Mhakechüko 21 - Angami Naga CL (Re-edited) Bible (BSI)

Paul Jerusalem nu Kevo

¹ Sidi uko ze kekhota tse hieko rou geinu, mezhü vo Kos tsolie di süsienhie Rhodes nu volie, siro sünunu Patara nu volie.

² Mu sünunu Foinikia nu kevo rou puo ngulie di hie süu gei sie di tuoshü.

³ Sidi Saipras ngu tse, rouu thu thevitsa va se Siria nu vor di Tur nu pralie, rou nu mha pfüketuoko khapie sünu shüwatuoü tuocü la.

⁴ Sünu pethakelie huo ba di ngulie tse zha thenie uko ze bata mu süki Ruopfüu nunu uko Paul bu Jerusalem nu vo hienuta.

⁵ Derei hieko zhako tseita tse, uko ze kekhota di hieko rüvecha nu va lata. Süki uko pete rei u nupfü u nuonuo sa di hie ze casie pra. Dzükezha khie nu hie khoutou phrelie di kecha chülie,

⁶ di kekhotaketuo die huoniehuo ki puwa. Süsie hieko rou gei pfülie di tuota mu uko la kinu vorta.

⁷ Süsie hieko rüve Tur nunu Tolemai nu volie di kepelemiako kelushü mu hieko zha puo uko ze bata.

⁸ Süsienhie hieko tuo lashü di vor Kaisaria tsolie; sidi hieko vo sünu Filip, dieliekevi kepethau, mia thenieko donu mia puo ru, hieko puo ki vo puo so chü.

⁹ Puo puo nuo rüümia dia ba mu süko siedzedie kepu mhaphruo ba.

¹⁰ Hieko zha huoyo sünu keba ki, Judia nunu Agaba ükecü siedzekesiu vor.

¹¹ Puo hie ki vor di Paul chiephau chüpie puo phi puo dzie phalie di sie, “Kemesa Ruopfüe pucü, ‘Chiepha hau seyakezhau Jerusalem nunu Judako bu puo phalietuo, sidi puo khapie Judakemoko dzie nu shüwatuo,’ ” sita.

¹² Hie hau silie tse, hieko mu kekreiko rei puo bu Jerusalem nu vo hienuta.

¹³ Ru Paul sie, “Nieko kiüdi kra di a nou bie kethachüya ga? Kekreilamonyü a mia bu Jerusalem nunu a phaketuou rübei zomonyü Niepuu Jisu la sia rei shüketuo dojüse tuo zo,” sita.

¹⁴ Siro hieko puo khalie kenjüta tse, sie, “Niepuu bu puo medo-u chüliecie,” sishüwa di kemekrieta.

¹⁵ Sidi zha süko sie, hie hie nyako dojülie di Jerusalem nu voketuo la tuoshü.

¹⁶ Süki Kaisaria nunu pethakeliemia huo sa hieko ze vo hieko bu puo ze baketuo puo za Nason ükecü Saiprasmia puo ki shü, puoe thiedzü nu pethakeliemia chüketa puo.

Paul Jakob Ze Kesekecü

¹⁷ Hieko Jerusalem nu vorlie tse, kepelemiako u nei siei di hie zelie.

¹⁸ Siro süsienhie Paul hieko ze di Jakob ki nu vo; mu sünu phichüko pete rei ba.

¹⁹ Sidi uko kelukeshü sie Ukepenuopfü puo geinu Judakemoko donu mhachükeshüko dze pupie uko kie.

²⁰ Sitse uko süu sikeshü ki, uko Ukepenuopfü tsheta. Süsie uko puo ki, “Harie kezeu, Judamia donu zorei kepelemia nyie kidepuorei parliete shi, mu süko pete rei thezho-u ze pecü phiya.

²¹ Siro no üse Judakemomia kijü nu lhou ketuo Judamiako bu Mosa zho-u khawanu tsiu u nuonuoko zhüre hienu mu Judamia zhoko medzi morei viü pethaya üdi uko pu tuote.

²² Süsie kedipuo chü ro vi ta? No hanu vor tsota ücü uko sitatuo.

²³ Süla hie n ki kepuu chüliecie. Hieko donu mia dia u die phrakeshü ba.

²⁴ No rei uko ze vo n chü kemesawalie mu uko bu u tsü thieketuo la uko zha chüwalie. Siliro mia no üse Mosa zho-u ze tuoya zo ükecü silie di hadzü n dze puketuoko ketho mo ükecü silietuo.

²⁵ Derei Judakemo peleketako lawe, uko ki uko bu kecüca pie terhuorhi rüsuokewa vieko, mu thezie siro kerüchakhrikewa khunuoko cü hienu, mu pierüü kechü nunu u kekhalienukecü hieko pepikelieko leshü thushüwate.”

²⁶ Süla Paul-e themia süko ze di süsienhie puo chü kemesalie di uko ze rüsuoki nu lelie, sidi mia puoe puo ruosuo chüketuo zha kitsuo liro uko chü kemesakecü chü tseilietuo shicü pie pesishü.

Rüsuoki nunu Paul Tekelie

²⁷ Derei zha thenieko tseitatuo üzhü tse, Asia nunu kevor Judako huomia puo rüsuokiu nu keba ngushü di vor themia kro-u pfükerhüshü. Sitse uko vor puo telie,

²⁸ mu shiekhoui di sie, “Kezemia Israelko, vor kekhruohiliecie! Themia hauha lukihaki vo di themiako, u zho-u mu thechü hau ketha die pu mia pethatuoyakezhau we, siro puo tsie rei Grikmia rei ze rüsuokiu nu vor di thechü kemesa hau bie perhuwate.”

²⁹ Kekreilamonyü uko hadzü Trofima ükecü Efesamia puoe puo ze uko rüna nu phere ketuo ngu tse uko Paul üse themia süu ze uko rüsuoki nu vo ükecü leta.

³⁰ Sitse nadiu pete bouübita, sidi themiako ta kewhuo vota. Uko vor Paul telie di rüsuoki nunu puo merhashü ze parlie, sidi rükri kikhako khawa.

³¹ Siro uko puo dukhriwatuoü sieta tse mia dielie ketsepie Rommia chüpahi nyiemhokezhau ki Jerusalem pete kebvü bata üshü.

³² Sitse chüpahi kezhaue kriemhokezhako mu chüpahimia huo ze di ta mhai uko ki tsu. Siru themiako nyiemhokezhau mu chüpahiko ngulie di Paul vü sa mota.

³³ Süki nyiemhokezhau zo phi Paul telie di mia bu thegiro kenie pie puo khelienuwa, sidi puo supuo shicü mu puo kedipuo chüwata shicü ketso.

³⁴ Sitse themia kro-u donu huomia die puo pu mu kekreiko die kekrei puo pu idi shiekhoui bata; süki themia bouübiketa la mhapuorei si kemecielie mota tse puo themiako bu Paul ze chüpahiko ba nu volienuwa.

³⁵ Siro Paul chapra gei khokezhü ki, themia u nei mo di puo khu toutoutacü la chüpahiko bu puo toupie kho morosuota.

³⁶ Themia krodiu puo siemedzi chakhrie shiekhoui di, “Puo dukhriwalie,” ita.

Paul Puo Thuo Puo Dze Kepu

³⁷ Siro Paul ze chüpahiko ba nu letatuo üzhü tse, puo sie nyiemhokezhau ki, “A bu n ki mha huo pulie vituo me?” Sitse nyiemhokezhau sie puo ki, “No Grik die si me?

³⁸ Ki-a, siüro no tsiedoki nu Ijiptmia puo mha kebvüshü di mia kedukhrimia nyie dia taze rayha nu voketau mo me?”

³⁹ Paul sie, “A Judamia zo, Kilikia nu Tars nunu a penuolie, rüna kemeyie puo nu kelhoumia. A bu themiako ki die pushünu a n ki chaya.”

⁴⁰ Süki nyiemhokezhau puo bu die pulie vi üshü tse, Paul chapra gei thalie di puo dzie chasie tse themiako kemekrie zeita ru puo Ibri die nunu die pu di sie: