Mhakechüko 17 - Angami Naga CL (Re-edited) Bible (BSI)

Thesalonika nu Kevo

¹ Paul mu Sila unie rüve Amfipoli mu Apolonia pfüthe Thesalonika nu vorlie, sünu Judamia sinagog puo ba.

² Paul-e puo zhoki tuoi uko ki nu vo, mu sünu sabat va se ba di kethodieko nunu uko ze kepukekie ba,

³ tsiu süko ca vatshapie uko kie di Khrista kemezhiekewa sie kesia nunu rheilakesie dzeko thapie uko kie menuoshü, di sie, “A pie nieko ki pu keba Jisu hauha Khristau zo.”

⁴ Süko donu huomia kepfhezelie siro pecükecü Grikmia kekra tsiu thenumia krüta kekra rei pelelieta di Paul mu Sila unie zeta.

⁵ Derei Judako u ro di sie, lhithochü nu kerüzhümia huo kie kengupie kemeyhu kro puo chülie di rünau nu mha kebvüshü. Sidi ukoe unie ze mechühou nu votuoü Paul mu Sila nie pfhü keba ki vo Jason ki reta.

⁶ Derei uko unie ngulie mota tse, Jason mu kepeleko huomia merhashü rünau nu kekuokeseko mhodzünu vor, shiekhoui di sie, “Kijüu pfü pekhepelaketuo themianie haki rei vor,

⁷ ru Jason unie pesolie. Uko pete rei kedi kekrei Jisu ükecü puo tuo üdi kediu zhoko petsoute,” sita.

⁸ Siro die hau sikeshü ki themiako tsiu kekuokeseko bu u nou kehoukeruo chüta,

⁹ sidi Jason mu kekreiko u die phrakeshü sie uko bu tuota.

Beria nu Kevo

¹⁰ Süzhü kepeleko Paul mu Sila nie ketsepie Beria nu shüwa; sidi unie sünu vorkelie ki Judamia sinagog nu vota.

¹¹ Hanu keba Judako Thesalonika nu kebako ki u nou mezhükuo, kekreilamonyü ukoe u nei siei di dieu lielie mu die süko puotou mo mo shiü silieketuo la teisonhie kethodieko pfhü phrüya.

¹² Sidi themia kekra rei pelelie; siro u tha kenyi Grikmiapfü mu therhukepfü thepfumia kekra rei pelelie.

¹³ Derei Thesalonika nu keba Judako Paul vo Beria nu rei Ukepenuopfü dieu pie petha tuoketa dze silie tse, uko sünu rei ker di mha kebvü mu krodiko nou chü pesuoshü.

¹⁴ Sitse kepelemiako Paul ketsepie dzükezha khie shü mhawa; derei Sila mu Timothi unie we sünu bata.

¹⁵ Siro Paul meza ze kevoko puo ze vo Athen tsoshü, süsie Sila mu Timothi nie bu pezi vo puo tsolie morokesuo silieta, di uko puo ze kekhota.

Athen nu Kevo

¹⁶ Paul-e Athen nu Sila mu Timothi nie pfhe keba ki nadiu nu terhuorhiko thuo tshupfü keba ngu di puo noumeca seta.

¹⁷ Süla puo teisonhie sinagog nu Judako mu pecükecümia kekrei rei tsiu lhithochüko nu themia kehoupuorei ze kesekelieko rüchü.

¹⁸ Siro Epikuri mu Stoik mhasi pie pethayakezha kronie donu huomia puo ze ketikemeüta. Süko huomia sie, “Diebou hau kedipuo pu ba mu?” Kekrei huo sie, “Puo chazoumia rhuo kro puo pupie mia pethaketuo puo zo.” (Puoe Jisu Khrista mu rheilasiekelie dze pie petha tuokecü la).

¹⁹ Süla uko puo ze Ariopaga ükecü chü nu vorlie di sie, “No mha kesa puo pie pethaketuo dze hie bu sishütieya mo?

²⁰ Süko hie la kesa kro puote, süla hie n ki mha süko ca si nyüyalie,” sishü.

²¹ Siro Athenmia mu chazoumia sünu lhou keba pete mhapuorei chü mo zo di mha kesa puo kepu morei rünyü ba u tei pevowawaya.

²² Sitse Paul-e Ariopaga metsuo nu thalie di sie, “Athenmiako, nieko ha mha pete nu terhuo keprei nanyü nu pecü phiyacü a ngulie.

²³ A nieko ra tuo rühou kevo ki nieko rüsuoyakezhako meho tuo ru ruosuoba puo gei ‘Si kemo Rhuo puo la’ ikecü thupie keba ngulie. Niekoe si mo zorei rüsuoyakezha süu, a tsie pie nie ki puya.

²⁴ Puo sü Ukepenuopfü, kijü mu sünu ketuo kheko chükeshüu, puoe tei mu kijü mho Niepuu zo, themia thuo chükelie rüsuokiko nu baya mo,

²⁵ morei puo mhapuo tsopfhü bata di u dzie pie puo theke rei ya mo, puoe puo thuo kerhei mu keha tsiu mha pete rei pie u kehoupuorei tsüyakezha la.

²⁶ Mia puo geinu puo seyie neiüko chüpie uko bu kijüu pete gei lhou tuote, tsiu puo pedzüperie uko bu lhouketuo teiko siro baketuo rieko rhieshüwate,

²⁷ sidi uko bu Ukepenuopfü pfhülie mu si zo vo puo ngulieketuo la, puo zowe u mia puo kinu rei pecie tuo mo zo;

²⁸ kekreilamonyü ‘We puo geinu rhei mu mele tsiu lhou tuoyakezha zo,’ süu nie donu ükezomia huo rei pukecü, ‘We rei puo yiemia zo,’ si.

²⁹ We rei Ukepenuopfü yiemiakecü la, puo üse suna morei rakachü morei ketsie pie chükelie miarhi, themia do mu mhasi se chükelie kemhie puo ücü leta zhü mo.

³⁰ Ukepenuopfüe thiedzü themia mhasi kemo teikiko kevavuo di khawate, tsie we puo themia kehoura tuo shierei pete bu thenou kedilienu pushüwate,

³¹ kekreilamonyü puoe mia puo bu kemezhü tou nunu kijüu nyie pepiketuo la teisozha puo pethose tuote, mu hau chü touketuo la kesia nunu themia süu chü perheipie peteko kieshüte,” sishü.

³² Kesiamia rheilakesie dze sishü tse, uko huomia udzü thevita; derei kekreiko sie, “Hie hau dze n kinu rünyü latuo,” sita.

³³ Süki Paul uko ze kekhota.

³⁴ Derei huomia puo kitsa vata di pelelie, süko donu Ariopagit-u Dionisi, mu thenumia Damari ücüpfü puo, siro kekrei huo rei sa.