Mhakechüko 15 - Angami Naga CL (Re-edited) Bible (BSI)

Jerusalem nu Mechükehou

¹ Süsie Judia nunu mia kro puo ker di kezeko petha di sie, “Mosa zho tuoi nieko zhürelie kemosie nie kelalie kenjü,” sita.

² Süki Paul mu Barnaba unie süko ze kemeü da mota tse, Paul mu Barnaba unie bu kekreimia huo sa di hau la kho Jerusalem nu apostelko mu kehou nu phichüko ze kerüchüketuo petholie.

³ Süla kehoue uko ze vo chala nu shüshü tsiu ukoe Foinikia mu Samaria pfüthe vo, ukoe Judakemoko u nou kedikelie dze pushü, süla kepelemiako u nei phita.

⁴ Uko vor Jerusalem tsolie tse, kehouu, apostelko mu phichükoe uko zelie, ru ukoe Ukepenuopfü uko geinu chükeshüko pete se uko ki pushü.

⁵ Derei kepelemiako huo, Farisiko rüla zeyakezhako siethalie di, “Uko bu u zhüre morosuo, mu uko bu Mosa zho-u medzi morosuo zo,” sita.

⁶ Apostelko mu phichüko vo kese di süu dze kerüchü.

⁷ Sidi kerüchü sekewa sie Pitor sie thalie di uko ki, “A kezeko, nieko rei si batuo, Ukepenuopfü a bu dieliekeviu pie Judakemoko pethashü di uko bu pelelieketuo la therieki nieko donunu a kedalie.

⁸ Siro Ukepenuopfü themia nou siyakezhau u gei chükeshü tuoi Kemesa Ruopfüu pie Judakemoko rei tsükeshü geinu puo medo-u zhapu chüshüta zo;

⁹ tsiu kepele se u nou chü kemesakecü nu puoe u mu uko donu mhapuorei chü kekrei mo zo.

¹⁰ Siro kiüdi upuonuoko rei tsiu we rei pfülie kelho vocieu pie pethakelieko vo gei shü di Ukepenuopfü dojüya mu?

¹¹ Sizomonyü we rei Niepu Jisu u ngukemezhie lanu süko tuoi kelalieketuo pele ba ze!”

¹² Sitse kehouu pete zeita di Paul mu Barnaba unie geinu Kepenuopfüe Judakemoko donu zasi tsiu ungomhatho chükeshü dzeko rünyü u nei siei bata.

¹³ Unie die puthewa mu Jakob sie, “A zeko, a pfhe rünyüshücie!

¹⁴ Ukepenuopfü puo thuo puo za la Judakemoko donunu mia kro puo kielietuo üdi uko ki vo riekecü dze Simon-e pushüte.

¹⁵ Siedzekesiko kepu rei die süu ze kerhe tou zo, süu dze,

¹⁶ “ ‘Hau sie a rürei la vortuo, sidi David ki tetsuketau a chü lashütuo; a puoco mu razhüketako nunu phou lashütuo, sidi süu tou la se sielietuo,

¹⁷ sitse themia kekrei pete, tsiu Judakemoko a za se kietuoketa pete bu Niepuu pfhülietuo. Niepuue puya, mha hako pete chükeshüu,

¹⁸ thiedzütho nu pie pesishü tuote.’

¹⁹ Süla a nou kele, úko rei Judakemoko rürei la Ukepenuopfü ki vorkelieko keyhu la zhü mo,

²⁰ derei we themia süko bu terhuorhi la rhuketako, pierüü nunu, mu khunuo chakhrikecü, tsiu thezie cü hienukecü leshü puo thushüwa khe.

²¹ Kekreilamonyü thiedzütho nu rüna neiüko nunu sabat nhie Sinagog kheko nu Mosa zho-u phrü di pupie mia petha tuota ze ru.”

Leshü Thupie Judakemoko Ketsü

²² Sitse apostelko mu phichüko, tsiu kehou peteu rei sanyü di, uko donunu huomia kedalie di Paul mu Barnaba unie ze Antiok nu votuoü pepilie. Sidi uko kepeleko donu krütanie Juda Barsaba ükezhau, mu Sila unie ketseshü,

²³ siro leshü hau sa ketseshü: “Hie apostelko siro phichüko tsiu nie kezekoe Antiok, Siria mu Kilikia nu keba Judamia mo di peleketako pete kelushüzhie.

²⁴ Hieko mhapuorei pushü mo zorei hie donunu mia huo vor nie keyhu siro nieko nou chü pesuokecü dze siliete,

²⁵ süla hieko kenourhe di hie sou mia kenie kedapie unie bu hie kekhrie Barnaba mu Paul,

²⁶ u Niepuu Jisu Khrista zau la u phou rei khrie mokeshünie ze nieko ki votuoü ketseshüzhie.

²⁷ Sidi hie Juda mu Sila unie ketseshüya, siro unie rei hieko dieko se nie ki pushütuo ho.

²⁸ Süla Kemesa Ruopfüu rei mu hie rei nieko bu medzi morokesuo hako sie thepie kemesi kekrei puorei pie nieko gei sashü moro viketuo lete.

²⁹ Süu mha pie terhuorhi rüsuokewa vieko cü molie; thezie siro khunuo chakhrikewako cü molie mu pierüü chü molie. Nieko die süko ze balie liro vi zotuo. Keviu chü balie!”

³⁰ Sidi uko ketseshüwa mu uko bu Antiok nu vota. Siro uko vo kehouu kie kengulie di leshü pie uko tsüshü.

³¹ Süki tsüphrüko süu phrüshü tse, tarhokeshü dieko la u nei phita.

³² Juda mu Sila unie rei siedzekesimia ze ru mha kekra pupie kepeleko chü kethepfu tsiu chü kemeteishü.

³³ Sidi uko puotei huo sünu bakelie sie, kepelemiako unie bu keviu chü volienu di unie ketse lapie unie ketsekeshüko ki lashüwa.

³⁴ (Derei Silae sünu ba ro vituo üta).

³⁵ Derei Paul mu Barnaba unie Antiok nu bata, siro kekreimia kekra rei ze sa di Niepuu die pupie mia kie mu pethashü.

Paul mu Barnaba Unie Kekhoketa

³⁶ Zha huo sie Paul-e Barnaba ki, “Avu la vo Niepuu die pie pethakeshü rüna pete nu kepelemiako kedipuo mhie ba shicü mehoshü khe,” sita.

³⁷ Ru Barnabae Johan, Mark rei ükezhau bu unie ze vo nyülie.

³⁸ Derei Paul-e Pamfilia nunu unie ze mhachü mo mu unie khawa di tuoketau bu unie ze vo nyü mota.

³⁹ Unie süu la kediekrei phita, sidi unie kekhota; Barnabae Mark zelie di rou geinu Saipras nu vota,

⁴⁰ mu Paul-e Sila kedalie di kepelemiako bu unie khapie Niepuu ngukemezhieu nu shü di tuota.

⁴¹ Puo Siria mu Kilikia pfüthe vo di kehouko chü kemeteishü.