Mhakechüko 28 - Angami Naga CL (Re-edited) Bible (BSI)

Paul Malta nu Kevo

¹ Hieko ta sünu pralie tse, kijü rüchütsokemo süu üse Malta ücü silie.

² Siro sünu keba khenumiako hieko gei vi phishü. Siro teirüta di meku phiketa la uko mi chüpie hieko bu peguo.

³ Süki Paul rei sei khro puo pie vor mi mho shü tha ru mi kele ze tinyhü puo rüka par puo bou reipfülie.

⁴ Süki khenumiako tinyhü hau, puo bou reipfükelie ngushü di sie huoniehuo ki, “Themia hau mia kedukhrimia puo toute, dzükezha nunu puo se kelashü zorei puo bu rheilieketuo theruo we tuo mote,” si.

⁵ Derei puo khunuo süu kegepie mi nu shüwata, mu puo gei mhapuorei mo zo.

⁶ Uko puoe rümie mha zo partaketuo morei tetsu siazhütaketuo le, derei pfhe zo tha rei puo gei mhapuorei kreita mokecü ngu tse, uko kele rüdi lata di, puo üse terhuomia puo üta.

⁷ Siro thechü süu kepenuoki lie kro puo kijü rüchütsokemo sünu rüna peyuu Publio ükecüu lie, puoe puo nei siei di hieko zelie mu zha se hieko puo so chü.

⁸ Süki Publio-nuo puou ruki mu thezie buo di suo phizhü. Paul vo puo la chashü mu puo dzienie pie puo gei shü di puo chü keshürhoshü.

⁹ Mha hau chüketa sie, kijü rüchütsokemo nu kechükenyümiako ze vor mu süko chü keshürholie.

¹⁰ Siro uko mha kekra pie hieko tsü, tsiu hieko rou ze tuo lakeshü ki, hieko rüve la rei se morokesuo pete pie hieko tsü.

Malta nunu Rom nu Vorkelie

¹¹ Siro khrü se sie nu hieko Alexandra nunu vor keba rou puoe puo za Nuobinie üdi thukepfü puo teisei ki vor kijü rüchütsokemo hau nu rülei kebau gei pfülie.

¹² Sidi hieko vor Sarakus tsolie mu zha se sünu bata.

¹³ Süsie hieko rou ze rüwhi vo Rhegium tsolie. Siro süsienhie pekhrotsa nu teikhrie puo rükhrie vorlie, mu hieko bu zha kenie nu Puteoli nu vorlie.

¹⁴ Mu hieko sünu kepelemia huo ba di ngulie ru hieko bu zha thenie uko ze bashünuta. Hai di hieko Rom nu vorlie.

¹⁵ Rom nu keba kepelemiakoe hieko vorkezhü dze silie di Apius Lhithochü mu Rüsoki Seko nu ketso vor di hie zelie. Süko ngushü tse, Paul Ukepenuopfü tshe mu thepfu reilie.

¹⁶ Süsie hieko Rom nu vor tsolie tse, chüpahimia puo bu Paul pfhe baketuou thoü puo bu puo ki krei di balieketuo chüshü.

Paul mu Rom nu Judamia Krütako

¹⁷ Siro zha se sie puoe Judamia krütako kie kengulie. Sidi uko vor kengulie tse puo uko ki, “A kezeko, ae u themia kepetsou morei u puonuo zhoko kepetsou puorei chü mo zo ürei, Jerusalem nunu a telie di a pie Rommia dzie nu shüwate.

¹⁸ Siro uko a ketsokewa sie Rommiako a kha lashüwa nyü sie, kekreilamonyü uko a bu sia kezhü mhatho puorei ngulie mo.

¹⁹ Derei Judako hau chü mvüketa ki a a seyieu pejoketuo puorei ba mo zo ürei, a Kaisar ki a nyie kecüketuo cha molie kenjüta.

²⁰ Hau la a nieko kieshü di nieko ze kerüchüketuo leliete, Israelmia kemerüu la thegiro hau pie a phapfütuo zocü la.”

²¹ Sitse uko sie, “Hieko zowe Judia nunu n dze leshü puorei ngulie mo, siro u kezeko miapuorei thedze hau pukeshü morei n dze pu pesuokecü puorei si mo.

²² Derei hie n kinu n kele puo sishü nyü ba, kekreilamonyü lukihaki themiako hau zeyakezha kro-u dze pu pesuo phi phre tuoketa la.”

Paul Rom nu Zhapu Kechü

²³ Süla uko khunhie puo vor puo ze keseketuo zhau chielie tse sünhie uko themia kekra puo bayakezha kiu nu vorlie. Siru puo khise nu vo theva ketso Ukepenuopfü kedi dze pu menuopie uko kieshü, mu puo uko bu Jisu dze si toulieketuo la Mosa zho-u nunu mu siedzekesiko leshüko nu kepu cako vatsha menuoshü.

²⁴ Siro puo dieko la huomia bu pelelie derei kekreimia huowe pele mota.

²⁵ Sitse uko thuo uko donunu kedierhe mota di tuota, süsie Paul sie mha pu sa di: “Kemesa Ruopfüu thiedzü Isaya siedzekesiu tie nunu nie puonuoko ki pu toupie zhü zo,

²⁶ “ ‘Themia hako ki vo di pushüliecie, nieko kerünyü we rünyütuo, derei mhakipuorei puocapuola silie lho; nieko kemeho we mehotuo, derei mhakipuorei lelie lho.

²⁷ Kekreilamonyü themia hako u melou rüvo tuote, siro u nyie rei kenyiebite, uko mhiko mhimiete, sidi ukoe uko mhipie meho molieketuo la, mu u nyie pie rünyü kelho la, tsiu uko melou pie mha silie mu rüreilie di a bu uko chü keshürhoshü kelho la.’

²⁸ Süla Ukepenuopfü kelakelie dieu khapie Judakemoko ki shüwaketa nieko hau siliecie; uko rünyülie zotuo.”

²⁹ Puo hau pukeshü sie, Judako u thuo u donunu keprüli phi di tuota.

³⁰ Sidi puo ciete kenie puo thuo mia ki nyiekelie puo nu ba, di mia puo ki kevor kheko ze kese,

³¹ siro puo thepfu se di Ukepenuopfü kedi dze pupie mia kie tsiu Niepuu Jisu Khrista dze pie mia petha ba tso mu miapuorei puo kha mo.