Mhakechüko 2 - Angami Naga CL (Re-edited) Bible (BSI)

Kemesa Ruopfü Kevor

¹ Pentekost zha vorlieta tse, uko pete keze vo thechü puo nu ba.

² Sitse vapuonu mhapfhe puo teigei nu khriedi mhie vor di uko keba kiu pete tshulieta.

³ Ru mi themia meü kemhiecü keza vo uko mia puopuo gei ba phreta.

⁴ Uko pete Kemesa Ruopfüu u tshupfü di Ruopfüue tsükeshü mhiei die kekreiko nunu mha pu sieta.

⁵ Süki tei khro seyie pete nunu nanyü nu pecü sekecü Judamia vor Jerusalem nu lhou ba.

⁶ Siro mhapfhe hau sikelie ki krodi vor kengulie mu u ngo phita, kekreilamonyü pethakeliekoe uko mia puopuocü ramia die nunu mha pu keba siketa la.

⁷ Sidi u ngo thopfü di sie, “Die pu keba hako pete Galilmia zo mo me?

⁸ Di siliro, kikidi úko pete u thuo u die nunu si phreta ga?

⁹ Parthiamia, Mediamia, Elamitmia, siro Mesopotami-a, Judia mu Kapadokia; Pontu siro Asia nunu kevormia,

¹⁰ huomia Frigia, tsiu Pamfilia, Ijipt mu Kurin kepenuoki Libia nu kebamia, tsiu Rom nunu rüso chü kevor Judamia mu Judamia nanyü zeketako,

¹¹ Kretamia mu Arabmia; u pete u thuo u die nunu Ukepenuopfü mha kezha chükeshü dze rünyü bate.”

¹² Sidi uko pete vapethopfü mu u ngo di sie huoniehuo ki, “Hau kikidi hilieta ga?” sita.

¹³ Derei kekreiko kethekre di, “Uko zu kesa se u tshupfü balie,” isita.

Pitor Kepetha

¹⁴ Derei Pitor kerepuokrüko ze siethalie di die pu puo rhiechü themiako ki, “Judiamiako mu Jerusalem nu kebako, nie hau siliecie, mu a kepuko rünyülie.

¹⁵ Hako nieko noule tuoi meze ba mo; tsie khise keba thepfü zoluo.

¹⁶ Derei hau dze thiedzü siedzekesiu Joel bu pupie kezhü:

¹⁷ “ ‘Ukepenuopfüe puya, vo teisozha thelatsa, a a Ruopfü rupie themia pete gei shüshütuo, siro nie nuonuo thepfu rei thenu rei siedzedie putuo, mu nie khriesako ziemho ngutuo, nie donu ketsako u mho pematuo.

¹⁸ Siro sütei ki, a a Ruopfü rupie, a kituo thepfu gei rei thenu gei rei shütuo, mu uko siedzedie putuo.

¹⁹ Tsiu a tei peso geinu u ngo zokecü, mu tei khro kijü nu zasiko, thezie, tsiu mi, siro mikhu mhoutsa, pekieshütuo.

²⁰ Niepuu teisozha kezha, tsiu zayie chü kevor mhodzü, niaki zeide-itatuo, mu khrü thezie mevitatuo.

²¹ Siro kehoupuorei Niepuu za kiekelieu kelalietuo.’

²² “Nie Israelmiako, a die rünyüshücie: NazaretJisu ha, nieko rei si keba tuoi, Ukepenuopfü thuo puo geinu kekuo mhathoko, u ngoko mu zasiko chü di puo zo ücü thashü,

²³ themia hau, Ukepenuopfü thuo rhüse ketuo mhie mu puo pedzü si tou di, puo khapie nieko dzie nu shüwa, nieko thuo thezho sanyüyakemomia bu puo gouwa, mu puo dukhriwa.

²⁴ Derei Ukepenuopfü kesia nunu puo shüphralie di puo chü perheilie, süu kekuo nu puo phapie balie kenjü.

²⁵ Kekreilamonyü David-e puo dze pukeshü: ‘A a mhodzüki Niepuu nguya, puo a zatsa ba seiya, mu a rüsierünielie lho;

²⁶ süla a nou rei puo noumvü, siro a meü rei puo neiya, sümho rei a chüüphou ha kemerü nu lhoutuo.

²⁷ No a ruopfü pie Hades nu bawa lhocü la, morei n Kemesau bu cieürietalie lho.

²⁸ No kerhei chako thashü a kie; sidi a bu n mhinguki nu a nei lhe mo tuotatuo.’

²⁹ “A keze Israelko, a u puotsa David dze nieko ki pu kemecie tsuoishütuo, puo siata di khruwa, mu puo mekhru thie rei u kengu nu zhü zo.

³⁰ Siro puoe siedzekesimia rei chü mu Ukepenuopfüe puo ki rüse di puosepuoyiemia puo bu puo kediba gei batuoü phrakeshü dieko puoe si zo.

³¹ Pedzüperie hau ngu di, David-e Khrista rheilasieketuo pu di, ‘Puo pie Hades nu bawa mo, morei puo chüe cieürieketa chü mo.’

³² Ukepenuopfü thuo, Jisu hau chü perhei laliete, mu hie pete rei süu zhapumia zo.

³³ Süla Ukepenuopfü zatsa nu puo chü pezhase bate, mu Puou kinu phrapie kezhü Kemesa Ruopfüu ngulieketa la, nieko tsie si mu ngu keba hau puoe rushüte.

³⁴ Kekreilamonyü David zowe teiko gei sie mo, derei puoe pukecü, ‘Niepuue a Niepuu ki, “No a zatsa balie,

³⁵ A ngumvüko pie n phiba chüwa kemochie.” ’

³⁶ Süla Israel kiu pete bu, nie puo goukewa Jisu hau, Ukepenuopfü puo chüpie Niepu mu Khrista chüwata ücü si kemecie tsuoiliecie.”

Pelelie Kerieko

³⁷ Uko hau silie tse, u melou va pechüteilie di sie Pitor mu apostel kekreiko ki, “Kezeko, hie bu kedipuo chülie morosuo ga?”

³⁸ Pitor sie uko ki, “Thenoukedilie di nie kehoupuorei Jisu Khrista za nunu dzülupfü phrelie tse nie kephoumako valietuo; mu methuo khakeshü Kemesa Ruopfü mhaphruou nie ngulietuo.

³⁹ Kekreilamonyü phrapie kezhüu nie mu nie nuonuo la, tsiu kepecie phi nu ketuoko pete la, siro Niepuu Ukepenuopfü puo thuo kiepie puo kitsa shülieketa pete la rei zo.”

⁴⁰ Mu puo die kekrei kekra rei se zhapu chüshü mu uko tarho di sie, “Kesuokeruo phou hau kinu nie thuo nie kelaliecie,” sishü.

⁴¹ Süla puo die u neikelie khe dzülupfülie, sidi sünhie mia nyie se mese uko salie.

⁴² Süko u khapie apostelko kepetha die nu, kepekrokecü nu, niekhrüda bietshiekecü nu mu kecha nu shü seilie.

Kepelemiako Donu Kelhou zho

⁴³ Süki themiako u ngo phita, kekreilamonyü apostelkoe u ngoko mu zasiko kekra chüshü.

⁴⁴ Siro pelekelie khe keze kro puo chü di u vie pete vierhe chüta.

⁴⁵ Uko u vieko mu u nyaürako zelie di puomako se vor uko donu tsopfhü kebako vaphilie.

⁴⁶ Siro uko teisonhie kezepuo chü di rüsuoki nu u tei kha seshü, uko kinu niekhrüda bietshiecü tsiu u nou mezhü mu u nei siei di mhacümhakrie.

⁴⁷ Siro Ukepenuopfü tshe mu themia pete mhodzü therhu rei pfü. Tsiu Niepuu teisonhie kelakelieko bu uko salielie ba zota.