Mhakechüko 26 - Angami Naga CL (Re-edited) Bible (BSI)

Paul Agripa Mhodzünu Puo Mezhü Kepu

¹ Agripa sie Paul ki, “N thuo tsie we n mezhü pushülie rei vite.” Sitse Paul puo dzie chasie di puo thuo puo mezhü pukeshü hamhie:

² “Kediu Agripa, a thie n mhodzü nunu Judako a pejoketako pete la a mezhü pushütuo ükecü a nei phi tha,

³ noe Judamia zhoko mu dienyako si pevi phi ba, süla a n bu shügeshühiepfü di a die rünyüshünu chaya.

⁴ “Judamia pete rei a khriesaki nu a kelhou rüli sü si phre, sietsenu a themia donu Jerusalem nunu lhou sier.

⁵ Uko hadzütho nu a rüli si phre ba, ukoe ketho-u putuo üro, ae sietsenu nu uko nanyü nu kepecütho Farisimia puo chü di lhou.

⁶ Mu a tsie haki tha di mia bu a nyie kecütuo üketa ha Ukepenuopfü u puonuoko ki phrakeshüu gei a kemerü baketau la zo,

⁷ mu u seyie kerekeniekoe süu ngulieketuo merü di teizeiteiso u teitsochü Ukepenuopfü rüsuotuoya zo. Mu harie kediu, kemerü hau la Judako a pejo thate!

⁸ Kiüdi nieko haki kebakoe Ukepenuopfü kesiamia chü perheilieya ükecü pelelie kenjüte mu?

⁹ “Ketho, a thuo zorei mha kekra nu Nazaret Jisu petsou sie zo.

¹⁰ Mu sükemhie di a Jerusalem nu chü zo; ae zievokezhako kinu kekuo chalie di kemesako kekra tepie kedie chüwa; mu mia bu süko dukhrikecü ki, a rei a medota zo.

¹¹ A va kekra sinagog nunu uko pechü tsiu uko bu uko kepeleu khawaketuo la thehiechü; mu a süko ngu a nou rüpethorcüpfü uko pechüketuo la uko pfhü mia rünako nu rei vo zo.

Paul Puo Nou Kedikelie Dze Kepu

¹² “Mha hau chüketuo la a zievokezhako ki kekuo mu chülie kevi chalie di Damaska nu kezhü,

¹³ siro kediu, a rüvecha nu khinhieluo niaki ki rei ziekuokecü kezie puo teigei nu tsur a mu a ze ketuoko khie lutsahatsa vata.

¹⁴ Sidi hieko pete te kijü tsuta tse, mhapfhe puo Ibri die nunu ‘Saul, Saul, no kiüdi a pechüpenyüya ga? Seithie mesükecü n thuo n pechü keba zo, idi a ki kepu si.’

¹⁵ Sitse ae sie, ‘Niepuu no supuo ga?’ ishü. Süki Niepuu sie, ‘A Jisu, no puo pechüpenyüyakezhau.

¹⁶ Derei no sielie, di thalie, kekreilamonyü a thie n pengukeshü, n bu a kenguko mu thiesie n bu a nguketuoko zhapu chüketuo la n kedakelie zo.

¹⁷ A n ketsepie n themia mu Judakemomia ki shü zhükecüko dzie nunu n kelashütuo,

¹⁸ n bu uko mhi chü kemhirhopie kezeiu nunu kezieu ngulieketuo mu Satan kekuou dzie nunu rürei Ukepenuopfü kekuou nu vorlie, sidi uko bu u kepeleu pie a gei balie di kephoumako va lalie di chü kemesalieketako donu u tha nyilieketuo la.’

Paul Puo Mhatho Dze Kepu

¹⁹ “Süsie, kediu Agripa, a teigei ziemho dieze chü mvüta mo zo,

²⁰ derei a therieu Damaska nu mu Jerusalem nu süsieu Judia kijü pete nu, tsiu Judakemoko ki rei sa idi uko bu thenou rürei la Ukepenuopfü ki vorlie morokesuo mu thenoukedilieta ükecü u kelhou nunu pie pekieshü morokesuo dze pu pethashüte.

²¹ Mha hauha la Judakoe rüsuokiu nunu a telie di a dukhriwatuo üsie zo.

²² Derei thie ketso Ukepenuopfü a khruohi tuo zocü la, a tsie haki ketha kecümia ki rei kezhamia ki rei zhapu chüzhie, mu siedzekesiko siro Mosae pukeshü chü vorketuo kepuu sie die kekrei puorei pu mo zo;

²³ süu Khrista bu kemezhieketuo, sidi kesiako donunu rheisielie kerieu chü di kezieu pie Judako mu kemoko pesishüketuou zo.”

Paul Agripa Bu Pelelienu Chakecü

²⁴ Hai di puo mezhüko pu ketha nu, Festae shiekhoui di sier, “Paul, no nyate! Leshü phrüthorcü la n chü penyawate,” sita.

²⁵ Derei Paul sie, “Harie, therhukepfütho Festa, a nyata mo! A ketho mu kemecie die puya.

²⁶ Kediu thuo rei mha hako si ba zo, a puo ki a kethechie mo di pu tha zo; sizomonyü die hako puoe si kemo puorei mo zo ükecü a le tou tha zo, hako mia kejüra nu chü mo zocü la.

²⁷ Kediu Agripa, no siedzekesiko peleya mo? No süko peleyacü a si ba.”

²⁸ Sitse Agripa sie Paul üse, “No hai zo di a bu Khristamia chü mhailie thenyüsieya me?”

²⁹ Sitse Paul sie, “Zi rei morei a Ukepenuopfü ki a mezhiemelo kethau sü, n rübei monyü thie a die rünyü keba pete bu rei a khepfü kebau mhieta zo kemosie, a mhie phreta nyü zo,” sita.

³⁰ Sitse kediu sie thata, siro ahng mu Bernikapfü tsiu puo khie kebako pete siethata;

³¹ sidi uko tuoprakezhü ki huoniehuo üse, “Themia hauha sia kezhü morei kedie chü kezhü mhatho puorei chüwa mo zo,” sita.

³² Siro Agripa sie Festa ki, “Themia hauha kediu bu puo nyie kecütuoü chata kemosie puo kha lashüwatalie vi zo.”