kelalietuo, derei kecürümia u kemou thuo u telietuo.

⁷ Kerüzhümia siaketa ki, puo kemerüu kaüjütaya tsiu mezhü kemomia kemerüu kemethuo chütaya.

⁸ Kemiathomia kemezhiekecü nunu u kelalietuo, derei süu sou nu kerüzhümia letaya.

⁹ Themia kesuomia tie-e puo zanuomia pekawaya, derei kesikele geinu kemiathomia kelalietuo.

¹⁰ Kemiathomia puotou chü keba ki rünau u nei baya, mu kerüzhümia kaketa ki, mia nei di shiekhouitaya.

¹¹ Kemezhümia theja la rünau chü kemeyielieya, derei kerüzhümia tie-e süu pekawaya.

¹² Mhasikemomia mia le pecüya, derei kemeciemia zei-ipfü baya.

¹³ Sieüsielu kechümia pekhrese balieya mo, derei pelelie kesümia mha kepekhreko keviese balieya.

¹⁴ Chatha kejüra seyieu tetsutaya, derei rüchümia kekra kenyira khrukhrekecü ba.

¹⁵ Sikemomia puo pupie la die phrakeshümia kemezhielietuo, derei puo diekhashü kemomia mha keprei jü.

¹⁶ Noushünouzhie kenyipfüe therhu ngulieya, derei metekemopfü thenga ngulieya. U khrü kejümia tsameretaya, derei kethepfumia nyitaya.

¹⁷ Mia ngumezhieyakezhamia puo thuo puo la mha kevi ngu lalieya, derei u zhokesuomia puo thuo puo pechülieya.

¹⁸ Kerüzhümia mia seketsikecü zhakhra ngulieya, derei kemiatho prushüyakezhamia zhakhra kevi ngu toulie zotuo.

¹⁹ Kemiatho nu tha kemeteikeliemia rheilietuo, derei mha kesuo whuo kezhümia siata zotuo.

²⁰ U nou keremia Jihovae rütseya, derei cha kemezhü nu ketuomia puoe puo neiya.

²¹ Hau si touliecie, kelhiecümia siazha ngu motalie lho, derei kemiathomia we süu therhielietuo.

²² Mha kevikesuo si kreilieya kemopfüe suna nyie pie thevo nyhüca nu keshü tuoi zo.

²³ Kemiathomia mengue mha kevi rübei pie puo thela chüya, derei kelhiecümia kemerüu we noupfhünouyie zo.

²⁴ Mha methuo se mia tsü mia zayakezhamia nyi miemielieya, mephruomevuo kemomia mhajü miemietatuo.

²⁵ Themia mephruomevuokecüu chü penyishütuo, mu dzü pie mia ketsüu dzü ngutuo.

²⁶ Telha rüwe khapie kebamia mia puo rüsetuo, derei süu zeshüyakezhamia theja ngulietuo.

²⁷ Mha kevi kepfhü nu keshürheimia mia neipfülieya, derei mha kesuo kepfhümia süu ngutaya.

²⁸ U kinyi peleyakezhamia rüwitatuo, derei kemiathomia seinyü kepejo tuoi kruolietuo.

²⁹ Kikru bie kebvükezhamia teikhrie wetuo, mu mhasikemomia kesimia kituo chütuo.

³⁰ Kemiatho si-e kerheibo zo, derei zhosuoe kerhei chüsetaya.

³¹ Kemiatho zhakhra kijü nunu ngulie üro, kerüzhüko mu kephoumako we krathorkuotatie!