Mhakechüko 18 - Angami Naga CL (Re-edited) Bible (BSI)

Korint nu Kevo

¹ Hau sie Paul-e Athen nunu Korint nu vota.

² Sünu puo Judamia puo Akila ükecü Pontu nu kelhoumia puo ze keselie, sümhodzü za kinu puo kimia Priskila ze di Itali nunu vor ba, kekreilamonyü Klaudiae Judamia pete bu Rom nunu tuotanuketa la. Paul unie mehotuoü vo,

³ puo rei unie mhatho kemhie chüyacü la, puo unie ze bata, mu uko keze mhachü, uko pfhekichüyakezhamia phre zocü la uko keze mhachü bata.

⁴ Süki puo sabat metsei sinagog nunu kerüchü di Judamia mu Grikmia hü phi.

⁵ Sila mu Timothi unie Makedonia nunu vorkelie sie, Paul-e dieu pu thenou kenyü chü mia petha di Jisue Khristau zo ükecü pie Judako ki zhapu chüshü.

⁶ Uko puo petsou mu puo thata tse, puoe puo pfhe kesou di uko ki, “Nie zie bu nie tsügeituo! A mezhü zo. Thie yawinu a Judakemoko ki votatuo,” sita.

⁷ Süsie puo sinagog nunu tuota di vo Ukepenuopfü rüsuoyakezha Tita, Justa ükecü Ukepenuopfü kepelemia puo kinu bata; puo ki sinagog khieki ba.

⁸ Siro Krispa, sinagog nu krütau rei puo kinuko pete ze Niepuu pelelieta; mu Korintmia kekra Paul dieu kesiko pelelie di dzülupfülie.

⁹ Khuzhü puo Niepuue ziemho nunu Paul ki, “Michie hiecie, derei die pu ba zolie mu kemekrie bata hie;

¹⁰ a n ze tuo zo, süla miapuorei n bie pesuowalie lho, rüna hanu a themia kekra bakecü la.”

¹¹ Süla Paul teicie puo di puotie sünu ba di Ukepenuopfü dieu pie themiako petha bata.

¹² Sirei Galioe Akaya nu kezhau chükelie ki, Judako keze kenourhe di Paul teze dienyakiu nu vota.

¹³ Uko sie, “Themia hau mia hüpie u bu Ukepenuopfü rüsuolienucü pu di thezho-u petsou tuote,” sita.

¹⁴ Paul mha putuoü sie tse Galio sie Judako ki, “Dienya hau mha kesuo kechü morei kekrükecü chüwaketa puo üliro, nieko Judako nyie hau a rünyükecü mese zo,

¹⁵ derei hau die kro puo mu theza kro puo mu nie thuo nie zho nunu keprülikecü puote ru nieko thuo meholietacie; a thenyie haicü ca nyü mo!”

¹⁶ Puo sidi dienyaki nunu uko ketsewa.

¹⁷ Sitse uko peteko sie Sosthene, sinagog nu krüta chüyakezhau merhashülie di dienyakiu mhodzüki nu puo vüta. Derei Galio süu la mhapuorei puo nou nyüshü mo.

Antiok nu La Kevor

¹⁸ Paul telhe sünu ba vor di kepeleko ze kekhota, sidi Priskila mu Akila unie zelie di rou geinu Siriatsa la vota. Siro hadzü puo die phrakeshü puo la Kenkria nu puo tsü thiewa.

¹⁹ Uko vor Efesa tsolie tse, Paul-e Priskila mu Akila nie khapie ba di Sinagog nu vo Judamia ze kerüchü.

²⁰ Süki uko puo bu uko ze ba sashünu cha, derei puo mvüta;

²¹ mu puo uko ze kekhotatuo üdi sie, “Ukepenuopfü medo liro a la nieko ki vortuo,” sishü. Süsie puo Efesa nunu rou gei sie di tuota.

²² Sidi puo Kaisaria nu vor tsolie tse Jerusalem nu kho di kehouu kelushü, sidi tuo Antiok nu keta.

²³ Puo zha huo sünu bakelie sie Galatia mu Frigia tsatie vo di pethakelieko pete chü kemeteishü.

Apolo Mhatho

²⁴ Siro Judamia puo puo za Apolo ükecü puo, Alexandramia, puo Efesa nu vor, puo die pu si mu kethodieko si pevi phikecü puo.

²⁵ Puo Niepuu Chau pie pethapfükeliemia puo, puo Johan mia dzülukepfüu dze rübei kesi zo ürei puo rhiechü Jisu dze kethoko pu tou mu pethayakezha puo.

²⁶ Puoe thepfu se di sinagog nu die pu; derei Priskila mu Akila unie puo die sikelie ki unie puo ze kinu vo di Ukepenuopfü Chau dze pu tou sapie puo pethashü.

²⁷ Siro puo Akaya tsatie vo nyü sie tse, kepelemiako puo chü kethepfushü mu pethakelieko bu puo zelienu di leshü puo thu sashü. Puo sünu vorlie tse ngukemezhie nunu pelekelieko khruohi phishü,

²⁸ kekreilamonyü puoe mechüu mhodzünu puo die kuo se di Jisue Khrista zo ükecü kethodieko nunu tha kemecie toupie kiekeshü geinu Judako die va pejüwa.