Mhakechüko 4 - Angami Naga CL (Re-edited) Bible (BSI)

Pitor mu Johan Unie Mechükehou Mhodzünu Kevo

¹ Pitor mu Johan unie themiako ki die pu ketha nu zievoko mu rüsuoki kepfhe mhokezhau mu Sadukiko unie ki vorta,

² unie-e Jisu geinu kesiamia rheilakesie nyikecü dze pie mia pethaketa la u nou u nei mo phituo.

³ Süla uko unie telie mu süki thevatieketa la unie khapie ba süsienhie tso.

⁴ Derei dieu kesiko themia kekra pelelie; sidi süko le kesie nyie pengou mese.

⁵ Süsienhie uko razou kezhako, phichüko, mu thezhokepethako Jerusalem nu kengulie,

⁶ zievokezhatho-u Ana, Kaifa, Johan mu Alexander, tsiu zievokezhatho-u ze keseyiecü pete.

⁷ Uko kedienie ze vo uko donu thalie tse sie, “Nnie kedipuo kekuo morei kedipuo za se hau chüya ga?” idi ketso.

⁸ Sitse Pitor, Kemesa Ruopfü bu puo tshupfü di uko ki, “Kezhako mu phichüko,

⁹ mhatho kevi chüpie kerünyieu gei keshü mu puo kimhie di shürholiete shicü dze thie hienie ketsoya üro,

¹⁰ nieko pete rei mu Israelmia pete rei si touliecie, tsie haki ketha themia hau shürhokelie ha Jisu Khrista Nazaret-u za kekuo nunu zo, süu niekoe puo goukewau mu kesia nunu Ukepenuopfüe puo chü perheikelieu zo.

¹¹ Jisu hau ‘Ki kechüko, niekoe khakewa tsieu; süu bu kike mvüdze tsieu’ chüliete.

¹² Puo geinu zo kemosie kelakelie kekrei puorei jü, kekreilamonyü u kelalie morokesuo la tei khro chüüphou donu theza kekrei puorei tuo mo.”

¹³ Ukoe Pitor mu Johan unie kethepfu ngushü tsiu unie leshükesimia zo mo siro miaümia zo ükecü silie tse u ngota mu unie hadzü rei Jisu ze tuoya ücü sita.

¹⁴ Shürhokelieu unie khieki thakecü ngukelie ki uko mhapuorei pu pejo salie kenjüta.

¹⁵ Sidi unie bu mechükehouu nunu tuotanuwa, sidi uko thuo uko donunu kerüchü bata.

¹⁶ Uko sie, “Úko themia hanie pie kedipuo chü ro vi ta? Kekreilamonyü Jerusalem nu kelhoumia pete rei unie geinu zasi kemeyie puo chükeshü; we rei süu mo ükecü pulie kenjüte.

¹⁷ Derei hau dze keyie pekrapie mia ki shü sawa kemonu úko unie bu mia ki theza hau pu sa hienu kedewa khe,” sita.

¹⁸ Süla uko unie kielie di unie bu mhakipuorei Jisu zau se pu morei petha sa hienuwata.

¹⁹ Derei Pitor mu Johan unie sie uko ki, “Ukepenuopfü mhodzünu Ukepenuopfü pfhe zekecü ki nieko pfhe zekecüu puotoukuotuo mo kishi, nieko thuo le phicie;

²⁰ kekreilamonyü hie kesi kenguu pu molie kenjü ze.”

²¹ Sidi unie kede sakewa sie, unie bu tuota, unie pechülieketuo ca puorei ngulie kenjüta, kekreilamonyü themiako pete unie mhatho süu la Ukepenuopfü tsheketa la.

²² Siro shürhokelie zasi hau puo geinu chükelieu kelhouzha cie hiedia rei zie saketa la.

Kepeleko Kethepfu Chakecü

²³ Mia unie khashükewa sie, unie la unie kro-u nu vor di zievokezhako mu phichüko unie ki kedipuo pu shicü kezashü.

²⁴ Siro uko süu sikeshü ki, uko pete keze puo chü u pfhephra peto di Ukepenuopfü ki, “Kekuotho Niepuu, tei mu kijü, dzükezha tsiu süko nu ketuo pete chükeshüu,

²⁵ Kemesa Ruopfü geinu no hie puotsau David, n kituou kinu pukeshü, ‘Kiüdi Judakemomia u nou rüpeya ga? Mu themiako kemethuoko medoya ga?

²⁶ Kijü nu kediko u kesese thate, tsiu kezhako keze kengulie di, Niepuu mu Khristau petsou thate.’

²⁷ Ketho zo, Herod mu Pontia Pilat unie rei rüna hau nu Judakemoko mu Israelko ze kehou di n kemesa kituou Jisu, no puo kenhekelieu petsou zo,

²⁸ sidi n dzie mu n mharhü pedzüperie chütuo üdi rhüpie ketuoko chüwa.

²⁹ Tsiu Niepuu, tsie uko mha kechükede kebako mehoshücie, di n kituoko bu thepfu di n dieko pulieketuo chüshücie,

³⁰ n kekuo dzieu yhashü mia chü keshürhoshü mu n kemesa kituou Jisu za nunu zasiko siro u ngoko chülieketuo khashücie.”

³¹ Sidi uko kecha chüshü tse, uko vo kehou kebachüu shü kenieta; süsie uko pete Kemesa Ruopfü u tshupfü tsiu thepfu di Ukepenuopfü die puta.

Kepelemiako Mha Pete Vierhe Chüketa

³² Süki kepeleko krodiu keze nou puo chüta, mu miapuorei puo thuo puo vieü puo vieü mota, derei uko mha pete pie vierhe chüta.

³³ Siro apostelko kuo se di Niepuu Jisu rheilasieketa zhapu chü bata, mu uko pete gei ngukemezhieu thuo tshupfü bata.

³⁴ Süki uko donu ketsopfhümia puorei jüta, kekreilamonyü u ki u lie kenyimia, süko zelie di zekelie mako se vor.

³⁵ Sidi uko süko pie apostelko phi ki khashü, mu mia puopuo tsopfhü le di uko süko kezalietaya.

³⁶ Süki Josef ükecü Saipras nunu penuokelie Levimia puo tuo, apostelko puo üse Barnaba üya (puoca “mia chü kethepfuyakezha nuou”).

³⁷ Puo lie puo zelie, sidi rakau se vor apostelko phi ki shü.