Mhakechüko 23 - Angami Naga CL (Re-edited) Bible (BSI)

¹ Sitse Paul sie mechükehouu meho terü di sie, “A siezedzürieko, thie ha ketso a nou mecümecie di Ukepenuopfü mhodzü lhou vorzhü zo.”

² Sitse zievokezhatho-u Ananiae sie puo khieki kethako bu Paul tie vüshünuta.

³ Süki Paul sie puo ki, “Ukepenuopfü n kepfhüshütuo, no sü nyhü pekrapie keba sozha zo! No cüki ba di thezho-u medzi di a nyie kecütuoü tuo, sirei no thezho-u varhuo di a vünu le?”

⁴ Sitse süki kethako sie, “No Ukepenuopfü zievokezhatho-u zorei prei mo me?” sita.

⁵ Sitse Paul sie, “A kezeko a puo üse zievokezhatho-u ücü si mo; kekreilamonyü, ‘No n mhokezha chüyakezhau gei die kesuo pu suo,’ isi di thupie zhü.”

⁶ Siro Paul-e sünu kebako huo Sadukimia mu huo Farisimia ükecü ngulie tse puo mechükehouu nunu shiekhoui di sie “A kezeko, ae Farisimia mu Farisimia nuonuo zo. Mia bu a ketso ketha haha kesiamia rheilakesie mu siedze puo ba ücü kemerü la zo.”

⁷ Puo die hau pushü mumetha, Farisiko mu Sadukiko kediekreita, sidi kehou biepie kenie chüwa.

⁸ (Kekreilamonyü Sadukiko kesiamia rheilakesie morei teigeidieliemia morei ruopfüko tuo ükecü peleya mo; derei Farisiko we süko pete peleya).

⁹ Sidi uko shie peto miemie sierta tse, Farisiko kro-u nu thezhokepethamia huo siethalie di u rhiechü di sie, “Hie themia hau gei mha kekrükecü puorei ngulie mo! Ruopfü morei teigeidieliemia puo thuo puo rüchü üro kiüta di?”

¹⁰ Siro uko keprüli se sierta tse nyiemhokezhaue mia Paul ciechücierha zowaketuo preita. Süla puo puo chüpahiko bu krodiu nu le Paul ze par di puo ze chüpahiko ba nu votanushü.

¹¹ Süzhü Niepuu vor puo khieki thalie di sie, “No thepfuliecie, no Jerusalem nu a zhapu chükeshü tuoi Rom nu rei a zhapu chüshü morosuo,” sita.

Paul Dukhriwaketuo Rhükecü

¹² Teisolie mu Judako keze kedova di Paul dukhriwa kemochie mhapuorei cüükrielie lhoü rüsewa.

¹³ Keze kedova kebako mia hiedia kezie.

¹⁴ Uko zievokezhako mu phichüko ki vo di sie, “Hieko Paul dukhriwa kemochie mhacümhakrielie lho üdi rüse kere se puo pie hie phase bate.

¹⁵ Süla tsie nieko mu thehouue dielie ketsepie nyiemhokezhau ki shü di Paul dze ketsokega menuo sakuoketuo meviva di puo ketseshünu chashücie. Mu hie puo ker tsolie kemonu puo dukhriwaketuo dojüse thate,” sita.

¹⁶ Derei Paul üpfü nuoue mia puo bieketuo la puo chadze keba silie; süla puoe chüpahiko ba nu vo di Paul ki pushü.

¹⁷ Sitse Paul kriemhokezhako mia puo kielie di puo ki, “Khriesa hayo ze nyiemhokezhau ki voshücie; puo mha huo pie puo ki puketuo bate.”

¹⁸ Sitse kezhau puo ze nyiemhokezhau ki vo di sie, “Kedie chü keba Paul-e a bu khriesa hayo ze n ki vorshünu chate; puo n ki mha huo puketuo baketa la.”

¹⁹ Siru nyiemhokezhau puo dzie teshülie di puo ze puo bouu nu vo di, “No a ki putuoü ketuou kedipuo ga?”

²⁰ Puo sie, “Judako kedova di Paul rüli ketso menuokuo saketuo meviva di sodu puo ze thehouu nu kernukecü chaketuo kepfhekho se bate.

²¹ Derei no uko die ze hiecie, kekreilamonyü uko mia hiedia kezie rüshü di puo chadze batuo üya. Uko Paul dukhriwa kemochie mhacümhakrielie lho üdi rüse reiwate. Uko tsie süu chüketuo la dojüse bate mu uko n die pfhe keba zote.”

²² Sitse nyiemhokezhau khriesayo bu tuota mu puo ki, “No thedze hau pie a pesishü ükecü mia puo ki rei pu hiecie,” siwa.

Paul Ketsepie Felika Ki keshü

²³ Süsie nyiemhokezhau puo khro kezhamia kenie kielie di sie, “Nnie tsiezhü keba thepfü ki chüpahimia krie kenie kierkese chüpahi hiethenie mu rüngou kepie chüpahi krie kenie bu Kaisaria nu voketuo la keselie.

²⁴ Siro Paul bu baketuo la kier rei keseshülie, sidi puo rükhie menuo ze vo kezhau Felika ki shücie.

²⁵ Puoe leshü puo hai di thushü:

²⁶ “Klaudia Lisiae ahng Felika therhukepfüu kelushüya.

²⁷ Judako themia hau telie di puo dukhriwatuoü ketha ki puo Rommia zo ükecü si lalie tse a chüpahimia zelie di tsu puo se kelashü.

²⁸ Uko kedipuo la puo pejote shicü a sishü nyü di puo ze uko mechükehouu nu vor.

²⁹ Siro a sikelie uko puo pejokecü uko thuo u zho dze kro puo la zo; sirei puo sia kesü morei kedie chü kesü puorei puo gei ngulie mo.

³⁰ Siro mia puo dukhriwatuo üdi thedo rhü bata ükecü a pesikeshü ki, a puo ketse mhapie n kishüwaketuo pepilie, di puo pejo kebako ki uko bu dienyau se n mhodzü vorlienu puwate.”

³¹ Süla chüpahikoe uko bu chünukeshü mhie di süzhü Paul ze Antipatri ketso voshü.

³² Süsienhie uko la vorta di kierkeseko bu puo ze chüpahiko ba nu volienushüwa.

³³ Uko puo ze Kaisaria nu vo tsolie tse leshüu pie ahng tsüshü mu Paul ze vo puo mhodzünu shü.

³⁴ Siro puo leshü süu liepie phrü di puo kitsatiepuonu vor shicü ketso ru puo Kilikiamia ücü silie tse,

³⁵ puo sie “N pejokezhako vor tsokelie ze a n die rünyütuo.” Süsie puo puo khapie Herod kediki nu mia bu puo pfhe balienu di diekhashüwa.