Mhakechüko 24 - Angami Naga CL (Re-edited) Bible (BSI)

¹ Zha pengou sie zievokezhatho-u Ananiae phichüko huo mu dienya dze kesimia, Tertula ükecüu ze vor. Sidi uko ahng mhodzünu Paul kepejo dieko pushü.

² Süsie Paul kieshü, mu Tertula puo pejokecü dieko hamhie: “Therhukepfü Felika, n mhasi mu krüta kevi la hie bu puotei kecha mene di lhou vorliete, mu mhachü kesa la morokesuo kekra hie dzevi le di chüshüte.

³ Hieko kehourapuorei tsiu puotei pete nu hau la hie neithor mu n peziethor bawe.

⁴ Derei n tei kha pechawa nyü mo. Siürei noe ngumezhieshü seiyakezha tuoi hieko die huoyo rünyüshünu chaya.

⁵ Themia hau mha kebvü pesuo sekecü puote, puo kijü pete nu Judamia pfükerhü tuoya mu puo Nazari kro-u nu krüta chüya.

⁶ Sizomonyü puo rüsuokiu rei bie perhuwatuoü kesie ki hie puo teliete.

⁷ Derei nyiemhokezhau Lisia hie kemvü chü di vor hie dzie nunu puote zete.

⁸ No n thuo puo ketsoshü ro puo kinu hieko puo pejokecüko pete silietuo.”

⁹ Sitse Judako keze puo chü puo pejo di mha hako pete ketho zo üta.

Felika Mhodzünu Paul Puo Thuo Puo Dze Kepu

¹⁰ Sitse ahng puo bu die punu di puo dzie keleshü, sitse Paul sie: “No teicie kekra seyie hau mho capi chü vorketa silie, süla tsie n mhodzünu a mezhü puketuo tei ngukelie la a nei tha.

¹¹ No rei silietuo, a rüsuotuo üdi Jerusalem nu kekho zha kerekenie zoluo.

¹² Süki rüsuoki nunu a uko ze keprüli ketha miapuorei ngu mo, morei sinagog nu morei nadiu nu shierei a miapuorei pfükerhüshü mo.

¹³ Sizomonyü uko a kepejo die hako ketho zo ükecü puorei zhapu khashülieketuo ba mo.

¹⁴ Derei a n ki hau putuo, a Chau medzi di u puonuoko Kepenuopfü rüsuoya, mu uko süu üse u rülakreiketuo puo üte, siürei a rei thezho-u mu siedzekesiko leshü nu thupie kezhüko pete rei peleyacümia zo.

¹⁵ Ukepenuopfü gei kemerü puo tuo, uko rei kemerü süu tuo zo, süu kemiathoko rei mu kemoko rei rheilakesie nyi zokecüu.

¹⁶ Süla Ukepenuopfü mu themia mhodzü rei a noule bu mecümecie zoketuo a rhiechü tuoya.

¹⁷ Siro a teicie huo sie nu mha pie a seyieu tsüshütuoü mu ruosuo chütuoü khor.

¹⁸ Mu hau chü keba ki, rüsuoki nunu u chü kemesakecü zho-u chü tseikewa sie uko a ngu, süki krodi rei tuo mo mu mha kebvükecü puo rei chü mo.

¹⁹ Derei Asia nunu kevor Judako huo thuo a gei kenya nyü ba ro, uko thuo n mhodzünu vor di a gei kenyacü mese.

²⁰ Moro a mechükehou mhodzünu ketha ki a kedipuo nu kekrüta di ngulie shicü haki kethako bu pulie,

²¹ ae ‘Kesiamia rheilasieketuo pelekecü la thie nieko mhodzünu tha di a ketsozhie süu zo kemo mha kekrei puorei nieko mhodzünu ketha ki pushü mo.’ ”

²² Derei Felikae Chau dze si kemenuolie di süsienu dienya kecütuo üdi sie, “Nyiemhokezhau Lisia bu vorkelie ze a nieko nyie hau pepituo” idi kehou thela chüwa.

²³ Siro puo meho keba kriemhokezhau ki puo bu puo pfhe balienushü, derei puo bu puo medo chülie kevi huo le mu puo kezeko kehoupuo bu rei puo lie kechü kha hienuwata.

Paul Felika mu Drusila Mhodzünu Die Kepu

²⁴ Siro zha huo sie nu Felika puo kimia Drusila, Judapfü ze di vor, sidi puo Paul kelieshü di puo bu Khrista Jisu mu kepele dze pukeshü rünyülie.

²⁵ Derei Paul-e sie kethoca, u kethekerekecü mu u ketsoketuo vorkezhü dzeko pushü tse, Felika michieta di, “Thie lawe tuotalie, a puotei kevi puo nhie n kie lashütuo.”

²⁶ Siro Paul bu raka huo rei pie puo tsüketuo merü di tsiekenuo puo kie di puo ze kerüchüchüya.

²⁷ Cie kenie voketa sie, Porkia Festae, Felika sou nu kezha chülie, mu Felikae Judako nei chü nyü di Paul khapie kedieki nu bawa.