Mhasidie 10 - Angami Naga CL (Re-edited) Bible (BSI)

Kemiatho mu Kerüzhü Pie Kemejükeshü

¹ Solomon mhasi dieko. Mhakesi nuoe puo puo bu puo neilieya, derei nuo kenyau puo zuo bu puo nou kemezhietaya.

² Kerüzhümia geinu ngukelie kinyi se mha kevi puorei chülieya mo, derei miathokecüe kesia nunu kelalieya.

³ Niepuue kemiathomia bu katalie lho, derei puoe kerüzhümia menguu chü kelhouwatuo.

⁴ U dzie kethachümia mhajütaya, derei u dzie keshürheimia mhanyilieya.

⁵ Mha kele nuou teile ki mha kengulieya, derei lieyie ki zekezhü nuou thenga kralieya.

⁶ Kemiathomia tsügei theja ba, derei kegeikecüu kerüzhümia me tshupfü tuoya.

⁷ Kemiathomia dze rükrakelie-e theja zo, derei kerüzhümia za we cieürietatuo.

⁸ Mhakesimia meloue diekhakeshüko lielietuo, derei kenya die puyakezhau katatuo.

⁹ Miatho di tuokezhüu khrukhrekecü nu tuo zo, derei cha ze kekrü ketuomiae mia puo silietuo.

¹⁰ Kemhipfhi di mhiphrakete tuoyakezhau mha kesuo se vorya, derei thepfu di mia kerhieshüyakezhau kezekevi se vorya.

¹¹ Kemiathomia me-e kerhei dzükhou puo zo, derei kerüzhümia me-e kegeikecü thuo tshupfü tuoya.

¹² Mia ngukemecü geinu kegei pesieshüya, derei kekhrie-e mha kesuo pete whewaya.

¹³ Mha kesikele tie nunu mhasi ngulieya, derei seiroe kesikele kejümia chie gei shütaya.

¹⁴ Mhakesimiae mhasi khapie balieya, derei mhasikemomia diepue keka penuo baya.

¹⁵ Kenyimia kinyi-e puo la rüna kemeteiu zo; mhakejüe kejümia kepekau zo.

¹⁶ Kemiathomia mhatho zhakhrae kerheitsa voya, kerüzhümia mevikelieu kephoumatsatie voya.

¹⁷ Kepethadie se bayakezhau kerhei chau nu vozhü zo, derei ruo di pethakeshü die lie kemvüu kekrütaya.

¹⁸ Meda di kengukemvü whekewamia, tsiu kemeda die kepumia mhasikemomia zo.

¹⁹ Die kekra kepura kephouma ba motaya mo, derei puotie kekhalieyakezhamiae mhakesimia zo.

²⁰ Kemiathomia meüe rakachü kevipfü tuoi, kerüzhümia noue puoma keduoyo zo.

²¹ Kemiathomia tie-e mia kekra vachüshüya, derei mhasikemomia u mhasimhale kejü la siataya.

²² Jihova thejae mhachü penyishüya, mu puoe thenou kesuo se süu sashüya mo.

²³ Mhalekemomia la mha kesuo kechüe rüzhü puo kemhie zo, derei puocapuola kesimiae mhasi puo neiya.

²⁴ Kerüzhümiae prei kebau puo gei vortuo, derei kemiathomia mengu kebau chüpie puo tsütuo.

²⁵ Teirükrierükhrie voketa tuoi, kerüzhüu ba sa motatuo, derei kemiathomiae kechachie la puobo depie bate.

²⁶ Kekhro pie u hu gei keshü mu mikhu u mhi nu kele tuoi, kemecümiae puo niepuu la sütuoi zo.

²⁷ Jihova khrü kepreimia rhei chalietuo, derei kerüzhümia teicieko chü pedzüwatuo.

²⁸ Kemiathomia kemerüu thenou kemvü nu puo thela chütuo, derei kerüzhümia merü ketuou jütatuo.

²⁹ Kemezhü cha nu tuoyakezhamia la we Jihovae u kekuou zo, derei mha kesuo chüyakezhamia ki we kepeka vortuo.

³⁰ Kemiathomia mhakipuorei bie kediwalie lho, derei kerüzhümia kijü nu lhoulie lho.

³¹ Kemiathomia tie nunu mhasi parya, derei kerüpfhimia meü dathewatuo.

³² Kemiathomia tie-e mha kiu lielie vi shikecü siya, derei kerüzhümia me-e rüpfhikecüu zo.