Mhasidie 1 - Angami Naga CL (Re-edited) Bible (BSI)

¹ David nuou Solomon, Israelmia kediu mhasidie:

Mhasidie Ma Kere

² Themia bu mhasi mu kepethadie silieketuo, tsiu mhacamhala silieketuo la,

³ mhasi siro kepethadie puotou, kemiatho, kethoca, kede mu kemo rhi silieketuo la;

⁴ miamomia bu mha silieketuo, tsiu khriesarüümia bu mhasi mu kevikesuo si kekreilieketuo;

⁵ mhakesimia bu kerünyü nunu mhasi miemielieketuo, mu mhakelemia bu mhasi doko si salieketuo,

⁶ mhasidie tsiu puoca vatshakeshü silieketuo; mhakesimia dieko siro dievi kesouko silieketuo la.

⁷ Jihova khrükepreie mhasi bode zo; sirei mhalekemomiae mhasidie tsiu kepethadie rütseya.

Tarhokeshü mu Kepethadie

⁸ A nuo, n puo n tarhokeshü dieko rünyüliecie, tsiu n zuo kepetha die khawa hiecie;

⁹ kekreilamonyü sükoe n tsügei rütsonyie kezivi tuoi, mu n vo nu pienyie zocü la.

¹⁰ A nuo, kephoumamia n ketsi shierei u pfhekhoshü hie.

¹¹ Mhanuü ukoe sie, “Vorlie, úko thezie pekru khe; úko puocapuola jü zorei pekhre kejo kejüko rü khe;

¹² mekhru tuoi tsiu thekhe nu ketsu tuoi pecho süko perhei mezulie khe.

¹³ We mhanya puoma kere pete ngulietuo, mu vakelie nyako se u kiko tshulietuo.

¹⁴ No rei n khapie hie kro nu shüliecie; úko pete priesabou kerhetuomu” irei,

¹⁵ a nuo, no uko cha nu vo hiecie; n phi chapie uko cha nu shü hie;

¹⁶ kekreilamonyü uko phi-e mha kesuo chatsa voya; tsiu thezie pekrutuoü rhürhü tuoya.

¹⁷ Kebie pethoupie zhü rei kemethuo zo; perau süu ngu keba sie;

¹⁸ derei ukoe u thuo u zie pekruketuo, mu pekhre di u thuo u kerheiro liewaketuo pfhe ba zo.

¹⁹ U medasuo di mha mehoukecümia pete hai di thela chü zotuo; süu thuo u kerheiro chüsetaya.

Mhasi Kepfhü

²⁰ Mhasi-e cha nu shiekhoui zo di, ziekeko nunu shiekhoui tuo zo.

²¹ Kemereitho chüu nunu puoe shieya; nadi khru nu puoe die pu di sie:

²² “Miamoko, nie kichiepuo mhale mo ba zotuo ga? Mia kre zo ba rei nie nei tuo me? Kemeloko kichiepuo mha kesikele mecü batieya ga?

²³ A n kerhie di pethakeshü lecie, a kele rupie nie ki shüya, a dieko pie nie pesishütuo.

²⁴ A nieko kieshü rei nie mvüte, a dzie yhashü rei miapuorei rünyü mo,

²⁵ nieko a kepetha die üse mhathomharo kemo chüwa, tsiu a ruo di pethakecü die puorei lielie mote,

²⁶ süla nie kemezhiekelie ki a rei nyü batatuo; siro kemichie nie gei kevor ki a rei nieko kretatuo,

²⁷ kemichieu khriedi tuoi nie vakecü ki tsiu kepekau khriewhi tuoi nie gei kevor ki, kemezhiekecü tsiu thenou kesuo nie gei kevor nhie.

²⁸ Sitse nie a kietuo, derei a nie khoüshü lho; uko rükri sie a pfhütuo, sirei uko a ngulie lho.

²⁹ Kekreilamonyü uko mhasi ngumecüte, tsiu Jihova khrüprei kedalie mote;

³⁰ ukoe a kepetha die puorei lie mvü mu uko ruokeshü pete rütsete.

³¹ Süla ukoe u mhatho kesuo siu cüükrietuo, mu uko doko se u kelhuo chütatuo.

³² Cha vajokewa thuo miamomia dukhriwatuo, tsiu mhamo icüu thuo mhalekemomia pekawatuo;

³³ derei kehoupuorei a pfhe kerünyümia khrukhre batatuo, mu lhou rüütatuo, kepeka prei lho.”