Mhakechüko 16 - Angami Naga CL (Re-edited) Bible (BSI)

Timothi-e Paul mu Sila Nie Ze Tuoketa

¹ Süsie Paul rüve Derbe mu Lustra nu vo ru sünu pethakeliemia puo puo za Timothi ücü puo ba, puo zuoe Judamiapfü di peleketapfü puo, derei puo puoe Grikmia.

² Lustra mu Ikonia nu kepelemiako rei Timothi pu pevi phiya.

³ Paul-e Timothi bu puo ze tuo nyüta, süla puo zelie di puo zhürewa, sütsatie lhou keba Judakoe puo puoe Grikmia ücü si keba la.

⁴ Uko rüve rünako nu kevo ki Jerusalem nu apostelko mu phichüko pepikelieko pie kepelemiako ki pu di uko bu süko chüüzelienushü.

⁵ Süla kehouko kepele nu metei sakuolie tsiu teisonhie themia kra kechülie.

Troa nu Paul Ziemho Kengu

⁶ Kemesa Ruopfüe uko bu dieu pie Asia nu pu mvüketa la tuo Frigia mu Galatiako nu vota.

⁷ Sidi Misia kepetsoutsatie vorlie tse, uko Bithunia nu lekecü lesie, derei Jisu Ruopfüu uko bu sünu le mvüta.

⁸ Süla uko Misia kijü pfüthe Troa nu vota.

⁹ Süzhü Paul-e ziemho geinu Makedonia mia puoe puo kie bei di sie, “Makedonia nu vor di hieko khruohishücie,” iketha ngu.

¹⁰ Paul-e ziemho süu ngu tse hieko Makedonia nu voketuo la dojülie, Ukepenuopfüe hie bu dieliekeviu pupie uko pethashünukecü la hie kie keba lelieketa la.

Filipi nu Lidia Thenou Kedikelie

¹¹ Hieko Troa nunu rou zelie di mezhü Samothra nu vo, mu süsienhie Neapoli tsolie.

¹² Hieko sünu Rommia vo rüna chü keba Makedonia nadi kemeyietho-u Filipi nu vorlie. Sidi hie zha huoyo nadi sünu bata.

¹³ Hieko sabat nhie kharu sie pra di, kerü khieki kecha chüyaücü thechü puo nu vo, mu hieko sünu ba di thenumia kro puo vor kengu kebako ze kerüchü.

¹⁴ Süki puo za Lidia, Ukepenuopfü rüsuoyakezhapfü puo, hieko die rünyü ba; puoe Thiatira nadiu nunu vor mu pfhe meriemegekecü lhi chüya. Niepuu thuo puo nou khrüshü di Paul die pukeshüko rünyü menuolie.

¹⁵ Süpfü mu puo kinuko dzülupfülieta tse, puo hieko kie bei di sie, “Nieko a üse Niepuu kepelemiapfü puo üya ro, a ki nu vor batacie.” Sidi puo hie bu vonu beita.

Paul mu Sila Nie Kedie Kechü

¹⁶ Khunhie puo hieko kechachüu nu vokezhü ki, miadiemiapfü puo themou ruopfü zeyakezhapfü puo ze keselie, mu puo themou la raka kekra krapie puo niepumia tsülieya.

¹⁷ Süpfüe Paul hieko siemedzi shiekhoui di sie, “Themia hako Kerükrietho Kepenuopfü kituomia zo, kelakelie chau pie nieko ki puya.”

¹⁸ Puo zha kekra si tuota. Hau Paul keyhu phiketa la reipra ruopfüu ki, “A Jisu Khrista za se n bu puo geinu partanuyawe!” Sitse bavüdo süu tou nu süu prata.

¹⁹ Derei puo niepuko raka ngulieketuo kemerü ba moketa ngulie tse, uko Paul mu Sila telie di merhashü ze lhithochü nu kezhako mhodzünu vota.

²⁰ Uko unie ze kezhako mhodzünu vor di, “Themia hanie-e u rüna kebvü bate; unie Judamia,

²¹ mu we Rommia medzi morei zelie kesuo u zho kemo zenu pethaya.”

²² Süki krodi kepekrolie di unie petsou sierta, sidi sorkari keseko unie pfhenei cierhawa mu mia bu seipie unie vüwanu die khashüwa.

²³ Sidi uko unie vü pesuo phiwa di unie khapie kedieki nu bawa mu kedieki kepfheu bu unie pfhe menuolienushüwata.

²⁴ Dielie hau ngukelie ki kedieki kepfheu phikha pie unie phi kekhawa di unie khapie kedieki kesoutho nu bawa.

²⁵ Khisoteiluo Paul mu Sila unie kecha chü mu chielipie Ukepenuopfü tshe ba siro kedieko unie pfhe rünyü ba.

²⁶ Süki kiükishü kemerie mhapuochü vorta, sitse kedieki mvüdzeko shükeniewa, mu kikhako shühie parta, tsiu kediemia phako rüprei phreta.

²⁷ Kedieki kepfheu cosier ru kikha pete khrüpie ketha ngu di kedieko pete tate nhiecü le di, puo zhiecha zoupie puo thuo puo dukhriwatuoü thata.

²⁸ Derei Paul shie puo rhiechü di sie, “No n thuo n pechü hiecie, hieko pete haki ba phre zo,” sishü.

²⁹ Kedieki kepfheu mi chalie di ta le tsiu pekhrukhru di tsu Paul mu Sila unie mhodzünu zhüta.

³⁰ Süsie puo unie ze chazou pralie di sie, “Kezhanie, a kelalieketuo la kedipuo chü morosuo ga?”

³¹ Sitse unie sie puo ki, “Niepu Jisu pelelie, sitse no rei mu n kinuko rei kelalietuo.”

³² Sidi unie Niepuu die pie puo mu puo ki sünu keba pete ki pushü.

³³ Süzhü teiluo kedieki kepfheu unie ze vo unie gei thepfüko pete khrüwa; sidi puo mu puo kikru pete dzülupfü mhalieta.

³⁴ Siro puo unie ze puo ki nu vo di kecüca pie unie tsü; puo mu puo kinuko pete u nei phita, puo Ukepenuopfü pelelieketa la.

³⁵ Teisolie tse, kekuokeseko thenako ketseshü di sie, “Themianie khashüwacie,” sita.

³⁶ Süla kedieki kepfheu sie Paul ki, “Kezhakoe Sila nnie khashüwanu pu vorte; süla nnie parlie mu nnie nou mene di tuotalie.”

³⁷ Derei Paul sie, “Uko hie nyie kecü mo di, hie Rommia zorei mechühou nunu hie vü di hie pie kedieki nu shüwa; sidi tsie pekhre hie kha lashüwatuo üya le? Mhakipuorei silie kenjü! Uko bu vor di hienie kha lashüliecie.”

³⁸ Sitse thenako die süko se vo kekuokeseko ki pushü, mu uko unie Rommia zo ücü silie tse michieta.

³⁹ Süla uko vor di unie ki u kejo chata. Sidi uko kedieki nunu unie ze parshü di unie bu nadiu nunu tuotanu cha beita.

⁴⁰ Siro unie kedieki nunu parta tse tuo Lidia ki nu vota, di sünu unie siezedzürieko ngulie tse uko nou chü kethepfushü di tuota.