Mhakechüko 6 - Angami Naga CL (Re-edited) Bible (BSI)

Liethomia Thenie Kedakelie

¹ Pethakelieko kra partazhükecü ki, Grik die kepu Judakoe Ibriko gei panya sierta, kekreilamonyü teisonhie kecükekrie kezakecü nu uko samipfüko rükra motayacü la.

² Süla kerekeniekoe pethakelie kro-u pete kie kengushü di uko ki “Hieko zo we Ukepenuopfü die pie pethakecüu khawa di mizhü geinu chalie chü bataketuo puotou mo.

³ Süla, kezeko, nie thuo nie donu thetshe kepfü mu Ruopfü tsiu mhasi u tshukepfü mia thenie kedalie, hie uko bu chalie süu chülietuo,

⁴ derei hie zowe hie khapie kecha nu mu dieu pie mia kepetha lietho-u nu batatuo.”

⁵ Uko kepuko mia pete u nei phreta, sidi uko Stefan, kepele mu Kemesa Ruopfü bu tshukepfüu, siro Filip, mu Prokora, tsiu Nikanor, Timon, Parmena mu Antiokmia di sier Judamia zho zeketa Nikola, hako kedalie.

⁶ Sidi süko ze apostelko mhodzünu vor thalie di uko bu süko la cha mu u dzie yhapie süko gei shüshü.

⁷ Ukepenuopfü dieu keza miemie vota, mu Jerusalem nu pethakelieko kro-u kra phi sierta, siro zievomia kekra kepeleu dieze chüta.

Stefan Tekelie

⁸ Stefan-e ngukemezhie mu kekuo puo tshupfü di themiako donu ungomhatho mu zasiko chüshü.

⁹ Derei Phreishüwaketamia sinagog (idi kieya) nu tsüphrü chüyakezha Kurinmia, mu Alexandramia, siro kekreimia Kilikia mu Asia nunu kevorko Stefan ze kemeüta.

¹⁰ Sirei puo mhasi mu Ruopfü kekuo se di die kepu la uko puo meülie lhota.

¹¹ Sitse uko pekhre huomia nou chüshü di uko bu sie, “Puo Mosa mu Ukepenuopfü ketha die kepu hie siwe.”

¹² Sidi uko themia kro-u, phichüko mu thezhokepethako ketshüshü di uko bu Stefan teze mechükehouu nu vota.

¹³ Siro uko ketijü zhapumia huo ze vor di, uko bu sie, “Themia hau kemesa chüu mu thezho-u thacü teya mo.

¹⁴ Jisu Nazaret-u thechü hau bierhuowa mu Mosa zhoko ze kevorko chü kediwatuo üdi kepu hie siwe!” ita.

¹⁵ Süki mechükehouu nu keba pete Stefan meho terüpfü ba ru puo zie teigeidieliemia zie tuoi parketa nguta.