Mhakechüko 22 - Angami Naga CL (Re-edited) Bible (BSI)

¹ “Kezeko mu a puonuoko, tsie a kitsa dieu rünyüshücie!”

² Siro puo Ibri die nunu uko ki die puta tse uko kemekrie sakuota. Sitse puo sie:

³ “A Judamia puo zo, Kilikia nu Tars nunu penuolie, derei rüna hau nu Gamaliel dzie nunu u puonuoko zho touu pie a pethapfülie di nieko thie haki kethako mhiei Ukepenuopfü kitsa a rhiechü kesiermia zo.

⁴ Ae Chau medziyakezhako pechü di uko bu kesia ketso rei tuo üsie, sidi thepfu rei thenu rei tepie kedieki nu shü,

⁵ süusü zievokezhatho-u mu mechükehou nu phichüko pete rei a zhapu chülie vi. A uko bu thupie u themia Damaska nu kebako ki keshü leshüko rei ngulie, süla ae sünu vo di themia süko teze vor Jerusalem nunu pechüketuo le tuo zo.

Paul Puo Nou Kedikelie Dze Kepu

⁶ “A Damaska penuo vozhü tse, khinhieluo ki ziekruoicü puo teigei nu tsur a khie lutsahatsa va pezieta.

⁷ Sitse a te kijü tsuta, tsiu mhapfhe puo sie a ki, ‘Saul, Saul! No kiüdi a peseya ga?’ idi kepu si.

⁸ Süki a sie ‘No supuo ga, Niepuu?’ Sitse puo sie a ki, ‘A Nazaret Jisu, no puo peseyakezhau zo,’ sita.

⁹ A ze ketuo themiako rei kezieu we ngu, derei uko a ki mha pukeshü pfheu we si mo.

¹⁰ Sitse a sie, ‘Niepuu, a bu kedipuo chü ta?’ Sitse Niepuu a ki, ‘No sielie di tuo Damaska nu lelie, sitse sünunu n bu chütuo üdi rhüpie ketuoko pete pushütuo ho,’ sita.

¹¹ Kezie süu bu a rüpie mha ngulie mota di a ze ketuoko bu a dzie teshü di Damaska nu le.

¹² “Anania ükecü thezho ze pecü phiyakecü puo ba mu Judamia sünu keba khe rei puo rhu phiyakezha puo,

¹³ a ki vor; mu a khieki thalie di, ‘A siezeu Saul, no mha ngu laliecie.’ Sitse sütei touki a mha ngulie mu puo ngulie.

¹⁴ Ru puo sie, ‘U puonuoko Kepenuopfü n kedapie n bu puo medo silieketuo, tsiu kemiatho-u ngulieketuo mu puo tie nunu kepar puo pfheu rünyütuoü rhüse tuote;

¹⁵ süu n bu themia peteko mhodzünu no si mu nguketako zhapumia puo chülietuo.

¹⁶ Süla no tsie kiüdi pfhe ba zo ga? Sielie, di dzülupfülie mu puo za nu n mezhiemelo di n kephoumako khrüwalie,’ sita.

Judakemomia la Paul Kiekelie

¹⁷ “A Jerusalem nu la tsurta, di rüsuokiu nu kecha chü ba tse, a sie si mo zhüta.

¹⁸ Süki Jisu ngu ru puo a ki, ‘No rükri Jerusalem nunu tuotacie, hanu themiako no a zhapu chükeshü lielie lhotakecü la.’

¹⁹ Sitse a sie, ‘Niepuu, uko a vo di Sinagog kheko nu n kepeleko telie di vü reiwaketa si ba.

²⁰ Siro Stefan n zhapuu zie pekrukeshü ki, a rei a medo zokecü la süki tha di puo kedukhriko pfhenei pfhe tha zo.’

²¹ Sitse puo a ki, ‘Tuoshüliecie, a n ketsepie kepecie nu Judakemoko ki shütuoükezhü la,’ ” silie.

Paul mu Rommia Nyiemhokezhau

²² Ha ketso zowe uko puo die rünyü tha; süsie uko shie u rhiechü di, “Kijü nunu themia haicümia chüwalie. Puo bu lhou tuokecü mese mo,” sita.

²³ Siro uko shiekhoui di u pfhe rhuo kelhouwa di nyophe bie kelhoupie teikhrie nu shü vüta tse,

²⁴ Rommia nyiemhokezhaue Paul ze chüpahiko ba nu lelie mu seiro pie puo vü di Judako kedipuo la puo ngumvü hathede chüte shicü ketsolienuwa.

²⁵ Derei uko kero pie puo phalie di puo vütuo ükesie ki Paul süki kriemhokezhau ki, “Rommia puo zorei puo kejo ngulie kemonu vükecü thezho nyi me?” sita.

²⁶ Sitse kezhau die hau silie tse, vo nyiemhokezhau ki, “No kituoü tha ga? Themia hau Rommia puo zo,” ishü

²⁷ Süla nyiemhokezhau Paul ki vor di, “A ki pushücie, no Rommia zo le.” Sitse puo sie, “U zo.”

²⁸ Süki nyiemhokezhau sie “A we Rommia chükelie raka kekra pie khrü di chülie.” Sitse Paul sie, “A we penuolie tse nunu zo,” sita.

²⁹ Süki puo ketsotuoü kethako tsiesieta; mu nyiemhokezhau Paul üse Rommia ükecü sikelie sie puo thegiro pie puo phakecü la michieta.

Mechükehou nunu Paul Ketsokecü

³⁰ Siro puoe Judako kedipuo tou la Paul pejo ba shicü silie nyüta; süla süsienhie puo Paul phrei lashüwa di zievokezhako mu mechükehouu kehoutuoü kieshü. Süsie puo Paul ze vor puo bu uko mhodzüki thalie.